Hopi pareha ta biba huntu promé ku nan kasa. Tin di nan ta hasié pasobra nan ke wak si nan ta pas ku otro i pasobra nan ta pensa ku asina tin mas chèns ku nan lo tin un matrimonio felis. Pero, esei ta un bon idea?

Den e artíkulo akí nos lo kontestá e siguiente preguntanan:

•  Kiko Beibel ta bisa?

•  Biba huntu ta un bon manera pa prepará pa matrimonio?

•  Biba huntu lo yuda nos spar sèn?

•  Nos mester biba huntu promé, pa mi no kasa ku e persona robes?

•  Tin un mihó opshon?

 Kiko Beibel ta bisa?

•   Beibel ta bisa ku tenementu di relashon seksual sin ku bo ta kasá ta robes. Por ehèmpel, e ta bisa: “Boso mester apstené di inmoralidat seksual.” (1 Tesalonisensenan 4:3; 1 Korintionan 6:18) Esei ta inkluí relashon seksual entre un pareha ku ta biba huntu, aunke nan tin intenshon di kasa mas despues. a Ora un pareha ta sigui e normanan di Beibel, esei ta protehá nan kontra e mal konsekuensianan di biba huntu sin ta kasá, manera por ehèmpel, salimentu na estado sin ta kasá.

•   Ta Yehova Dios a bini ku e areglo di matrimonio. Na e okashon ei, el a bisa: “Un hòmber lo bai laga su tata i su mama, i lo e uni ku su esposa, i nan lo bira un karni.” (Génesis 2:24) Ora un hòmber i un muhé ta determiná pa keda uní komo esposo i esposa, tin hopi chèns ku nan lo tin un bida di famia felis i stabil.

 Biba huntu ta un bon manera pa prepará pa matrimonio?

 Tin hende ta bisa ku sí. Nan ta pensa ku pa siña konosé otro bon, nan tin ku hasi trabou di kas huntu i wak kon e otro persona ta komportá su mes den bida di tur dia. Pero pa un matrimonio felis, e pareha mester tin e sintimentu di kompromiso, es desir, nan mester ta determiná pa keda uní komo esposo i esposa.

 Kon un pareha por siña keda uní den bon i den malu? Nan no ta logra esei bibando huntu sin kasa komo si fuera nan ta den un tipo di “periodo di prueba” ku kualke momento nan por pone un fin na dje. Mas bien, un relashon ta bira fuerte ora tur dos persona tin un kompromiso ku otro, i nan ta traha huntu pa resolvé problema ku por presentá.

 Konklushon: Bon mirá, en bes di prepará pa matrimonio, un pareha ku bai biba huntu sin ta kasá ta prepará nan mes pa separá.

 Prinsipio di Beibel: “Loke un hende sembra, ta esei lo e kosechá.”—Galationan 6:7.

 Biba huntu lo yuda nos spar sèn?

 Tin hende ta bisa ku sí. Un enkuesta na Merka, di Pew Research Center, a saka afó ku rònt di 4 di kada 10 adulto ku bai biba huntu sin ta kasá ta hasi esei pa spar sèn. Sinembargo, hopi hende ku a partisipá den e enkuesta ei, i ku tabatin un tempu ta biba huntu kaba, a bisa ku un di motibunan prinsipal ku nan no tabata kla pa kasa ta pasobra nan no tabatin sufisiente plaka.

 Foral pa hende muhé, bibamentu huntu sin ta kasá por tin mas konsekuensia. Por ehèmpel, ora e pareha separá, kasi semper ta e hende muhé ta esun ku ta keda ku e responsabilidat di kria e yunan ku e pareha a haña huntu.

 Konklushon: E mal konsekuensianan di biba huntu promé ku kasa ta hopi mas tantu ku e supuesto benefisionan.

 Prinsipio di Beibel: “Ami, Yehova, ta bo Dios, kende ta siña bo pa bo mes bon.”—Isaías 48:17.

 Nos mester biba huntu promé, pa mi no kasa ku e persona robes?

 Tin hende ta bisa ku sí. Sinembargo, “hende ku ta biba huntu promé ku nan kasa hopi biaha no ta realisá ku ta bira mas difísil pa nan kibra e relashon.” Esei ta loke e buki Fighting for Your Marriage (Lucha pa salba bo matrimonio) ta bisa. Dikon esei ta bira mas difísil? Tin pareha ta deskubrí ku nan no ta pas ku otro. Pero ora esei sosodé, ya nan ta kompartí sierto responsabilidatnan, manera por ehèmpel, kuido di un bestia di kas, pago di hür òf nan ta spera un bebi ku nan no a plania p’e. Algun investigadó a nota ku e parehanan ei ta keda huntu djis pasobra nan a kustumbrá di biba huntu i nan no ta hasi un kambio ku lo kumbiní nan mas.” b P’esei, segun e buki Fighting for Your Marriage: “Algun hende ku den otro situashon lo a kibra nan relashon promé ku nan kasa, al final tòg ta kasa ku otro djis pasobra ta mas fásil pa nan keda huntu.”

 Konklushon: Hopi biaha, biba huntu sin kasa no ta yuda bo tuma un bon desishon. Mas bien, e ta hasié mas difísil pa pone fin na un relashon ku no ta funshoná.

 Prinsipio di Beibel: “Un hende sabí ta mira peliger, i e ta evit’é, pero un hende imprudente no ta evitá peliger, i e ta sufri konsekuensia.”—Proverbionan 22:3.

 Tin un mihó opshon?

 Kon bo por evitá e riesgonan di biba huntu i oumentá bo chèns di tin un matrimonio felis? Esei ta si bo hasi loke Beibel ta bisa tokante matrimonio. Tuma bo tempu pa siña konosé e persona bon promé ku boso kasa i bai biba huntu komo pareha. Ora bo ta skohe un kasá, no laga atrakshon seksual ta e kos di mas importante. Loke ta mas importante ta pa boso tin e mesun norma- i balornan i e mesun kreensianan.

 Den Beibel, bo ta haña hopi konseho i prinsipio ku por yuda bo tin un matrimonio felis i stabil. c Por ehèmpel, nan por yuda bo . . .

•   ser fiel na bo kasá

•   kultivá e kualidatnan ku lo hasi bo un bon esposo òf un bon esposa

•   rekonosé e señalnan durante namoramentu ku ta indiká ku un persona no ta esun korekto pa bo

 Pa haña sa mas tokante e temanan akí, bai na e sekshon “Matrimonio i Famia” riba jw.org/pap.

 Prinsipio di Beibel: “Tur loke tin den Skritura a ser skirbí ku yudansa di Dios su spiritu santu.”—2 Timoteo 3:16.