“Mi a purba di lesa Beibel, pero kada bes mi wak kon diki e ta, esei ta desanimá mi.”—Briana, 15 aña di edat.

 Bo tambe ta sinti asina? E artíkulo akí por yuda bo!

•  Pakiko mi mester lesa Beibel?

•  Kon mi mester lesa Beibel?

•  Loke otro hóben ta bisa

 Si bo ta pensa ku lesamentu di Beibel ta un kos laf, ta di komprondé. Podisé ora bo pensa riba Beibel, bo ta pensa riba un buki masha diki, ku lèter masha chikitu, i sin niun plachi. Ta muchu mas dushi pa wak televishon òf vidio.

 Pero pensa riba esaki, si bo topa un kaha grandi di tesoro, lo bo no tin gana di sa kiko tin aden?

 Beibel ta un kaha di tesoro asina. E tin hopi palabra di sabiduria den dje ku por yuda bo

•   Tuma bon desishon

•   Sali bon ku bo mayornan

•   Buska bon amigu

•   Trata ku strès

 Maske Beibel ta un buki asina bieu e por yuda nos awe. Kon bini? Pasobra “henter e Skritura ta inspirá di Dios.” (2 Timoteo 3:16) Esei ta nifiká ku e konseho den Beibel ta bini di e persona di mas sabí den universo.

 Un manera pa lesa Beibel ta di kaft pa kaft. Esei lo duna bo un idea general di e mensahe di Beibel. Tin vários manera pa les’é di kaft pa kaft. At’akí dos ehèmpel:

•    Lo bo por lesa e 66 bukinan di Beibel den e órden ku nan ta aparesé, for di Génesis te Revelashon.

•    Bo por lesa Beibel den órden kronológiko, esta, den e órden ku e susesonan a tuma lugá.

 Tep: Sekshon 4 di e foyeto chikitu “Yudansa pa Studia e Palabra di Dios” ta duna un lista kronológiko di e susesonan prinsipal di Hesus su bida riba tera.

 Un di dos manera pa lesa Beibel ta pa skohe un relato ku ta similar na loke bo ta pasando aden. Por ehèmpel:

•   Lo bo ke haña amigu ku bo por konfia di bèrdat? Lesa e relato di Jonatan ku David. (1 Samuel, kapítulo 18-20) Despues, usa e blachi di tarea “Kon pa Haña Amigu Ku Bo Por Konfia di Bèrdat” na spañó pa saka algun lès balioso for di e relato.

•   Lo bo ke bira mas fuerte den resistí tentashon? Lesa kon Yosef a resistí tentashon. (Génesis, kapítulo 39) Despues, usa e blachi di tarea “Kon pa Resistí Tentashon?—Yosef Parti 1” i “Akusá Falsamente!—Yosef Parti 2” na spañó pa saka algun lès balioso for di e relato.

•   Lo bo ke siña kon orashon por yuda bo? Lesa e eksperensia di Nehemías. (Nehemías, kapítulo 2) Despues, usa e blachi di tarea “Yehova A Kontestá Su Orashon” na spañó pa saka algun lès balioso for di e relato.

 Tep: Ora bo ta lesa Beibel, sòru pa bo ta un kaminda ketu pa bo por konsentrá.

 Un di tres manera pa lesa Beibel ta di skohe un relato òf un salmo, les’é i despues wak kon e por yuda bo. Despues di les’é, lo bo por puntra bo mes:

•    Dikon Yehova a laga skirbi e relato ei den Beibel?

•    Kiko e ta bisa mi di Yehova su karakter i su manera di hasi kos?

•    Kon mi por usa e informashon akí den mi bida?

 Tep: Pone un meta. Lo bo por skirbi un fecha pa kuminsá lesa Beibel usando e programa di lesamentu di Beibel ku bo ta haña riba nos website.