E kontesta ku Beibel ta duna

Hopi hende ku a hera di muri a bisa ku nan a sinti ku nan a ser separá for di nan kurpa, a mira un lus briante òf un lugá masha bunita. ‘Pa algun hende, e eksperensia ei a duna nan e privilegio di mira un otro esfera di eksistensia,’ segun e buki Recollections of Death. Maske Beibel no ta menshoná eksperensia di hende ku a hera di muri, e ta kontené un bèrdat fundamental ku ta mustra ku e eksperensianan ei sigur no ta vishon di un bida despues di morto.

E mortonan no sa di nada.

Beibel ta bisa ku e mortonan “no sa nada.” (Eklesiástes 9:5, Beibel Santu) Ora nos muri, nos no ta pasa pa un otro tipo di eksistensia òf dimenshon, sino simplemente nos ta stòp di eksistí. E siñansa ku nos tin un alma inmortal ku ta bandoná e kurpa despues di nos morto i sigui biba no ta den Beibel. (Ezekiel 18:4) P’esei, kualke eksperensia ku un hende ku a hera di muri tabatin no por ta un bista adelantá di shelu, fièrnu òf un bida despues di morto.

Lázaro a papia di un bida despues di morto?

Beibel ta deskribí loke a pasa ku Lázaro despues ku e sí a muri: Hesus a lant’é for di morto despues ku e tabatin kuater dia morto. (Huan 11:38-44) Si Lázaro tabatin un dushi bida despues di morto, lo tabatin sentido pa Hesus tres’é bèk den e mundu akí? Beibel no ta bisa nada di esei. Es mas, si Lázaro a biba un otro kaminda despues di morto, kasi sigur lo el a papia tokante esei, no ta bèrdat? Loke nos por bisa sí ta ku Hesus a kompará e morto di Lázaro ku un soño, lokual ta indiká ku Lázaro no tabata konsiente di nada ora e tabata morto.—Huan 11:11-14.