Bai na kontenido

E Leinan di Dios Enkuanto Higiena Semper A Benefisiá Humanidat

E Leinan di Dios Enkuanto Higiena Semper A Benefisiá Humanidat

Un 35 siglo pasá, poko promé ku e pueblo di Israel a drenta Tera Primintí, Dios a bisa nan ku lo e protehá nan kontra “e malesanan teribel” ku nan a konosé na Egipto. (Deuteronomio 7:15) Un manera ku Dios a hasi esei tabata di duna nan instrukshon detayá tokante kon pa prevení malesa i mantené bon higiena. Por ehèmpel:

  • Segun e leinan ku Dios a duna e nashon, nan mester a baña i laba nan pañanan.—Levítiko 15:4-27.

  • Pa loke ta sushi di hende, Dios a bisa: “Bo mester tin un lugá pafó di e kampamentu pa bo sali bai ayanan, i bo mester tin un skòp den bo ekipahe, i ora bo sinta pafó pa hasi bo nesesidat, bo mester koba un buraku kuné i tapa bo sushi.”—Deuteronomio 23:12, 13.

  • Hende ku nan a sospechá ku tabatin malesa kontagioso mester a keda den karentena, es desir, leu for di otro hende, pa un tempu. Ora nan a kura, nan mester a laba nan pañanan i baña nan kurpa den awa pa por a deklará nan “limpi” i pa nan por a bini bèk den e kampamentu.—Levítiko 14:8, 9.

  • Tur hende ku a mishi ku un kadaver mester a keda den karentena.—Levítiko 5:2, 3; Numbernan 19:16.

E leinan di e nashon di Israel a kontené konsepto médiko i norma di higiena ku tabata masha avansá pa nan tempu.

Serka otro nashon, e normanan di higiena tabata hopi primitivo i no a yuda nan. Por ehèmpel:

  • Hende tabata benta nan sushi riba kaya. Awa i kuminda kontaminá, huntu ku otro sushedat, a krea un ambiente insaludabel ku tabata kousa hopi malesa i pone hopi bebi muri.

  • E dòkternan di pasado tabata sa masha tiki òf nada di mikrobio i bakteria ku ta kousa malesa. E egipsionan tabata usa, por ehèmpel, sanger di lagadishi, sushi di pelikan, raton morto, orina i pan ku beskein komo “remedi.” Nan tabata usa tantu sushi di hende komo di bestia den nan tratamentunan médiko.

  • Den Egipto di antigwedat, hopi hende tabata bira malu debí na parasit ku nan a pega kuné for di e awanan kontaminá di riu Nilo i su kanalnan. Pa e mesun motibu, hopi mucha na Egipto tabata muri di diarea i di otro malesa kousá pa kuminda kontaminá.

Di otro banda, e israelitanan sí a benefisiá i a keda relativamente bon di salú debí ku nan a sigui e leinan di Dios.