Loke bo mester sa

  • Un amistat sin problema no ta eksistí. Komo ku bo bon amigu òf kisas asta bo mihó amigu ta imperfekto, e por hasi òf bisa algu ku ta hùrt bo. Pero, kòrda ku bo tambe ta imperfekto. P’esei ser onesto, abo tambe no a yega di hùrt un hende?​—Santiago 3:2.

  • Loke bo ta mira riba Internet por hùrt bo. Por ehèmpel, un hóben ku yama David a bisa: “Si bo subi Internet i mira potrèt di un amigu na un fiesta, kisas bo ta puntra bo mes dikon nan no a invitá bo. Bo por sinti bo traishoná i tristu.”

  • Bo por siña dil ku e problema.

 Loke bo por hasi

Wak bo mes promé. Beibel ta bisa: “No sea lihé den bo kurason pa rabia, pasobra rabia ta biba den pechu di hende bobo.”—Eklesiástes 7:9, Beibel Santu.

“Tin bes ta despues di tempu bo ta realisá ku loke a hasi bo tristu no tabata dje importante ei.”​—Alyssa.

Pa pensa ariba: Bo ta sinti bo di hùrt fásil? Bo ta kere ku bo por tolerá otro hende su imperfekshonnan mas tantu?​—Eklesiástes 7:21, 22.

Pensa riba e benefisionan di pordoná. Beibel ta bisa ku ta bunita pa “laga un ofensa pasa.”—Proverbionan 19:11, Beibel Santu.

“Aunke bo tin motibu pa sinti bo di hùrt, ta bon pa pordoná. Esei ke men ku bo no ta sigui kòrda loke e hende a hasi i ferwagt ku kada bes e tin ku pidi bo despensa. Si bo a pordoná un hende, no menshoná e asuntu mas.”​—Mallory.

Pa pensa ariba: Loke a pasa di bèrdat ta asina grave? Bo por pordoná pa mantené pas?​—Kolosensenan 3:13.

Si bes tras bes bo ta papia tokante un problema, ta meskos ku habri un porta kada bes i laga airu friu drenta den un kamber kayente

Tene kuenta ku e otro hende. Beibel ta bisa: “No buska boso mes interes so, ma tambe interes di otro hende.”—Filipensenan 2:4.

“Si un amistat tin amor i rèspèt, bo tin bon motibu pa resolvé problema ku presentá lihé, pasobra bo a invertí den e amistat ei. Komo ku bo a hasi esfuerso, bo no ke pèrdè e amistat.”​—Nicole.

Pa pensa ariba: Bo por saka a lo ménos algu positivo for di e otro hende su punto di bista?​—Filipensenan 2:3.

E punto ta: Si bo sa kon pa dil ku bo sintimentunan ora un hende hùrt bo, esei por yuda bo ora bo bira adulto. Dikon no siña hasi esei for di awor?