Bai na kontenido

Kiko Mi Por Hasi pa Mi Bai Bon ku Mi Dosente?

Kiko Mi Por Hasi pa Mi Bai Bon ku Mi Dosente?

Loke bo por hasi

Wak kiko a pasa ku Rachel. Rachel semper tabata haña punto haltu riba su rapòrt. Pero ora el a bai skol sekundario, kos a kambia. El a bisa: “Mi a haña un dosente ku tabata hasi tur kos pa mi haña mal punto den su lès.” Kiko tabata e problema? E dosente a laga Rachel i su mama komprondé bon kla ku e no tabata gusta nan religion.

Dosentenan por yuda bo bira sabí, pero bo tambe tin ku hasi bo bèst

Kiko Rachel a hasi? Rachel a bisa: “Kada biaha ku tabata bisto ku e dosente a duna mi mal punto debí na su prehuisio, ami ku mi mama tabata bai papia kuné. Ku tempu el a kansa i a laga mi na pas.”

Si bo ta den un situashon asina, bo mester tuma un kurashi i papia ku bo mayornan tokante e situashon. Sin duda, nan lo ke papia ku e dosente i kisas asta ku e direktiva di skol pa yega na un solushon.

Nos mester aseptá sí ku no ta tur problema tin solushon. Tin biaha, no tin moda di hasi i bo mester sigui wanta. (Romanonan 12:17, 18) Tanya a konta: “Un di mi dosentenan tabata trata nos komo alumno masha malu. E tabata insultá nos i yama nos bobo. Na prinsipio, mi tabata yora, pero despues mi a siña pa no tuma su insultonan komo algu personal. Mi tabata konsentrá riba siña mi lèsnan i tabata paga bon tinu den su klas. Komo resultado, kasi e no tabata molestiá mi, i ami tabata un di e poko studiantenan ku tabata haña bon punto. Despues di dos aña, nan a kita e dosente ei for di trabou.”

Konklushon: Si bo siña kon pa anda ku un dosente difísil, bo ta siña un lès importante di bida ku lo bo por hasi bon uso di dje despues, foral ora bo bai traha i haña bo ku un hefe fèrfelu. (1 Pedro 2:18) Ademas, ora bo haña un bon dosente, lo bo sa di balor’é.