Bai na kontenido

LOKE HÓBEN SA PUNTRA

Kiko Mi Mester Hasi Awor Ku Nos a Kibra ku Otro?

Kiko Mi Mester Hasi Awor Ku Nos a Kibra ku Otro?

 Steven a bisa: “Despues ku ami ku mi frei a kibra ku otro, mi a sinti mi hopi hopi kibrá. Nunka den mi bida mi no a yega di sinti un doló asina.”

 Abo a yega di pasa den algu asina? Si ta asina, e artíkulo akí por yuda bo.

 Bo sintimentunan

 Ora ku un relashon kibra e ta hasi tur dos hende doló.

  •  Si ta abo a kibra e relashon, kisas lo bo komprondé Jasmine. El a bisa: “Mi sa ku mi a hasi un hende ku ta importante pa mi doló. Anto esei a laga mi sinti kulpabel. Mi ta spera ku nunka mas mi no mester sinti asina.”

  •  Si no ta abo a kibra e relashon, probablemente bo por komprondé ta dikon algun hende ta sinti komo si fuera un parti di nan a muri. Janet ta bisa: “Eigenlijk mi a pasa den tur e etapanan di doló, por ehèmpel mi a nenga di aseptá ku nos relashon a kaba, mi tabata hopi rabiá, mi a trata na konvensé mi frei pa nos purba di nobo, mi a haña depreshon i finalmente, despues di kasi un aña, mi a aseptá ku e relashon a kaba.”

 E punto ta: Ora un relashon kibra bo por sinti bo down i desanimá. Manera un eskritor di Beibel a bisa: Legria ta kura bo, fèrdrit ta kaba ku bo.”​—Proverbionan 17:22, Beibel na papiamentu koriente.

 Loke bo por hasi

  •  Papia ku un amigu maduro. Beibel ta bisa: “Un amigu ta stima tur ora bai, i un ruman ta nasí pa tempu di atversidat.” (Proverbionan 17:17) Deshogá bo mes serka un di bo mayornan òf un amigu maduro ku por yuda bo mira kosnan mas kla.

     “Pa lunanan largu mi a isolá mi mes i no a papia ku niun hende tokante kon mi ta sinti. Pero amigunan por yuda kura e herida. Mi a sinti mihó ora mi a kuminsá papia ku nan.”​—Janet.

  •  Siña di loke a sosodé. Un otro proverbio den Beibel ta bisa: “Gana sabiduria, gana komprondementu.” (Proverbionan 4:5, Tradukshon di Mundu Nobo) Eksperensia fèrfelu por siña nos hopi di nos mes i kon pa trata ku desepshon.

     “Despues ku mi relashon a kibra, un amigu a puntra mi: ‘Kiko bo a siña di e relashon i kon lo bo usa esei ora bo kuminsá date un hende den futuro?’”​—Steven.

  •  Orashon. Beibel ta bisa: “Tira bo karga riba SEÑOR, i e lo sostené bo.” (Salmo 55:22, Beibel Santu) Orashon por yuda bo superá e doló i mira e situashon for di un otro punto di bista.

     “Keda hasi orashon. Yehova sa kuantu doló bo tin i konosé bo situashon mihó ku bo mes.”​—Marcia.

  •  Yuda otro hende. Beibel ta bisa: “No buska boso mes interes so, ma tambe interes di otro hende.” (Filipensenan 2:4) Mas esfuerso bo hasi pa yuda otro hende, mas lihé lo bo mira bo situashon for di un otro punto di bista.

     “Ora bo kibra ku un hende, esei por parse mane fin di mundu, i e ta pió ku doló físiko. Pero lo bo sinti bo mihó. Mi tabatin mester di tempu pa kura di mi herida.”​—Evelyn.