Bai na kontenido

LOKE HÓBENNAN SA PUNTRA

Spiritismo Ta Algu Malu?

Spiritismo Ta Algu Malu?

Kiko abo ta pensa?

  • Tin algu malu den horoskop, Ouija board òf médiùm spiritista?

  • E relatonan di spiritismo ta simplemente un kuenta, un bataya simbóliko entre bon i malu òf tin algu mas su tras?

Den e artíkulo akí, nos lo analisá dikon spiritismo ta asina popular i dikon nos mester tene kuidou kuné.

 Kiko ta hasi spiritismo asina atraktivo?

Industria di entretenimentu ta gana hopi plaka ku tema tokante spiritismo. Nan ta hasi spiritismo un parti importante di pelíkula, programa di televishon, wega di vidio i buki. Komo resultado, hopi hóben ta bira mas i mas interesá den astrologia, demonismo, vampiro i bruheria. Dikon?

  • Pasobra nan ta kurioso pa haña sa si angel òf demoño ta eksistí

  • Pasobra nan ta preokupá tokante kiko lo pasa den futuro

  • Pasobra nan ke komuniká ku hende ku a muri

E motibunan akí no nesesariamente ta malu. Por ehèmpel, ta natural ku bo ta preokupá tokante futuro òf ta sinti falta di un ser kerí ku a muri. Pero mete ku spiritismo ta peligroso.

 Dikon nos mester tene kuidou ku spiritismo?

Beibel ta duna spièrtamentu firme tokante spiritismo.

Por ehèmpel, Beibel ta bisa:

Entre boso no mag wòrdu hañá ningun hende ku ta hasi su yu hòmber òf su yu muhé pasa dor di kandela, ni ningun hende ku ta praktiká adivinashon òf ku ta praktiká bruheria, òf ku ta pronostiká, òf ku ta praktiká magia, ni ningun hende ku ta plega hende, òf ku ta montadó òf spiritista, òf ku ta konsultá ku e mortonan. Pasobra ken ku hasi e kosnan aki ta un abominashon na SEÑOR.”​— Deuteronomio 18:10-​12

Dikon Beibel ta kondená spiritismo asina fuertemente?

  • Spiritismo ta promové kooperashon ku demoño. Beibel ta siña ku algun angel a rebeldiá kontra Dios i a bira su enemigu. (Génesis 6:2; Hudas 6) E angelnan malbado akí, ku yama demoño, ta usa médiùm spiritista, miradó di destino, hende ku ta praktiká adivinashon i astrologia pa gaña hende. Si nos ta partisipá den e kosnan akí, nos ta bira amigu di e enemigunan di Dios.

  • Spiritismo ta promové e siñansa falsu ku algun persona por pronostiká futuro. Sinembargo, ta solamente Dios por bisa: Ami “ta deklará e fin for di prinsipio, i for di tempunan antiguo, kosnan ku no a wòrdu hasí ainda.”​—Isaías 46:10; Santiago 4:13, 14.

  • Spiritismo ta promové e siñansa falsu ku hende morto por komuniká ku hende bibu. Sinembargo, Beibel ta bisa: “Pasobra e bibunan sa ku nan lo muri, ma e mortonan no sa nada, ni nan no tin rekompensa mas, pasobra ningun hende no ta kòrda mas riba nan.”​—Eklesiástes 9:​5, 10

 Pa e motibunan ei, Testigunan di Yehova ta evitá tur praktiká ku tin di haber ku spiritismo. Ademas, nan ta evitá tur entretenimentu ku ta inkluí zumbi, vampiro i otro kos sobrenatural. Un hóben ku yama Maria a bisa: “Si tin kos di spiritismo aden mi no ta wak e.” *

Meskos ku un kriminal ta purba di laga bo kere ku ta un otro hende e ta, asina e demoñonan ta pretendé di ta bo sernan kerí ku a fayesé

Loke bo por hasi

  • Sea determiná pa “mantené un konsenshi limpi” dilanti di Yehova segun ku bo ta evitá tur práktika òf entretenimentu ku ta kontené spiritismo.​—Echonan 24:16.

  • Deshasí di tur loke bo tin ku ta konektá ku spiritismo. Lesa Echonan 19:19, 20 i trata e bon ehèmpel ku e kristiannan di promé siglo a pone.

 Kòrda: Ora bo evitá práktika òf entretenimentu ku ta kontené spiritismo, bo ta skohe pa Yehova su banda. Esei lo hasi Yehova su kurason kontentu!​—Proverbionan 27:11

^ par. 25 Esaki no ta nifiká ku tur kuenta di fantasia ta promové spiritismo. Pues, un kristian mester usa su konsenshi bíblikamente entrená pa evitá kualke práktika òf entretenimentu ku ta kontené spiritismo.​—2 Korintionan 6:​17; Hebreonan 5:​14