E kontesta ku Beibel ta duna

Nò, nos no mester hasi esaki. E New Catholic Encyclopedia ta bisa tokante e leinan ku Dios a duna e nashon di Israel: “For di vários pasashi di Beibel ta bisto ku hende ku tabata adorá Dios no tabata usa imágen.” Wak e siguiente versíkulonan di Beibel:

  • “No traha niun imágen di niun dios, den niun forma: ni di loke tin na shelu, ni di loke tin riba tera, ni di loke tin den awa bou di tera. No hinka rudia adorá nan, pasobra Ami, SEÑOR, bo Dios, no ta tolerá ningun otro dios.” (Éksodo 20:4, 5, Beibel na papiamentu koriente) Komo ku Dios “no ta tolerá ningun otro dios,” e no ta aprobá uso di imágen, prenchi, ídolo, estatua òf símbolo pa ador’é.

  • “Lo mi no duna mi gloria na un otro, ni mi alabansa na imágennan grabá.” (Isaías 42:8, Beibel Santu) Dios no ta aseptá pa hende ador’é pa medio di imágen. Ora algun israelita a purba di adorá Dios usando un bisé di oro, Dios a bisa: “Nan ta un pueblo kabesura.”—Éksodo 32:7-9, Beibel Santu.

  • “Nos no mester kere ku e Ser Divino ta manera un kos di oro, plata òf piedra, esta, kos ku arte i imaginashon di hende a produsí.” (Echonan 17:29) Pues, en bes di adorá imágen ku “imaginashon di hende a produsí” manera ta e kustumber den paganismo, kristiannan tin ku “kana pa medio di fe, no pa medio di bista.”—2 Korintionan 5:7

  • “Warda boso di ídolonan.” (1 Huan 5:21, Beibel Santu) Beibel ta mustra bon kla ku Dios a instruí tantu e nashon di Israel komo e kristiannan pa no usa imágen den adorashon na dje. Pues, e siñansa di ku hende mester usa imágen pa adorá Dios ta falsu.