E kontesta ku Beibel ta duna

Kain, e yu mayó di e promé pareha humano, a kasa ku un di su rumannan muhé òf ku un otro famia djaserka. Nos por saka e konklushon akí ora nos lesa loke Beibel ta bisa tokante Kain i su famia.

Loke nos sa tokante Kain i su famia

  • Tur ser humano ta desendiente di Adam ku Eva. Beibel ta bisa: “For di ún hende [Adam] Dios a traha tur nashon, pa nan biba riba henter e superfisie di tera.” (Echonan 17:26) Eva, esposa di Adam, a bira “mama di tur ser bibu.” (Génesis 3:20, Beibel Santu) P’esei, Kain mester a kasa ku un otro desendiente di Adam ku Eva.

  • Kain i su ruman hòmber Abel tabata e promé di e hopi yunan ku Eva a haña. (Génesis 4:1, 2) Ora Kain a mata su ruman i Yehova a kore kuné, Kain a bisa: “Lo sosodé ku ken ku haña mi, lo mata mi.” (Génesis 4:10-14, Beibel Santu) Miedu di ken Kain tabatin? Beibel ta bisa ku Adam tabatin mas yu, tantu hòmber komo muhé. (Génesis 5:4) Evidentemente, e otro desendientenan akí di Adam ku Eva por tabata un menasa pa Kain.

  • Na prinsipio di historia humano, no tabata straño pa famianan kasa ku otro. Por ehèmpel, e hòmber fiel Abraham a kasa ku su mitar ruman. (Génesis 20:12) E promé biaha ku a prohibí matrimonio asina tabata den e Lei di Moises, ku a ser establesé siglonan despues ku Kain a muri. (Levítiko 18:9, 12, 13) Ta parse ku den e tempu ei, yunan ku a nase di un matrimonio ku ta konsistí di dos miembro di e mesun famia no tabatin e rísiko pa nase ku defekto manera awe.

  • Beibel ta presentá e relato di Adam ku Eva i nan famia komo historia eksakto. Tantu den e buki di Génesis, ku Moises a skirbi, komo e relatonan di historia di Èsdras i Lukas tin genealogia detayá ku ta yega na Adam. (Génesis 5:3-5; 1 Krónikanan 1:1-4; Lukas 3:38) Eskritornan di Beibel ta menshoná e relato di Kain komo algu ku di bèrdat a sosodé.​—Hebreonan 11:4; 1 Huan 3:12; Hudas 11.