Bai na kontenido

Kiko Ta Boutismo?

Kiko Ta Boutismo?

E kontesta ku Beibel ta duna

Boutismo ta enserá ku un hende ta bai kompletamente bou di awa i sali bèk for di dje. * P’esei Hesus a batisá den un riu sufisiente hundu. (Mateo 3:13, 16) Meskos tambe, un hòmber di Etiopia a puntra pa e ser batisá ora el a yega na “un lugá ku tabatin awa.”—Echonan 8:36-40.

Nifikashon di boutismo

Beibel ta kompará boutismo ku un entiero. (Romanonan 6:4; Kolosensenan 2:12) Boutismo den awa ta nifiká ku un persona ta muri pa ku su manera di biba anterior i ta kuminsá un manera di biba nobo komo un kristian dediká na Dios. Tantu e pasonan ku ta hiba na boutismo komo e boutismo mes ta habri kaminda pa un hende por haña un konsenshi limpi basá riba su fe den e sakrifisio di Hesukristu. (1 Pedro 3:21) P’esei Hesus a bisa ku su siguidónan mester batisá.​—Mateo 28:19, 20.

Boutismo ta kita piká?

Nò. Beibel ta bisa ku ta solamente pa medio di e sanger dramá di Hesus nos por ta limpi di piká. (Romanonan 5:8, 9; 1 Huan 1:7) Ma pa un persona por benefisiá di Hesus su sakrifisio, e mester tin fe den Hesus, kambia su manera di biba pa e ta na armonia ku e siñansanan di Hesus i batisá.​—Echonan 2:38; 3:19.

Beibel ta apoyá boutismo di bebi?

Nò. Niun kaminda den Beibel ta menshoná boutismo di bebi. Sierto religionnan ta hasi un seremonia kaminda nan ta “batisá” un bebi (nan ta sprengu òf basha awa riba su kabes) i dun’é un nòmber. Pero, boutismo kristian ta pa esnan ku tin sufisiente edat pa komprondé “e bon notisia tokante e Reino di Dios” i kere den loke nan ta siña. (Echonan 8:12) Pa bo por yega na e boutismo ei, bo mester skucha e palabra di Dios, asept’é i arepentí. Un bebi no por tuma e pasonan akí.​—Echonan 2:22, 38, 41.

Ademas, Beibel ta bisa ku Dios ta mira yunan di mayornan kristian komo santu òf limpi den su bista pa motibu ku e mayornan mes ta fiel na dje. (1 Korintionan 7:14) Si un bebi mester batisá, lo e no tin nodi di dependé di e fieldat di su mayornan. *

Ideanan robes tokante boutismo kristian

Idea robes: Pa un hende batisá, por sprengu òf basha awa riba dje en bes di bai kompletamente bou di awa.

Echo ta ku tur boutismo menshoná den Beibel ta enserá bai kompletamente bou di awa. Por ehèmpel, ora disipel Felipe a batisá e hòmber di Etiopia, nan a “baha den e awa” pa e boutismo. Despues nan a “sali for di awa.”—Echonan 8:36-39. *

Idea robes: Beibel ta duna di komprondé ku famianan kompleto, inkluso bebi, tabata batisá. Por ehèmpel, e ta bisa tokante un wardadó di prezu na Filipo: “E ku henter su famia a ser batisá.”—Echonan 16:31-34.

Echo ta ku e famianan di e wardadó di prezu ku a kombertí i batisá a komprondé “e palabra di Yehova” i a “keda masha kontentu,” segun e relato di Beibel. (Echonan 16:32, 34) E echonan ei ta indiká ku si tabatin bebi den e famia di e wardadó di prezu, nan lo no tabata inkluí den e boutismo pasobra nan lo no por a komprondé e palabra di Yehova.

Idea robes: Pa Hesus, bebi tambe mester a batisá pasobra el a bisa ku e Reino ta pertenesé na mucha.​—Mateo 19:13-15; Marko 10:13-16.

Echo ta ku Hesus no tabata papia di boutismo ora el a bisa e palabra nan ei. E tabata mustra mas bien ku esnan ku ta kualifiká pa e Reino di Dios mester ta manera mucha, es desir, humilde i dispuesto pa siña.​—Mateo 18:4; Lukas 18:16, 17.

^ par. 3 E tradukshon Griego pa e palabra “boutismo” ta bini for di un palabra ku ta nifiká “bai kompletamente bou di awa.” Wak e Theological Dictionary of the New Testament, Tomo 1, página 529.

^ par. 10 Segun The International Standard Bible Encyclopedia, “niun kaminda den e Tèstamènt Nobo tin lugá pa boutismo di bebi.” Tambe tin skirbí ku boutismo di bebi a bini for di “un balor robes i eksagerá di boutismo,” esta, ku boutismo mes ta laba kita piká.​—Tomo 1, página 416-417.

^ par. 13 E New Catholic Encyclopedia ta bisa, bou di e suptema “Boutismo (den Beibel),”: “Ta bisto ku boutismo den religionnan di promé tabata pa medio di bai kompletamente bou di awa.”—Tomo 2, página 59.