Si bo a disidí ku ta mihó pa boso kibra ku otro, pensa bon ta na unda i ki ora bo ke papia ku e otro persona riba esei.

Kon abo lo ke pa hende trata bo? (Mateo 7:12) Lo bo ke pa un hende kibra ku bo dilanti di otro hende? Klaru ku nò.

A ménos ku e sirkunstansianan no ta permití, ta mihó pa no kibra e relashon via un mensahe, e-mail òf voicemail. Mas bien, skohe un ora i lugá kaminda boso por papia tokante e asuntu serio akí.

Kiko bo tin ku bisa e ora ei? Apòstel Pablo a bisa kristiannan pa “papia bèrdat” ku otro.—Efesionan 4:25.

Ta mihó pa bo usa takto pero na mes momento keda firme. Splika e persona bon kla dikon pa abo e relashon lo no bai bon.

Bo no tin nodi di menshoná henter un lista di kos ku e ta hasi robes òf kritik’é pa delaster un kos. Na lugá di bisa: “Nunka bo no ta hasi esaki” òf “Semper bo ta hasi esaya ,” lo ta mihó pa bo usa ekspreshonnan ku ta splika kon bo ta sinti, manera: “Mi mester di un hende ku . . .” òf “Mi ta sinti ku ta mihó pa nos kibra ku otro pasobra . . .”

Esaki no ta tempu pa duda òf entregá i sigui ku e relashon numa. Kòrda bon, bo a disidí pa kibra e relashon pa un motibu serio. Pues, paga tinu si e persona ta purba di manipulá bo pa bo kambia di pensamentu. Un hóben ku yama Lori a bisa: “Despues ku mi a kibra e relashon, mi èks a kuminsá hasi manera ta mashá deprimí e ta. Mi ta kere el a hasi asina pa mi sinti duele di dje. Mi a sinti mi malu, pero mi no a laga esei kambia mi desishon.” Meskos ku Lori, bo tambe mester sa kiko bo ke i pega na bo desishon. Laga bo nifiká nò.Santiago 5:12.