Dos kos ku ta bon pa bo sa

 Di promé: Si bo ta generoso, hende lo ta generoso ku bo.

 Ora hende ripará ku bo ta generoso, esta, ku bo gusta duna sin spera nada bèk, nan lo ke mustra nan apresio dor di ta generoso ku abo. Beibel ta ekspresá e idea ei asin’akí:

•  “Kustumbrá duna, i hende lo duna boso. . . . E midínan ku boso ta usa, nan lo usa den boso kaso.”​—Lúkas 6:​38.

•  “E manera ku bo ta trata hende ta e manera ku lo bo ser tratá.”​—Lúkas 6:​38, Contemporary English Version.

 Di dos: Ora bo yuda otro hende, bo ta yuda bo mes!

 Si bo hasi kos bon pa otro hende, lo bo sinti bo bon ku bo mes i lo bo sinti e satisfakshon di a yuda otro hende. Beibel ta ekspresá e idea ei asin’akí:

•  “Tin mas felisidat den duna ku den risibí.”​—Echonan 20:35.

•  “Ora bo pone un bankete, invitá hende pober, hende desabilitá, hende koho i hende siegu, i lo bo ta felis, pasobra nan no tin nada pa hasi algu bèk pa bo.”​—Lúkas 14:13, 14.

 Hóben ku ta pensa riba otro hende

 Tin hopi hóben ku gusta yuda otro hende. Wak e ehèmpel di Casey i Holly.

 “Tin biaha, e úniko kos ku mi tin gana di hasi ta sinta wak televishon. Pero mi ta pensa riba mi tata ku mi mama. Nan ta bin kas morto kansá for di trabou i ainda tin tayó pa laba i kas pa limpia. E ora ei, mi ta disidí di lanta i hasi e kosnan ei pa nan. Tambe mi ta traha un kanika di kòfi, pasobra mi tata ku mi mama gusta kòfi. Mi ta sinti mi masha felis ora mi mira kon kontentu nan ta bira ora nan yega kas i mi mama bisa: ‘O, kas ta limpi i na òrdu! Anto esta dushi e kòfi ei ta hole! Masha danki, Dushi!’”​—Casey.

 “Mi mayornan semper a duna mi tur loke mi tabatin mester. P’esei, aña pasá ora ku nos outo a daña mi a duna nan e sèn pa drech’é, aunke esei tabata un parti grandi di loke mi tabatin di spar. Klaru ku na promé instante, nan no tabata kier a tuma e sèn, pero mi a para ariba pa nan laga mi paga pa drecha e outo. Mi mayornan meresé hopi mas ku esei. I mi a sinti mi hopi bon ku mi por a yuda nan ku algu.”​—Holly.

 Bo tabata sa? Hopi hóben ku ta Testigu di Yehova ta gusta yuda hende dor di papia ku nan tokante. Tin di nan ku asta a bai biba na otro pais ku tin mester di mas hende pa prediká tokante Beibel.

 “Mi a sali for di Merka i bai biba na México pa duna mas hende lès di Beibel. Tin biaha, mi tin gana di ta mas generoso/di por duna hende sèn òf regalo, pero mi no tin masha hopi sèn. Pero mi a ripará ku ora mi usa mi tempu i mi energia pa siña hende tokante Beibel, nan ta apresiá esei mas ku si mi yuda nan ku kos material.”​—Evan.

 Kon mi por yuda otro hende?

 Lo bo ke sa kon dushi ta pa yuda otro hende? At’akí algun kos ku bo por hasi.

 Na kas:

•  Bari kas, laba tayó òf limpia un kamber, sin ku un hende tin ku pidi bo

•  Kushiná un kuminda

•  Skirbi un karchi pa bo mayornan pa yama nan danki

•  Yuda bo ruman ku su hùiswèrk

 Pafó di kas:

•  Manda un karchi pa un hende ku ta malu

•  Limpia kurá di un bisiña di edat avansá

•  Bishitá un hende ku no por sali for di kas

•  Kumpra un regalo pa un hende ku ta pasando den momento difísil

 Sugerensia: Purba di pensa riba algun otro kos ku bo por hasi pa yuda otro hende. Anto pone komo meta pa yuda un persona e siman akí. Lo bo mira kon bon bo ta sinti bo!

 “Ora bo yuda otro hende, bo ta sinti bo felis, pasobra bo ta sinti ku bo ta útil i ku hende ta apresiá lo bo ta hasi. Podisé asta bo a disfrutá di loke bo a hasi, aunke na promé instante bo a pensa ku lo bo no gusta. Hopi biaha, bo no ta sinti ku ta un sakrifisio bo a hasi, pasobra al final bo a gana hopi mas di loke bo a duna.”​—Alana.