Un mucha muhé chikí a mira huma ku tabata sali for di skorsten di un fábrika i ku p’e tabata parse nubia. P’esei, el a pensa ku e fábrika tabata trahá pa produsí nubia. Un kibokashon chikí asina di un chikitin por ta prèt. Ma un kibokashon grandi por afektá nos bida. Por ehèmpel, si nos no lesa bon kon pa usa un remedi, nos por haña nos ku konsekuensianan serio.

Kibokashon relashoná ku kosnan spiritual por ta aun mas serio. Por ehèmpel, algun hende no a komprondé e siñansanan di Hesus korektamente. (Huan 6:48-68) En bes di siña mas, nan a rechasá tur loke Hesus a siña hende. Ki un pena!

Abo sa lesa Beibel pa haña guia? Si ta asina, esei ta hopi bon. Pero ta posibel ku bo no a komprondé korektamente algu ku bo a lesa? Esei ta pasa ku hopi hende. Ban wak tres kos ku hopi biaha hende no ta komprondé bon.

  • Algun hende no ta komprondé bon e mandamentu bíbliko pa “teme Dios.” Nan ta kere ku nan mester tin miedu di Dios. (Eklesiástes 12:13) Pero Dios no ke pa hende ku ta sirbié tin miedu di dje. E ta bisa: “No tene miedu, pasobra mi ta ku bo. No wak rònt pasobra mi ta bo Dios. Lo mi fortifiká bo. Di bèrdat lo mi yuda bo.” (Isaías 41:10) Teme Dios simplemente ta nifiká ku nos mester tin un atmirashon i rèspèt profundo p’e.

  • Dios lo usa kandela pa kaba ku mundu?

    Algun hende no ta komprondé e palabranan inspirá akí korektamente: “Tin un tempu stipulá pa tur kos. . . . Un tempu pa nase i un tempu pa muri.” Nan ta konkluí ku Dios a stipulá presis ki dia kada hende lo muri. (Eklesiástes 3:1, 2) Sinembargo, e pasashi ei ta papia di e siklo di bida i di ku tur hende lo tin ku muri un dia. Ademas, e Palabra di Dios ta siña nos ku nos desishonnan personal por tin un efekto riba largura di nos bida. Por ehèmpel, den Beibel nos ta lesa: “E temor di SEÑOR ta prolongá bida.” (Proverbionan 10:27; Salmo 90:10; Isaías 55:3) Kon asina? Por ehèmpel, rèspèt pa e Palabra di Dios lo motivá nos pa evitá práktikanan insaludabel manera buracheria i inmoralidat.—1 Korintionan 6:9, 10.

  • Algun hende ta interpretá loke Beibel ta bisa enkuanto shelu i tera, esta, ku nan ta “reservá pa kandela,” na un manera literal i ku p’esei Dios lo destruí e planeta akí. (2 Pedro 3:7) Pero Dios a primintí ku lo e no laga nos planeta ser destruí. Dios “a establesé tera riba su fundeshinan, pa asina esei no kita for di su lugá nunka mas.” (Salmo 104:5; Isaías 45:18) Lo e destruí e sistema korupto akí di e mundu i no e planeta literal. I pa loke ta e palabra shelu, ora e ta den un sentido literal, e por referí sea na shelu, e universo yen di strea òf Dios su lugá di biba. Niun di esakinan lo ser destruí.

DIKON TIN BIAHA HENDE TA KOMPRONDÉ BEIBEL ROBES?

Manera bo por mira di e ehèmpelnan ei, hopi biaha hende no ta komprondé sierto pasashi di Beibel korektamente. Pero dikon Dios ta permití esei? Algun hende por pensa: ‘Si en bèrdat Dios ta e Persona di mas sabí, lo e por a duna nos un buki ku ta skirbí na un manera asina kla ku tur hende por komprondé fásilmente. Dikon e no a hasi esei?’ Ban wak tres motibu pakiko hopi biaha hende ta komprondé Beibel robes.

  1. Beibel ta diseñá pa hende humilde i ku ta dispuesto pa siña. Hesus a bisa su Tata: “Mi ta alabá bo públikamente, Tata, Señor di shelu i tera, pasobra bo a tene e kosnan akí bon skondí pa hende sabí i intelektual i a revelá nan na mucha chikitu.” (Lukas 10:21) Beibel ta skirbí di tal manera ku ta solamente hende ku tin e aktitut korekto lo komprondé su mensahe. Hende orguyoso, un karakterístika komun di “hende  sabí i intelektual,” hopi biaha no ta komprondé Beibel. Pero Dios ta bendishoná hende ku ta lesa Beibel ku e aktitut manera esun di “mucha chikitu,” esta, humilde i kla pa siña, ku un mihó komprondementu di su mensahe. Pues, Dios a diseñá Beibel na un manera magistral!

  2. Dios a laga skirbi Beibel pa hende ku di bèrdat ke su yudansa pa komprondé su Palabra. Hesus a mustra ku hende lo tabatin mester di yudansa pa komprondé kompletamente loke el a siña. Kon nan lo a haña e yudansa ei? Hesus a bisa: “E ayudante, e spiritu santu, ku e Tata lo manda den mi nòmber, lo siña boso tur kos.” (Huan 14:26) Pues Dios ta usa spiritu santu, esta, su forsa aktivo poderoso, pa yuda hende komprondé kiko nan ta lesa den Beibel. Pero Dios no ta duna su spiritu na hende ku no ta dependé riba dje pa yudansa, i p’esei hopi biaha nan no ta komprondé Beibel. Ademas, spiritu santu ta motivá kristiannan ku tin mas konosementu di Beibel pa yuda hende ku ke komprondé Beibel mihó.—Echonan 8:26-35.

  3. Algun pasashi di Beibel lo bira komprendibel solamente na e debido tempu. Por ehèmpel, Dios a bisa profeta Daniel pa skirbi un mensahe pa futuro. Un angel a bis’é: “Daniel, tene e palabranan akí skondí i seya e buki te na e tempu di e fin.” Atraves di siglonan, hopi hende a lesa e buki di Daniel, pero nan no por a ègt komprond’é. De echo, ni Daniel mes no a komprondé algun kos ku el a skirbi. El a atmití humildemente: “Mi a tende, ma no por a komprondé.” Ku tempu, hende lo a bin komprondé korektamente e profesia di Dios ku Daniel a skirbi, pero solamente na e tempu ku Dios a stipulá. E angel a bisa: “Sigui bo kaminda, Daniel, pasobra e palabranan akí ta keda skondí i seyá te na e tempu di e fin.” Ken lo komprondé e mensahenan di Dios? E angel a sigui bisa: “Ningun di e malbadonan lo komprondé, ma esnan ku tin disernimentu lo komprondé.” (Daniel 12:4, 8-10) Pues, Dios ta revelá e nifikashon di sierto pasashinan di Beibel te ora e tempu pa esei yega.

Testigunan di Yehova a yega di komprondé algun parti di Beibel robes debí ku no tabata e debido tempu? Sí. Pero ora Dios su tempu a yega pa aklará asuntu, nan tabata kla pa ahustá nan komprondementu di Beibel. Nan ta kere ku asina nan ta imitá Kristu su apòstelnan, kendenan a ahustá nan pensamentu ku un aktitut humilde ora Hesus a korigí nan.—Echonan 1:6, 7.

Un mucha chikí su idea di unda nubia ta bini por ta djis un kibokashon chikitu. Sinembargo, loke Beibel ta siña ta masha importante pa kada un di nos. E mensahe di Beibel ta muchu importante pa un hende purba di komprondé riba su mes. Pues, nos ta animá bo pa buska yudansa pa bo komprondé loke bo ta lesa. Buska yudansa serka hende ku ta studia Beibel ku un aktitut humilde, ku ta dependé riba e spiritu santu di Dios pa komprondé Beibel i ku ta konvensí ku nos ta bibando den un tempu ku Dios ke pa nos komprondé Beibel manera nunka promé. No duda pa papia ku Testigunan di Yehova òf lesa informashon basá riba Beibel riba nan website, jw.org. Beibel ta primintí ku ‘si bo sklama pa disernimentu, lo bo deskubrí e konosementu di Dios.’—Proverbionan 2:3-5.