Segun un rapòrt di e Sentro pa Kontrol i Prevenshon di Enfermedat di Merka, kasi mitar di e hóbennan entre 15 i 19 aña ku nan a entrevistá a yega di hasi sèks oral. Sharlene Azam, outor di e buki Oral Sex Is the New Goodnight Kiss, a bisa: “Si bo papia ku hóbennan [tokante sèks oral], nan ta bisa bo ku ta kos masha normal. De echo, nan no ta mir’é komo sèks.”

•  Kiko abo ta pensa?

•  Kiko ta e bèrdat?

•  Dikon ta importante pa sa?

 Kontestá e siguiente preguntanan ku ‘sí’ òf ‘nò.’

1.   Un mucha muhé por sali na estado si e hasi sèks oral?

   1.   Sí

   2.   Nò

2.   Sèks oral por hasi bo malu?

   1.   Sí

   2.   Nò

3.   Sèks oral di bèrdat ta sèks?

   1.   Sí

   2.   Nò

 Kompará bo kontestanan ku lo siguiente:

1.   Un mucha muhé por sali na estado si e hasi sèks oral?

    Kontesta: Nò. Esei ta un motibu pakiko hopi hende ta yega na e konklushon robes ku no tin nada malu den sèks oral.

2.   Sèks oral por hasi bo malu?

    Kontesta: Sí. Un hende ku hasi sèks oral por haña hepatítis A òf B, frèt ku ta krese na órgano seksual, gonorea, hèrpes, HIV i sífilis.

3.   Sèks oral di bèrdat ta sèks?

    Kontesta: Sí. Tur loke ta enbolbé uso di e órgano seksual di un otro persona, inkluyendo relashon seksual, sèks oral, sèks anal i masturbashon di un otro persona, ta ser konsiderá komo sèks.

 Ban analisá algun teksto di Beibel ku tin di haber ku e tópiko di sèks oral.

 Beibel ta bisa: “Esaki ta e boluntat di Dios: . . . apstené boso di inmoralidat seksual.”—1 Tesalonisensenan 4:3, Beibel Santu.

 E término original pa “inmoralidat seksual” ta referí na tur tipo di kontakto íntimo entre personanan no kasá, es desir, relashon seksual, sèks oral, sèks anal i masturbashon di un otro persona. Un persona ku kometé inmoralidat seksual por sufri konsekuensianan serio; e konsekuensia di mas tristu ta ku e ta daña su amistat ku Dios.​—1 Pedro 3:12.

 Beibel ta bisa: “Esun ku ta praktiká fornikashon [esta, inmoralidat seksual] ta peka kontra su mes kurpa.”—1 Korintionan 6:18.

 Sèks oral por pone bo sufri daño físiko i spiritual. Tambe e por afektá bo emoshonalmente. E buki Talking Sex With Your Kids ta bisa: “No ta solamente sèks vaginal por laga bo sinti duele, vulnerabel òf ku otro hende a usa bo. Tur e emoshonnan negativo ku un hende por haña despues di tene relashon seksual den un situashon inapropiá, por bini tambe despues di kualke tipo di sèks den un situashon robes. Sèks ta keda sèks.”

 Beibel ta bisa: “Ami, Yehova, ta bo Dios, Esun ku ta siña bo benefisiá bo mes.”—Isaías 48:17.

 Bo ta kere ku di bèrdat Dios su leinan tokante sèks ta bon pa bo? Òf bo ta kere ku nan ta kita bo libertat? Pa yuda bo kontestá e preguntanan ei, pensa riba un kaya drùk ku tin bòrchi i lus di tráfiko. Bo ta mira e bòrchi- i lusnan ei komo algu ku ta restringí bo òf protehá bo? Kiko lo sosodé si abo i otro shofùr ignorá nan?

 Esei ta konta tambe pa Dios su normanan. Si bo ignorá nan, lo bo kosechá loke bo sembra. (Galationan 6:7) Un buki ku yama Sex Smart ta bisa: “Mas bo ignorá bo kreensia- i normanan moral i hasi kos ku bo sa ku ta malu, ménos rèspèt lo bo tin pa bo mes.” Di otro banda, si bo ta biba di akuerdo ku Dios su leinan, lo bo demostrá ku di bèrdat bo ta un persona ku tin normanan moral haltu. I mas importante ainda, lo bo keda ku un konsenshi limpi.—1 Pedro 3:16.