PANAYIOTA a lanta riba un isla ku ta keda den Laman Mediteráneo. Tempu ku e tabata un tiner, e tabatin masha interes den polítika. Despues di tempu, el a bira sekretario di un partido polítiko di e pueblo kaminda e tabata biba. El a pasa hopi tempu ta bai di kas pa kas pa buska fondo pa e partido. Pero na final, Panayiota a keda desapuntá. Faboritismo, ambishon, frikshon i envidia tabata na òrdu di dia apesar ku e miembronan di e partido tabata yama otro amigu.

Daniel a lanta den un famia hopi religioso na Irlanda. Ma e ta kòrda kla kla e hipokresia di e pastornan ku tabata bebe pisá, hunga wega di plaka i hòrta for di e skalchi di pasa kolèkt, miéntras ku nan tabata bis’é ku si e peka lo e pasa tormento den fièrnu.

Jeffery a traha hopi tempu den merkadeo i benta pa doñonan di barku for di diferente parti di mundu ku tabatin nan negoshi na Gran Bretaña i Merka. E ta kòrda kon hopi biaha e kliente- i kompetidónan tabata hasi aktonan ilegal ora nan tabata negosiá ku funshonarionan di gobièrnu. Nan tabata asina hipókrita ku nan tabata dispuesto pa bisa kualke kos pa sera un kontrakt.

Lamentablemente, tin mas di e kasonan akí. Awe, hipokresia ta na òrdu di dia den kasi tur gremio; den polítika, religion i komèrsio. Den algun idioma, e palabra “hipókrita” ta bini di e palabra griego hypokrites ku ta transmití e idea di un oradó òf un aktor ku hopi biaha ta pone un maskarada. Ku tempu, e palabra ei a bin referí na hende ku ta pretendé un kos ku nan no ta pa gaña otro hende òf pa haña loke nan ke.

Hipokresia por lanta emoshonnan fuerte den hende ku a bira víktima di dje, manera amargura, rabia i renkor. P’esei, den nan frustrashon e víktimanan akí por sklama: “Hipokresia lo kaba un dia?” Nos por ta kontentu di sa ku e Palabra di Dios ta duna nos motibu pa kere ku hipokresia lo kaba un dia.

LOKE DIOS I SU YU TA PENSA DI HIPOKRESIA

Segun Beibel, hipokresia a kuminsá, no ku hende, sino ku un spiritu invisibel. Na komienso di historia di humanidat, Satanas e Diabel a usa un kolebra komo kapa pa laga parse ku e ta un persona ku ta hasi bon pa e por a gaña e promé muhé, Eva. (Génesis 3:1-5) For di e tempu ei, hopi hende ta aparentá di ta algu ku nan no ta i ta hasi esaki pa kue hende kabes abou òf pa haña loke nan ke.

Ora e antiguo nashon di Israel a kai den e trampa di adorashon falsu i hipokresia spiritual, bes  tras bes Dios a spièrta nan di e konsekuensianan. Yehova Dios a deklará mediante profeta Isaías: “E hendenan aki ta aserká mi ku nan boka i ta onra mi ku nan lepnan, ma nan kurason ta leu for di mi.” (Isaías 29:13) Ora e nashon di Israel no a bira for di nan mal kaminda, na aña 607 promé ku Kristu, Dios a permití e babilonionan destruí Israel su sentro di adorashon, esta, Herúsalèm i su tèmpel, i na aña 70 despues di Kristu, e ehérsito romano a kaba kuné por kompleto. Ta bisto anto ku Dios no ta tolerá hipokresia pa semper.

Di otro banda, Dios i su Yu, Hesus, ta balorá hende onesto i sinsero. Por ehèmpel, na prinsipio di Hesus su sirbishi, un hòmber ku yama Natanael a aserk’é. Ora Hesus a mir’é, el a bisa: “Ata un israelita den ken sigur no tin engaño.” (Huan 1:47) Natanael, konosí tambe komo Bartolomeo, a bira un di e 12 apòstelnan di Hesus.—Lukas 6:13-16.

Hesus a pasa tempu ku su siguidónan i a siña nan kiko Dios ta pensa di sierto kosnan. E siguidónan di Hesus no mester tabata hipókrita. Hesus a kondená fuertemente e práktikanan hipókrita di e lidernan religioso di e tempu ei. Esaki a sirbi komo spièrtamentu pa su siguidónan. Kiko tabata algun di e práktikanan akí?

Nan tabata hasi “obranan di hustisia” djis pa hende mira. Hesus a bisa e hendenan ku tabata skuch’é: “Tene masha kuidou pa boso no praktiká boso obranan di hustisia dilanti di hende djis pa nan mira boso, . . . manera e hipókritanan ta hasi.” Tambe Hesus a bisa nan ku nan mester a duna limosna “den sekreto,” òf diskretamente. Nan mester a hasi orashon den privá i no djis pa hende mira nan. Si nan a hasi esei, nan adorashon lo tabata di kurason i su Tata lo a apresiá esei.—Mateo 6:1-6.

Nan tabata kla pa kritiká. Hesus a bisa: “Hipókrita! Saka e balki for di bo mes wowo promé; e ora ei lo bo mira kla kon pa saka e splenter for di wowo di bo ruman.” (Mateo 7:5) Ora un hende ta hala atenshon na e fayonan di otro hende miéntras ku e mes ta yen di kos di drecha, e persona ei ta aparentá di ta algu ku e no ta. En realidat, tur hende ta “peka i no por reflehá e gloria di Dios.”—Romanonan 3:23.

Nan motivashonnan tabata robes. Na un okashon, e disipelnan di e fariseonan i e siguidónan di Heródes a aserká Hesus ku un pregunta tokante belasting. Nan a fingi papia bon di Hesus i bis’é: “Maestro, nos sa ku bo ta papia bèrdat i ta siña hende e kaminda di Dios di akuerdo ku bèrdat.” Anto despues nan kier a ku’é den trampa i a puntr’é: “Tin mag di paga belasting na Sésar, sí òf nò?” Hesus a kontestá nan: “Pakiko boso ta purba di kue mi den trampa, hipókritanan?” Ku bon motibu Hesus a yama nan hipókrita pasobra nan no tabata interesá pa haña un kontesta pa nan pregunta sino nan kier a “kue Hesus den trampa ku su mes palabranan.”—Mateo 22:15-22.

Kristiannan berdadero “tin amor ku ta sali for di un kurason limpi, di un bon konsenshi i di fe sin hipokresia.” —1 TIMOTEO 1:5

Ora e kongregashon kristian a ser formá na Pentekòste di aña 33 despues di Kristu, a kuminsá reina un ambiente liber di engaño. E kristiannan berdadero a traha duru pa eliminá tur tendensia hipókrita ku nan por tabatin. Por ehèmpel, Pedro, un di e 12 apòstelnan, a animá su kompañeronan kristian pa “obedesé e bèrdat, loke a resultá den amor sin hipokresia pa e rumannan.” (1 Pedro 1:22) Apòstel Pablo a urgi su kolaboradónan pa nan “tin amor ku ta sali for di un kurason limpi, di un bon konsenshi i di fe sin hipokresia.”—1 Timoteo 1:5.

E PODER DI E PALABRA DI DIOS

Meskos ku den e promé siglo, e siñansanan di Hesus i di e apòstelnan ku nos ta haña den Beibel ainda tin poder. Pablo a skirbi tokante esaki: “E palabra di Dios ta bibu i poderoso, i e ta mas skèrpi ku kualke spada ku ta kòrta tur dos banda, i e ta penetrá asina profundo ku e ta separá alma for di spiritu i djòint for di tuti di wesu, i e por saka pensamentu i intenshon di kurason na kla.” (Hebreonan 4:12) Loke a yuda hopi hende stòp ku  hipokresia i bira onesto i sinsero di kurason ta ora nan a haña konosementu di Beibel i a hasi esfuerso pa biba na armonia ku su siñansanan. Wak e eksperensia di e tres personanan menshoná na kuminsamentu di e artíkulo akí.

“Ei mi a mira hende ku tabatin berdadero amor i interes den otro.”—PANAYIOTA

Panayiota su bida a kambia por kompleto ora el a aseptá un invitashon pa bai un reunion na un Salòn di Reino di Testigunan di Yehova. E no a mira niun hende ku ta hasi bon djis pa impreshoná otro hende. El a bisa: “Ei mi a mira hende ku tabatin berdadero amor i interes den otro, algu ku nunka mi no a mira den tur e añanan ku mi tabata den polítika.”

Panayiota a kuminsá studia Beibel i a progresá te ku el a batisá. Esei tabata 30 aña pasá. Awor e ta bisa: “Mi bida a haña berdadero nifikashon, no tempu ku mi tabata bai di kas pa kas pa hasi propaganda pa partido polítiko, sino ora ku mi a kuminsá prediká tokante e Reino di Dios, ku ta e úniko gobièrnu ku por perkurá pa un mundu hustu.”

“Mi n’ por a biba ku e idea ku mi tabata laga mi rumannan kristian kere ku mi ta algu ku en realidat mi no ta.”—DANIEL

Daniel a progresá i a haña algun responsabilidat den e kongregashon kristian. Algun aña despues, el a kometé un fayo i su konsenshi a kuminsá molesti’é. El a bisa: “Ora mi a kòrda riba e hipokresia ku mi a mira den misa añanan promé, mi a sinti ku no a keda mi nada otro ku entregá mi privilegionan di sirbi den e kongregashon. Mi n’ por a biba ku e idea ku mi tabata laga mi rumannan kristian kere ku mi ta algu ku en realidat mi no ta.”

Afortunadamente, despues di tempu, Daniel a sinti ku e por a sigui sirbi den e kongregashon ku un konsenshi limpi, i gustosamente el a aseptá pa haña responsabilidat den e kongregashon atrobe. E onestidat akí ta un karakterístika di hende ku ta sirbi Dios sin hipokresia. Nan ta siña pa “saka e balki” for di nan mes wowo promé ku nan por “saka e splenter” for di wowo di nan ruman.

“Mi a ripará ku mi no por ta un chatiger ku ta usa yen di triki i bisa kualke kos djis pa sera un kontrakt.”—JEFFERY

Jeffrey, ku a pasa hopi aña den e mundu di komèrsio, a bisa: “Segun ku mi a haña mas konosementu di Beibel, mi a ripará ku mi no por ta un chatiger ku ta usa yen di triki i bisa kualke kos djis pa sera un kontrakt. Tekstonan di Beibel, manera Proverbionan 11:1, ku ta bisa ku ‘un balansa engañoso ta abominashon pa SEÑOR,’ a traha ku mi konsenshi.” Pues, kontrali na e hendenan ku a puntra Hesus tokante belasting, Jeffrey a siña pa trata tantu su rumannan kristian komo hende no kreyente ku e motivashon korekto.

Miónes di Testigu di Yehova rònt mundu ta hasi nan bèst pa apliká loke nan ta siña den Beibel. Nan ta hasi hopi esfuerso pa “bisti e personalidat nobo ku a ser kreá segun e boluntat di Dios den berdadero hustisia i lealtat.” (Efesionan 4:24) Nos ta animá bo pa bo siña konosé ken e Testigunan di Yehova ta, kiko ta nan kreensianan i kon nan por yuda bo siña tokante e mundu nobo ku Dios a primintí. Ei lo tin “hustisia” i lo no tin hipokresia mas.—2 Pedro 3:13.