Bai na kontenido

LOKE HÓBENNAN SA PUNTRA

Ta Importá ki Muzik Mi Ta Skucha?

Ta Importá ki Muzik Mi Ta Skucha?

“Ora mi ta prepará pa sali mainta, mi ta skucha muzik. Ora mi drenta outo, mi ta skucha muzik. Ora mi ta na kas ta rilèks, limpia kas i asta ora ku mi ta lesa un kos, mi ta skucha muzik. Henter dia mi ta skucha muzik.​—Carla.

Bo tambe ta gusta muzik tantu asina? Si ta asina, e artíkulo akí lo yuda bo disfrutá di e benefisionan, evitá e peligernan i ser selektivo ora di skohe muzik.

 E benefisionan

Por kompará skucha muzik ku kome kuminda. Den tur dos kaso, e tipo i tambe e kantidat korekto por ta bon pa bo. Por ehèmpel:

  • Muzik por drecha bo beis.

    “Si mi tin mal beis, mi ta pone mi kantika faborito i kasi mesora mi ta sinti mi mihó.”​—Mark.

  • Muzik por hiba bo bek den tempu.

    “Hopi biaha, ora mi tende un kantika, e ta laga mi kòrda algu ku mi gusta, anto mi ta sinti mi masha kontentu kada biaha ku mi skuch’é.”​—Sheila.

  • Muzik por krea un laso fuerte di union.

    “Mi tabata na un kongreso internashonal di Testigunan di Yehova, i ora tur bishitante tabata kanta e último kantika, mi wowo a yena ku awa. Nos a kanta den diferente idioma pero e muzik a uni nos.”​—Tammy.

  • Muzik por yuda bo kultivá kualidatnan balioso.

    “Ora bo ta siña toka un instrumènt, e ta yuda bo kultivá disiplina i pasenshi. No ta algu ku bo por dominá lihé. E úniko manera ku bo por bira mihó ta ora bo praktiká.”​—Anna.

Bo tabata sa? E buki di mas grandi di Beibel​—Salmonan​—ta konsistí di mas ku 150 kantika.

Bo mester ta mesun selektivo ku muzik ku bo ta ku kuminda

 E peligernan

Algun tipo di muzik, meskos ku kuminda kontaminá, por ta venenoso. Wak dikon.

  • Hopi kantika ta kontené letra tokante sèks den un forma abierto.

    “Ta parse ku tur kantika popular ta bai tokante sèks. Nan no ta ni purba di tap’é mas.”​—Hanna.

    Beibel ta bisa: “No menshoná fornikashon ni ningun sorto di impuresa ni golosidat mes meimei di boso.” (Efesionan 5:3) Puntra bo mes: ‘E muzik ku mi ta skucha ta stroba mi di sigui e spièrtamentu akí?’

  • Algun muzik por hasi bo tristu.

    “Tin bes mi ta keda lantá anochi pa skucha muzik ku ta laga mi pensa riba kosnan ku ta deprimí mi i dominá mi. Muzik tristu por hinka mal pensamentu den mi kabes.”​—Tammy.

    Beibel ta bisa: “Warda bo kurason riba tur kos.” (Proverbionan 4:23) Puntra bo mes: ‘E muzik ku mi ta skucha ta pone mi pensa riba kos negativo so?’

  • Algun muzik por pone bo rabia.

    “Muzik yen di odio i rabia ta un peliger indirekto pa mi. Mi a ripará kon mi beis tabata kambia despues ku mi a skucha e tipo di muzik ei. Mi famia tambe a ripará.”​—John.

    Beibel ta bisa: “Pone tur e kosnan akí leu for di boso: rabia, furia, maldat, papiamentu di kos ofensivo; i palabra malu no mester sali for di boso boka.” (Kolosensenan 3:8) Puntra bo mes: ‘E muzik ku mi ta skucha ta hasi mi agresivo òf asta sin heful pa ku otro hende?’

Konklushon: ser selektivo. Esei ta loke un hóben ku yama Julie ta purba di hasi. El a bisa: “Ratu ratu mi ta pasa den e kantikanan ku mi tin wardá i mi ta delete tur loke mi ta mira ku tòg ta inapropiá. No ta tur bes ta fásil, pero mi sa ku esei ta e mihó kos pa hasi.”

Un otro hóben ku yama Tara ta bisa algu similar. El a bisa: “Tin bes un kantika ku un bon beat ta kuminsá toka na radio, pero ora mi skucha e letra, mi ta realisá ku mi tin ku kambia e emisora. Ta komo si fuera mi ta stòp di kome un bolo masha dushi mes despues ku mi a dal djis un pida di dje! Pero si mi por rechasá un kantika tokante sèks, lo ta mas fásil tambe pa mi evitá di tene relashon seksual promé ku matrimonio. Mi no ke balotá e efekto ku muzik por tin riba mi.”