Sí. Aunke ku Beibel no ta un buki di siensia, e ta eksakto den asuntunan sientífiko. Laga nos wak un par di ehèmpel ku ta mustra ku Beibel ta kuadra ku siensia i ku Beibel tin pruebanan sientífiko ku ta hopi diferente for di loke hopi hende tabata kere den e tempu ku a skirbi Beibel.

•   Universo tabatin un kuminsamentu. (Génesis 1:1) Di otro banda, hopi mito di ántes ta bisa ku e universo no a ser kreá, sino a originá di un káos ku tabata eksistí kaba. E babilonionan a kere ku universo a nase di algun dios ku a bini di dos oséano. Otro leyenda ta bisa ku universo a sali for di un webu gigante.

•   Ta lei di naturalesa ta dirigí universo i no e kapricho di algun dios. (Yòb 38:33; Yeremías 33:25) Mitonan rònt mundu ta siña ku hende no por hasi nada kontra e aktonan impredisibel i kruel di e diosnan akí.

•   Tera ta kologá na nada. (Yòb 26:7) Hopi hende di ántes a kere ku e tera tabata plat i ku un gigante òf un bestia, manera un búfalo òf un turtuga, tabatin e riba su lomba.

•   Riu i otro fuentenan di awa ta eksistí pasobra awa ta evaporá for di laman i despues ta bini abou bèk komo áwaseru, sneu òf hagel. (Yòb 36:27, 28; Eklesiástes 1:7; Isaías 55:10; Ámos 9:6) E griegonan di antigwedat a kere ku ta un oséano bou di tera ta yena e riunan ku awa. Hende a keda kere den e idea akí te den siglo 18.

•   Serunan ta sali i bai bèk bou di awa; un tempu e serunan ku tin aworakí, tabata bou di laman. (Salmo 104:6, 8) Na kontraste, segun diferente mito, ta diosnan a krea e serunan manera nan ta awe.

•   Normanan di limpiesa ta protehá nos salú. E Lei ku Dios a duna e nashon di Israel a bisa ku nan mester a laba nan kurpa despues ku nan a mishi ku un kadaver, nan mester a pone hende ku malesa kontagioso den karentena i nan mester a deshasí di sushi di hende na un manera safe. (Levítiko 11:28; 13:1-5; Deuteronomio 23:13) Na kontraste, den e tempu ku e lei ei a ser duná, e egipsionan tabata usa un remedi ku tabata konsistí di un meskla di sushi di hende pa pone riba herida.

 Un investigashon imparsial di Beibel ta mustra ku e kontesta ta nò. Laga nos wak algun idea robes ku hende tin tokante e eksaktitut di siensia den Beibel:

 Mito: Beibel ta bisa ku universo a ser kreá den seis dia di 24 ora.

 Echo: Beibel no ta bisa na ki tempu Dios a krea universo. (Génesis 1:1) Ademas, e dianan di kreashon deskribí den kapítulo 1 di Génesis tabata un periodo di tempu no spesifiká. De echo, Génesis 2:4 ta yama henter e periodo ku Dios a krea shelu i tera un “dia.”

 Mito: Beibel ta bisa ku palu i mata a ser kreá promé ku solo a eksistí pa sostené e proseso di fotosíntesis.—Génesis 1:11, 16.

 Echo: Beibel ta bisa ku solo, un di e streanan ku ta forma parti di “e shelunan,” a ser kreá promé ku palu i mata. (Génesis 1:1, Beibel Santu) Durante e promé “dia” òf periodo di kreashon, un lus dòf di solo tabata yega tera. Segun ku e atmósfera a bira mas i mas kla, riba e di tres “dia” di kreashon, e lus di solo tabata sufisiente fuerte pa sostené e proseso di fotosíntesis. (Génesis 1:3-5, 12, 13, Beibel Santu) Ta mas despues solo a bira klaramente visibel for di e superfisie di tera.—Génesis 1:16.

 Mito: Beibel ta bisa ku solo ta drei rònt di tera.

 Echo: Eklesiástes 1:5 ta bisa: “Solo ta sali i solo ta drenta, i ta pura bai bèk na e lugá for di unda e ta sali.” (Beibel Santu) Sinembargo, esaki ta simplemente deskribí e manera ku nos for di aki riba tera ta mira kon solo ta parse di move. Te asta awe hende sa bisa ku “solo ta subi” i “solo ta baha,” maske nan sa ku ta tera ta drei rònt di solo.

 Mito: Beibel ta bisa ku tera ta plat.

 Echo: Beibel ta usa e frase “te na e parti mas leu di tera,” pero esaki no ta nifiká ku tera ta plat òf ku e tin un rant. (Echonan 1:8) Meskos tambe, e ekspreshon “e kuater skinanan di tera” ta den sentido figurativo i ta referí na henter e superfisie di tera. Awendia tambe hende por usa e kuater puntanan di un kompas komo komparashon pa transmití e mesun idea.—Isaías 11:12, Beibel Santu; Lukas 13:29.

 Mito: Beibel ta bisa ku e omtrek di un sírkulo ta ekivalente na eksaktamente tres biaha su diameter, pero e midí korekto ta pi (π), òf mas o ménos 3,1416.

 Echo: Promé Reinan 7:23 i 2 Krónikanan 4:2 ta bisa ku “e laman di metal bashá” tabatin un diameter di 10 kodo i ku “un liña-di-midi di trinta kodo por a pasa rònt di dje.” (Beibel Santu) Pero, kisas e midínan akí tabata sifranan afgerond. Tambe ta posibel ku e midí di e omtrek tabata basá riba e rant parti paden di e baki i ku e midí di e diameter tabata basá riba e rant parti pafó di e baki.