Bai na kontenido

LOKE HÓBEN SA PUNTRA

Homoseksualidat Ta Malu?

Homoseksualidat Ta Malu?

 “Tempu ku mi tabata krese, un di e kosnan di mas difísil ku mi mester a dil kuné tabata e echo ku mi tabata sinti mi atraí na hende di mesun sekso. Promé, mi tabata kere ku tabata djis un fase ku mi mester a pasa aden, pero e sintimentunan ei ta kansa mi ainda.”​—David, 23.

 David ta un kristian ku ke obedesé Dios. E por hasi esei si e ta sintié atraí na hende di e mesun sekso? Kiko Dios ta pensa di homoseksualidat?

 Kiko Beibel ta bisa?

 Loke hende ta pensa tokante homoseksualidat por varia di kultura pa kultura òf di un temporada pa otro. Pero kristiannan no ta sigui tras di opinion popular ni no ta ser “hibá p’aki i p’aya pa tur bientu di siñansa.” (Efesionan 4:14) Na lugá di esei, nan ta basa nan opinion tokante kondukta homoseksual, i tur otro tipo di kondukta, riba e normanan ku tin den Beibel.

 E normanan di Beibel tokante aktonan di homoseksualidat ta masha kla. E Palabra di Dios ta bisa:

  •  “No drumi ku hòmber manera ta drumi ku muhé.”—Levítiko 18:22.

  •  “Dios a laga nan den nan deseonan seksual bergonsoso, ya ku nan hende muhénan a kambia uso natural di nan kurpa pa unu ku ta kontra naturalesa.”—Romanonan 1:26.

  •  “No gaña boso mes. Ni fornikadó, ni adoradó di dios falsu, ni hende ku ta kometé adulterio, ni hòmber ku ta someté nan mes na aktonan innatural, ni hòmber ku ta drumi ku hòmber, ni ladron, ni hende golos, ni buraché, ni hende ku ta kana zundra, ni hende ku ta chantagiá otronan lo no risibí e Reino di Dios.”—1 Korintionan 6:9, 10.

 En realidat, e normanan di Dios ta pa tur hende, sea ku nan tin deseonan homoseksual òf deseonan heteroseksual. Echo ta ku tur hende mester tin dominio propio ora ta trata di impulsonan ku ta pone nan hasi loke ta desagradá Dios.​—Kolosensenan 3:5.

 Esei ke men ku . . . ?

 Esei ke men ku Beibel ta bisa ku nos mester odia hende ku ta homoseksual?

 Nò. De echo, Beibel ta siña ku nos no mester odia niun hende. Mas bien, e ta bisa nos pa “ta na pas ku tur hende,” sin importá nan manera di biba. (Hebreonan 12:14) Pues, ta malu pa tèr, partisipá den krímen di odio òf den kualke otro manera di maltratá hende homoseksual.

 Esei ke men ku kristiannan ta oponé leinan ku ta permití kasamentu di mesun sekso?

 Beibel ta mustra ku Dios ta aprobá solamente matrimonio ku ta entre un hòmber i un muhé. (Mateo 19:4-6) Sin embargo, e diskushon ku tin tokante leinan ku hende a pone enkuanto matrimonio entre dos hende di e mesun sekso ta un diskushon polítiko i no moral. Anto Beibel ta bisa ku kristiannan mester keda neutral den asuntunan polítiko. (Huan 18:36) P’esei nan no ta apoyá ni oponé leinan ku gobièrnu a pone enkuanto matrimonio di hende di e mesun sekso òf enkuanto kondukta homoseksual.

 Pero kiko si . . . ?

 Pero kiko si un hende ta praktiká homoseksualidat? E hende ei por kambia?

 Sí. Esei a sosodé ku algun hende den e promé siglo. Despues ku Beibel a bisa ku esnan ku ta praktiká homoseksualidat lo no risibí e Reino di Dios, e ta bisa: “Ma esei ta loke algun di boso tabata.”1 Korintionan 6:11.

 Esei ke men ku esnan ku a stòp di praktiká homoseksualidat no a sinti niun atrakshon mas pa e manera di biba ei? Nò. Beibel ta bisa: “Bisti e personalidat nobo, ku pa medio di konosementu eksakto ta ser renobá.” (Kolosensenan 3:10) Pa kambia bo personalidat ta un proseso kontinuo.

 Pero kiko si un hende ku ke sigui Dios su normanan ainda tin tendensia homoseksual?

 Meskos ku tur otro deseo, un persona por skohe pa no alimentá e deseo ei òf pa no laga e deseo ei domin’é. Kon? Beibel ta bisa: “Sigui kana pa medio di spiritu i boso lo no kumpli ku ningun deseo karnal.”—Galationan 5:16.

 Ripará ku e teksto akí no ta bisa ku e persona lo no tin deseo karnal. Mas bien, ora un hende tin un bon rutina spiritual di studia Beibel i di hasi orashon, lo e tin e forsa pa resistí e deseonan ei.

 David, kende a ser menshoná na komienso, a haña sa ku esaki ta bèrdat, foral despues ku el a papia ku su mayornan tokante su lucha. El a bisa: “Mi a sinti ku un peso a kita for di riba mi skouder, i si lo mi a papia ku mi mayornan mas promé lo mi por a disfrutá mas di mi hubentut.”

 Finalmente, nos lo ta mas felis si nos biba segun Yehova su normanan. Nos ta konvensí ku e normanan di Yehova ta “korekto, nan ta alegrá kurason” i ku “obedensia na nan ta trese gran rekompensa kuné.”—Salmo 19:8, 11, Beibel Santu.