Bai na kontenido

Kiko Beibel Ta Bisa di Homoseksualidat?

Kiko Beibel Ta Bisa di Homoseksualidat?

E kontesta ku Beibel ta duna

 Dios a krea hende pa tene relashon seksual solamente den matrimonio ku ta konsistí di un hòmber i un muhé. (Génesis 1:27, 28; Levítiko 18:22; Proverbionan 5:18, 19) Beibel ta kondená aktonan seksual ku no ta entre esposo i esposa, sea ku ta aktonan homoseksual òf heteroseksual. (1 Korintionan 6:18) Esaki ta inkluí relashon seksual, karisiamentu di órganonan seksual di un otro persona i tambe sèks oral òf anal.

 Aunke Beibel no ta aprobá aktonan homoseksual, e no ta manda nos odia hende ku ta homoseksual. Mas bien, e ta instruí kristiannan pa respetá òf “onra tur sorto di hende.”—1 Pedro 2:17.

 Un hende por nase homoseksual?

Beibel no ta bisa direktamente pakiko hende ta haña e sintimentunan akí, pero sí e ta rekonosé ku nos tur tin e tendensia di faya ku e mandamentunan di Dios. (Romanonan 7:21-25) En bes di enfoká riba kiko por lanta sintimentu homoseksual den un hende, Beibel únikamente ta prohibí aktonan homoseksual.

 Kon un persona por agradá Dios apesar ku e ta sintié atraí na hende di su mes sekso?

Beibel ta bisa: ‘Mata e inklinashonnan di boso kurpa pa loke ta pashon i mal deseo.’ (Kolosensenan 3:5) Pa bo por mata e mal deseonan ku ta hiba na aktonan inkorekto, bo mester kontrolá bo pensamentu. Si bo ta pensa semper riba kosnan ku ta sano, ta bira mas fásil pa kore ku mal deseo. (Filipensenan 4:8; Santiago 1:14, 15) Aunke bo por haña bo ta hiba un lucha grandi na prinsipio, ku tempu lo bira mas fásil pa bo dominá mal deseo. Dios a primintí ku lo e yuda bo ‘renobá e forsa ku ta motivá bo mente.’—Efesionan 4:22-24.

 No ta hende ku tin deseo homoseksual so tin ku dominá nan impulsonan seksual. Miónes di hende heteroseksual tambe tin ku dominá nan deseonan seksual pa kumpli ku e normanan di Beibel. Por ehèmpel, tin hende ku pa motibu di sirkunstansia ta soltero; di otro banda, tin hende ta kasá ku un persona ku no por tene relashon seksual. Nan tur ta hasi esfuerso pa dominá nan deseonan seksual pa evitá di kai den tentashon. Apesar di esei, nan por biba masha felis; i personanan ku ta sinti nan atraí na hende di nan mes sekso tambe por ta felis si di bèrdat nan ke agradá Dios.​—Deuteronomio 30:19.