E kontesta ku Beibel ta duna

Beibel no ta bisa ki dia Hesus a nase ni ku hende mester selebrá e dia di su nasementu. Segun e Cyclopedia di McClintock and Strong, ‘no ta Dios a manda hende selebrá Pasku ni e no ta den TN [Tèstamènt Nobo].’

Un análisis di historia relashoná ku Pasku ta mustra ku su orígen mas bien ta den rito religioso pagano. Beibel ta mustra ku Dios no ta keda niun tiki kontentu si nos purba di ador’é na un manera ku e no ta aprobá.—Éksodo 32:5-7.

Orígen di tradishon relashoná ku Pasku

  1. Selebrashon di Hesus su nasementu: E kristiannan di promé siglo no tabata selebrá [Hesus] su nasementu, pasobra nan tabata konsiderá e fiesta di hasimentu di aña un kustumber pagano.”—The World Book Encyclopedia.

  2. Dia 25 di desèmber: No tin prueba ku Hesus a nase riba e dia ei. E lidernan religioso probablemente a skohe e dia akí, pasobra e tabata kai pareu ku e fiesta pagano ku ya nan tabatin kustumber di selebrá rònt di e asina yamá solstisio di wenter. Esaki ta e dia di aña ku tin ménos klaridat di solo durante di dia.

  3. Dunamentu di regalo, bankete i fiesta: Encyclopedia Americana ta bisa: “Saturnalia, un fiesta romano ku nan tabata selebrá meimei di desèmber, a sirbi komo modelo pa vários tradishon festivo relashoná ku Pasku. Por ehèmpel, ta di e fiesta ei a bini e kustumber di tene bankete na grandi, duna regalo i sende bela.” Ademas, Encyclopædia Britannica ta bisa: “Durante Saturnalia, tur hende tabata haña liber di trabou i no tabatin hasimentu di negoshi.

  4. Lus di Pasku: Segun Encyclopedia of Religion, e famianan na Europa tabata dòrna nan kas “ku lus i tur tipo di mata ku semper ta bèrdè” pa selebrá e solstisio di wenter i pa protehá nan mes kontra mal spiritu.

  5. Maretak i otro mata bèrdè: E druïdenan [un pueblo di Gran Bretaña di ántes] tabata kere ku e mata di maretak tin poder mágiko. Anto pa loke ta e mata di hulst ku semper ta bèrdè, hende tabata ador’é komo un símbolo di renasementu di solo.”—The Encyclopedia Americana.

  6. Palu di Pasku: E adorashon di palu tabata komun pa hende europeo pagano, i nan a sigui ku e tradishon ei ora nan a bira kristian.” Un di e práktikanan derivá di e tipo di adorashon ei ta e kustumber di “pone un palu di Pasku na entrada òf den interior di kas durante e fiesta di wenter.”—Encyclopædia Britannica.