Bai na kontenido

Kon Mi Por Dil ku e Divorsio di Mi Mayornan?

Kon Mi Por Dil ku e Divorsio di Mi Mayornan?

Loke bo por hasi

Papia tokante loke ta preokupá bo. Laga bo mayornan sa kon tristu i konfundí bo ta sinti bo. Kisas nan por splika bo kiko ta pasando, ya asina bo por sinti bo mas trankil.

Si bo mayornan no por duna bo e yudansa ku bo tin mester, buska un persona maduro i di konfiansa i kont’é den kiko bo ta pasando.—Proverbionan 17:17.

I mas importante ainda, bo por papia ku bo Tata den shelu, kende ta Esun ku ta “skucha orashon.” (Salmo 65:2) Habri bo kurason i kont’é tur kos, pasobra ‘e ta interesá den bo.’—1 Pedro 5:7.

Loke bo no mester hasi

E divorsio di bo mayornan por kousa hopi doló, pero meskos ku un brasa kibrá, ku tempu e ta kura.

No keda ku rabia riba bo mayornan. Daniel, kende su mayornan a separá ora e tabatin shete aña, a bisa: “Mi mayornan tabata egoista. Nan no a pensa mes riba nos ni kon loke nan a hasi lo a afektá nos.”

Si Daniel keda rabiá i ku renkor, ki konsekuensianan esei lo por tin p’e?—Tep: Lesa Proverbionan 29:22.

Dikon bo ta kere ku lo ta bon pa Daniel purba di pordoná su mayornan pa e doló ku nan a kous’é?—Tep: Lesa Efesionan 4:31, 32.

No komportá bo mes malu djis pa tormentá bo mayornan. Denny a konta: “Despues ku mi mayornan a divorsiá, m’a keda tur tristu i deprimí. M’a kuminsá hañá mi ku problema na skol i m’a keda sinta. Despues di esei, m’a bira e payaso di klas. Anto mi tabata kana bringa ku tur hende.”

Dikon bo ta kere Denny a bira e payaso di klas i tabata bringa hopi?

Kon e prinsipio na Galationan 6:7 por yuda hende manera Denny evitá komportashon ku ta hasi daño na nan mes?

Doló emoshonal ta un herida ku ta tarda pa kura. Pero ora kosnan kalma i bo bida haña su rutina bèk, lo bo kuminsá sinti bo mihó atrobe.