Bai na kontenido

SPLIKASHON DI TEKSTO DI BEIBEL

Mateo 6:34—“No Preokupá pa e Dia di Mañan”

 “No sea nunka anshá pa e dia di mañan, pasobra e dia di mañan lo tin su mes inkietutnan. Kada dia tin su mes problemanan.”—Mateo 6:34, Tradukshon di Mundu Nobo.

 “Pues, no preokupá pa e dia di mañan, pasobra e dia di mañan ta preokupá pa su mes problemanan. Kada dia tin sufisiente problema di su mes.”—Mateo 6:34, Beibel na papiamentu koriente.

Splikashon di Mateo 6:34

 Ora Hesus a papia e palabranan ei, e kier a laga su oyentenan komprondé ku nan no mester ta demasiado preokupá, òf muchu anshá, tokante problema ku lo por surgi den futuro. Na lugá di preokupá, lo ta mihó pa trata ku e problemanan aktual ku bo ta konfrontá.

 Hesus no tabata ke men ku nos no mester pensa riba e dia di mañan òf keda sin plania pa futuro. (Proverbionan 21:5) Mas bien, e kier a yuda nos pa nos no ta demasiado preokupá, òf anshá, tokante loke kisas por sosodé mañan. E ansha ei por kita nos goso i stroba nos di konsentrá riba loke nos tin ku hasi. Keda preokupá tokante e problemanan di mañan, no ta yuda nos solushoná nan. Hopi biaha, loke nos ta preokupá pe ni sikiera ta sosodé, òf si e pasa mes, e no ta dje grave manera nos a pensa.

Konteksto di Mateo 6:34

 E palabranan akí di Hesus ta parti di su famoso Sermon Riba Seru ku nos ta haña na Mateo kapítulo 5 pa 7. Den e diskurso ei, Hesus a splika ku demasiado preokupashon no ta hasi nos mas felis ni ta rèk nos bida. (Mateo 6:27) El a bisa tambe ku ora nos ta pone Dios promé den nos bida, nos no tin nodi di ta demasiado preokupá pa e kosnan di mañan. Dios ta kuida mata i bestia, pues sigur lo e kuida tambe hende ku ta sirbié.—Mateo 6:25, 26, 28-33.

Lesa Mateo kapítulo 6 huntu ku nota di aklarashon.