Hopi hende ku a pèrdè nan sernan kerí ta hasi e preguntanan ei pa nan haña no solamente kontesta, sino tambe konsuelo. Otronan ta konsiderá e Holokousto komo un di e kosnan di mas horibel ku por a pasa humanidat, i p’esei nan tin hopi problema pa kere den Dios.

Ideanan robes enkuanto Dios i e Holokousto

Mito: No ta bon pa puntra pakiko Dios a permití Holokousto.

Echo: Hende ku tin hopi fe a yega di puntra pakiko Dios ta permití maldat. Por ehèmpel, profeta Habakuk a puntra Dios: “Pakiko pasa tur e mizeria aki? Kon Abo mes ta tolerá e inhustisia ei? Unda ku mi bira, destrukshon i violensia mi ta mira, pleitu i desunion.” (Habakuk 1:3, Beibel na papiamentu koriente) En bes di reprendé Habakuk, Dios a laga skirbi e preguntanan ei den Beibel pa tur hende lesa.

Mito: Dios no ta preokupá ku sufrimentu di hende.

Echo: Dios ta odia maldat i e sufrimentu ku esei ta trese kuné. (Proverbionan 6:16-19) Den tempu di Noe Dios “tabata tristu” pa motibu di e violensia ku a plama riba tera. (Génesis 6:5, 6, Beibel Santu) Sin duda, e Holokousto tambe a pone Dios sufri hopi.—Malakías 3:6.

Mito: Dios a usa e Holokousto pa kastigá e hudiunan.

Echo: Dios a laga e romanonan destruí Herúsalèm den promé siglo. (Mateo 23:37–24:2) Sinembargo, for di e tempu ei padilanti, Dios no a faboresé ni kastigá ningun pueblo òf nashon partikular. Den bista di Dios “no tin diferensha entre hudiu i no hudiu.”—Romanonan 10:12, Beibel na papiamentu koriente.

Mito: Si ta eksistí un Dios amoroso i todopoderoso, lo el a prevení e Holokousto.

Echo: Aunke Dios mes no ta kousa sufrimentu, tin biaha e ta permitié pa un tempu.—Santiago 1:13; 5:11.

Dikon Dios a permití e Holokousto tuma lugá?

Dios a permití e Holokousto tuma lugá pa e mesun motibu ku el a permití sufrimentu atraves di historia, esta, pa resolvé sierto kuestion moral ku a surgi den pasado. Beibel ta mustra bon kla ku ta Diabel ta goberná mundu aktualmente i no Dios. (Lukas 4:1, 2, 6; Huan 12:31) Un otro artíkulo ku ta konektá ku esaki ta bai den mas detaye dikon Dios ta permití sufrimentu. Pero e dos siguiente puntonan basá riba Beibel por yuda splika pakiko Dios a permití e Holokousto tuma lugá.

  1. Mal uso di boluntat liber a kousa e Holokousto. Dios a bisa e promé sernan humano, Adam i Eva, kiko el a ferwagt di nan, pero e no a obligá nan pa obedes’é. Nan a disidí pa nan mes loke ta bon i malu, i nan mal eskoho a trese konsekuensianan teribel pa humanidat. Anto for di e tempu ei padilanti, hopi hende a sufri pa motibu di mal desishon ku nan a tuma. (Génesis 2:17; 3:6; Romanonan 5:12) Manera e buki Statement of Principles of Conservative Judaism a bisa: “hopi sufrimentu di hende rònt mundu ta resultado direkto di mal uso di e boluntat liber ku nos a risibí.” En bes di kita hende su boluntat liber, Dios a duna nan tempu pa purba dirigí nan asuntunan na nan mes manera.

  2. Dios por i lo drecha tur e daño ku e Holokousto a kousa. Dios ta primintí pa lanta miónes di hende for di morto, inkluso e víktimanan di Holokousto. Lo e eliminá tambe tur rekuerdo doloroso i horibel ku e sobrebibientenan a keda kuné. (Isaías 65:17; Echonan 24:15) E amor ku Dios tin pa hende ta un garantia ku lo e kumpli ku e promesanan akí.—Huan 3:16.

Hopi víktima i sobrebibiente di e Holokousto por a mantené nan fe i haña un propósito den bida, pasobra nan a komprondé dikon Dios a permití maldat i kon lo e eliminá su efekto.