Bai na kontenido

Kon Mi Por Haña Mihó Punto na Skol?

Kon Mi Por Haña Mihó Punto na Skol?

Loke bo por hasi

Pensa positivo! Si bo ta pensa ku bo no tin e kapasidat pa drecha bo puntonan, lo bo no logra nada. Kada biaha ku bo haña un pensamentu negativo, hasi esfuerso pa kambi’é pa un pensamentu positivo. Por ehèmpel, ora ku algun hende, kisas sin un motibu bálido, a kritiká e manera di papia di apòstel Pablo, el a bisa nan: “Ma asta si mi no ta muchu ábil den mi forma di papia, un kos ta sigur: konosementu sí mi tin.” (2 Korintionan 10:10; 11:6) Pablo tabata sa kiko tabata su puntonan débil, pero tambe su puntonan fuerte. Kiko di abo? Bo sa kiko ta bo puntonan fuerte? Si bo ta pensa ku bo no tin, bo por puntra un persona adulto di konfiansa. Lo e por bisa bo kua ta bo puntonan fuerte i kon pa usa nan di e mihó manera.

Meskos ku ora bo ta hisa peso bo ta haña mas múskulo, asina tambe bon kustumber di siña ta yuda bo haña mihó punto na skol.

Desaroyá bon kustumber di siña. Bo no por haña bon punto si bo no traha duru. Tardi òf trempan, bo tin ku siña bo lèsnan. Kisas bo no gusta tende e palabra “siña” ei mes. Pero siñamentu ta bon pa bo. I si bo hasi bo bèst, bo por asta kuminsá gust’é. Pero pa bo desaroyá bon kustumber di siña, bo mester plania bo tempu bon. Kòrda, ku bo lèsnan mester tin prioridat. Ta bèrdat ku Beibel ta bisa ku tin “un tempu pa hari” i “un tempu pa baila.” (Eklesiástes 3:1, 4; 11:9) I meskos ku kualke hóben, bo tambe lo ke tin tempu pa dibertí. Pero Eklesiástes 11:4 ta spièrta: “Esun ku opservá bientu no ta sembra, i esun ku opservá e nubianan no ta kosechá.” Kiko esei ke men? Wèl, no laga kosnan importante pa despues, pasobra lo bo no kaba ku nan na tempu. Pues, siña promé, i dibertí despues. I no preokupá, lo bo haña tempu pa hasi tur dos!