Beibel no ta hasi menshon di Halloween. Pero, un análisis di e orígen di e fiesta akí i kustumber relashoná kuné ta mustra ku e ta estrechamente ligá ku kreensia falsu tokante hende morto, spiritu malbado òf demoño.—Wak “Origen i kustumber di Halloween.”

Beibel ta duna e siguiente atvertensia: “Entre boso no mag wòrdu hañá ningun hende ku ta . . . montadó òf spiritista, òf ku ta konsultá ku e mortonan.” (Deuteronomio 18:10-12, Beibel Santu). Aunke tin hende no ta mira nada malu den Halloween, Beibel sí ta mustra ku e práktikanan relashoná kuné ta malu. Na 1 Korintionan 10:20, 21, Beibel ta bisa: “Mi no kier pa boso tin komunion ku demoño. Boso no por bebe e kopa di Señor i e kopa di demoñonan.”—Beibel Santu.

 Orígen i kustumber di Halloween

1. Samhain: “Pa sa e orígen di Halloween, nos mester bai bèk mas ku 2.000 aña pasá te den tempu ku e pueblo kelta tabata selebrá e fiesta di Samhain,” segun The World Book Encyclopedia. “Segun e kreensia di e keltanan, durante Samhain spiritu di e mortonan por a kana meimei di e bibunan, i hende bibu por a bishitá e mortonan.” Sinembargo, Beibel ta bisa klaramente ku “e mortonan no sa nada.” (Eklesiástes 9:5, Beibel Santu) Pues, e mortonan no por tin kontakto ku hende bibu.

2. Trahe di Halloween, mangel i ‘trick or treat’: Segun e buki Halloween—An American Holiday, An American History, algun di e keltanan tabata bisti trahe straño i spantoso pa laga e mal spiritunan kere ku nan, esta e keltanan akí, tambe ta kriatura sobrenatural pa asina e spiritunan ei laga nan na pas. Otro hende tabata ofresé e spiritunan mangel pa kalma nan. Durante Edat Medio na Europa, klero di iglesia katóliko a adoptá kustumber pagano i tabata laga nan miembronan disfrasá nan mes i kana di kas pa kas pidi hende regalo. Di otro banda, Beibel no ta permití pa hende meskla kustumber religioso falsu ku adorashon di Dios.—2 Korintionan 6:17.

3. Zumbi, vampiro, hòmber lobo i hèks: Esakinan pa hopi tempu kaba ta ligá ku e mundu di mal spiritu. (Halloween Trivia) Beibel ta bisa bon kla ku nos mester lucha kontra e forsanan spiritual di maldat i no gosa huntu ku nan.—Efesionan 6:12.

   4. Lampi trahá di pampuna òf ‘jack-o’-lantern’: Durante Edat Medio na Gran Bretaña, “hende tabatin e kustumber di bai di kas pa kas pa pidi kuminda a kambio di un orashon na fabor di e mortonan.” Nan tabata “karga lampi ku tabata konsistí di kolrabi [koolraap] ku un bela aden ku a representá un alma den purgatorio.” (Halloween—From Pagan Ritual to Party Night) Otro hende ta bisa ku nan tabata usa e lampinan akí pa kore ku mal spiritu. Durante siglo 19 na Merka, hende a kuminsá usa pampuna en bes di kolrabi pasobra tabata fásil pa haña pampuna i pa saka su kontenido afó i hinka bela aden. E kreensianan tras di e kustumber ei, esta, alma inmortal, purgatorio i orashon pa e mortonan, no ta basá riba Beibel.—Ezekiel 18:4.