E kontesta ku Beibel ta duna

Beibel ta deskribí suseso i situashon ku lo identifiká e temporada nèt promé ku e “konklushon di e era [aktual],” loke algun tradukshon di Beibel ta referí na dje komo “e fin di tempu.” (Mateo 24:3; Beibel Santu) Beibel ta yama e tempu akí “e último dianan” i “e tempu stipulá di e fin.” (2 Timoteo 3:1; Daniel 8:​19, Beibel Santu) E siguiente profesianan ta algun di e karakterístikanan prinsipal di e último dianan:

  • Guera na gran eskala.​—Mateo 24:7; Revelashon 6:4.

  • Skarsedat di kuminda.​—Mateo 24:7; Revelashon 6:​5, 6.

  • Temblor grandi.​—Lukas 21:11.

  • Pèst, esta pestilensia.​—Lukas 21:11.

  • Oumento di maldat.​—Mateo 24:12.

  • Hende ku ta kaba ku planeta tera.​—Revelashon 11:18.

  • Aktitut di hende ku ta bai di malu pa pió. Hopi ta ‘malagradesí, desleal, . . . nan no ta dispuesto pa sera ningun akuerdo, nan ta kalumniadó, sin dominio propio, feros, sin amor pa loke ta bon, traidor, kabesura, hinchá di orguyo.’​—2 Timoteo 3:​1-4.

  • Famia ta kibra. Hende ta “sin kariño” i mucha ta “desobediente na mayornan.”​—2 Timoteo 3:​2, 3.

  • Amor di mayoria di hende ta fria.​—Mateo 24:12.

  • Hipokresia religioso ta bisto tur kaminda.​—2 Timoteo 3:5.

  • Konosementu tokante profesia di Beibel ta oumentá. Esei ta inkluí profesianan ku tin di haber ku e tempu di e fin.​—Daniel 12:4.

  • Mundialmente ta prediká e bon notisia di e Reino.​—Mateo 24:14.

  • Tur kaminda hende ta indiferente i ta hasi chèrchi di e evidensianan ku e fin ta yegando serka.​—Mateo 24:37-​39; 2 Pedro 3:​3, 4.

  • E profesianan akí ta kumpli pareu; no djis un par so òf mayoria.​—Mateo 24:33.

Nos ta bibando den “e último dianan”?

Sí. Tantu situashon mundial komo konteo di tempu a base di Beibel ta mustra ku e último dianan a kuminsá na aña 1914. Na e aña ei, e Reino di Dios a kuminsá reina den shelu. E promé kos ku e Reino a hasi ta saka Satanas e Diabel i su demoñonan for di shelu anto benta nan abou na tera. (Revelashon 12:​7-​12) E aktitut i mal komportashon di hopi hende awe ta mustra kuantu influensia Satanas tin riba humanidat i ku nos ta bibando den “tempunan krítiko, difísil pa trata kuné.”​—2 Timoteo 3:1.