Bai na kontenido

Mi Mester Stòp di Bai Skol?

Mi Mester Stòp di Bai Skol?

Ata algun kos pa bo tene kuenta kuné

Te ku kuantu aña bo ta kai bou di e lei di enseñansa obligatorio? Bo a yega e edat ei kaba? Si bo stòp di bai skol promé ku ora, bo ta pasa por haltu di e konseho di Beibel pa “ta sumiso na outoridatnan superior.”—Romanonan 13:1.

Bo a haña sufisiente formashon ? Kiko bo ke logra ku loke bo a siña na skol? Si ainda bo no sa, ta importante pa bo averiguá esei. Sino lo bo ta manera un pasahero ku ta subi un trein pero ku no sa unda e ke bai. Pues, sinta ku bo mayornan i konsiderá e preguntanan den e sekshon mas abou titulá “ Mi Metanan di Estudio.” No ta sabí pa bo stòp di bai skol promé ku bo logra e metanan di estudio ku abo i bo mayornan a pone.

Si bo stòp di bai skol promé ku ora, ta komo si fuera bo ta bula for di un trein promé ku bo yega bo destinashon

Dikon bo ke stòp di bai skol? Kisas ta pa motibu ku bo ke traha pa yuda bo famia finansieramente òf pa hasi trabou boluntario. Òf kisas bo tin motibunan egoista, manera por ehèmpel pa bo no tin nodi di traha eksamen ni hùiswèrk. Bo tin ku saka afó si bo motibu prinsipal pa stòp di bai skol ta pa un bon kousa òf pa motibunan egoista. Si ta djis pa bo skapa di problema, lo bo keda desepshoná.

Stòp di bai skol ta manera bula for di un trein promé ku bo yega bo destinashon. Kisas e biahe den trein ta inkómodo i e pasaheronan no ta amigabel, pero si bo bula for di e trein, sigur lo bo no yega bo destinashon i lo bo sufri daño serio. Pues, asina tambe, si bo stòp di bai skol, lo ta mas difísil pa bo haña trabou. I si bo haña un mes, probablemente lo bo gana ménos plaka ku si bo a kaba bo skol.

Pues, en bes di stòp di bai skol, tene pasenshi i solushoná e problemanan ku bo ta hañá bo kuné na skol. Si bo hasi esei, lo bo desaroyá perseveransia i lo bo ta mihó prepará pa enfrentá problemanan similar ora bo kuminsá traha.

 Mi Metanan di Estudio

Bo estudio mester prepará bo pa haña un trabou ku lo yuda bo kuida bo mes i, kisas den futuro, bo mes famia. (2 Tesalonisensenan 3:10, 12) Bo sa kaba ki tipo di trabou bo ke i kon bo estudio por yuda bo haña e trabou ei? Aki bou tin algun pregunta ku lo yuda bo mira si bo estudio ta prepará bo pa logra bo meta.

  • Kiko ta mi puntonan fuerte? (Por ehèmpel, bo ta anda bon ku hende? Bo gusta traha ku bo mannan òf drecha kos? Bo ta kreativo? Bo ta bon den analisá kos i solushoná problema?)

  • Ki trabou lo laga mi usa mi puntonan fuerte?

  • Ki tipo di trabou tin kaminda mi ta biba?

  • Kua di e lèsnan ku mi ta siguiendo aworakí lo prepará mi pa haña un bon trabou?

  • Kiko mas mi por studia pa logra mi metanan?

Kòrda ku bo meta ta pa haña un diploma ku bo por hasi algu kuné den futuro. Pues, tene kuidou pa bo no bai na e otro ekstremo i bira un ‘eterno studiante,’ esta, un hende ku ta keda “riba e trein” djis p’e no tin ku dil ku e responsabilidatnan di adulto.