Bai na kontenido

Bai na kontenido

 TÓPIKO PRINSIPAL | KIKO DIOS TA PENSA DI GUERA?

Dios Su Punto di Bista di Guera Awe

Dios Su Punto di Bista di Guera Awe

Awe tambe hende ta sufri. Hopi di nan ta roga Dios konstantemente pa yuda nan i ta puntra nan mes si esei lo sosodé un dia. Dios ta skucha nan sklamashon? I kiko di esnan ku ta bai guera pa pone fin na nan sufrimentu? Dios ta haña ku nan tin motibu bálido pa bai guera i ta apoyá nan den esei?

Armagedon lo ta e guera ku lo kaba ku tur guera

Di promé, ta un konsuelo pa sa ku Dios ta mira e sufrimentu ku tin na mundu awe, i e ta bai hasi algu tokante esei. (Salmo 72:13, 14) Den Beibel e ta primintí ku lo e trese alivio pa tur esnan “ku ta pasa den tribulashon.” Pero na ki tempu? “Ora Señor Hesus keda revelá for di shelu huntu ku su angelnan poderoso . . . lo e trese vengansa riba esnan ku no konosé Dios i riba esnan ku no ta obedesé e bon notisia tokante nos Señor Hesus.” (2 Tesalonisensenan 1:7, 8) E revelashon di Hesus lo tuma lugá den futuro, den loke Beibel ta yama “e guera ku lo tuma lugá riba e gran dia di Dios, e Todopoderoso,” esta, Armagedon.—Revelashon 16:14, 16.

Den e futuro guera ei, Dios lo no manda hende, sino su Yu, Hesukristu, i angelnan poderoso pa bai bringa kontra e malbadonan. E ehérsito spiritual akí lo kaba ku tur sufrimentu.—Isaías 11:4; Revelashon 19:11-16.

Dios su punto di bista di guera a keda meskos te awe. Ainda e ta mira guera komo un medio legítimo pa kaba ku sufrimentu i maldat. I meskos ku den pasado, ta Dios so tin derecho di determiná ki ora un guera lo tuma lugá i ken lo bai guera. Manera nos a mira, ya kaba Dios a determiná ku e guera pa kaba ku tur maldat i defendé esnan oprimí lo tuma lugá den futuro, i su Yu,  Hesukristu, lo bringa e guera akí. Esaki ta nifiká ku Dios no ta aprobá e gueranan di awendia, maske kon noble nan por parse di ta.

Pensa riba e siguiente ehèmpel: Imaginá ku dos ruman ta kuminsá bringa ku otro ora nan tata no t’ei. Nan ta stòp di bringa un ratu pa yama nan tata na telefòn. Un di nan ta bis’é ku ta e otro a kuminsá e pelea, miéntras e otro ta bisa ku ta su ruman a dal e. Tur dos ke pa nan tata tuma parti pa nan. Pero despues di a skucha tur dos, e tata ta bisa nan pa stòp di bringa i warda riba dje te ora e yega kas pa e resolvé e problema. Nan ta warda un ratu, pero djis despues nan ta bolbe kuminsá bringa. Ora e tata yega kas, e no ta keda kontentu ku niun di dos i ta straf nan pasobra nan no a obedes’é.

Awe, hopi biaha e nashonnan ku ta bai guera kontra otro ta pidi Dios su yudansa. Pero Dios no ta tuma parti pa niun. Al kontrario, den su Palabra, Beibel, e ta bisa bon kla: “No paga malu ku malu” i “no tuma vengansa.” (Romanonan 12:17, 19) Ademas, el a bisa ku hende mester “warda ku pasenshi” pa e tuma akshon, i esei lo sosodé na Armagedon. (Salmo 37:7) Dios no ta keda niun tiki kontentu ora e nashonnan bai guera kontra otro i keda sin warda pa e mes tuma akshon; p’e, e gueranan ei ta un muestra di arogansia. Pues na Armagedon, Dios lo mustra kon malkontentu e ta i lo kaba ku e konfliktonan entre e nashonnan unabes i pa semper ora e “hasi gueranan stòp te na e fin di tera.” (Salmo 46:9; Isaías 34:2) Sí, Armagedon lo ta e guera ku lo kaba ku tur guera.

Fin di guera ta djis un di e tantísimo bendishonnan ku e Reino di Dios lo trese. Hesus a papia di e reino, òf gobièrnu, ei den e orashon bon konosí akí: “Laga bo Reino bini. Laga bo boluntat sosodé, meskos ku den shelu, tambe riba tera.” (Mateo 6:10) Pues, e Reino di Dios lo kaba ku tantu guera komo loke ta kousa guera, esta, maldat. * (Salmo 37:9, 10, 14, 15) No ta nada straño anto ku e siguidónan di Hesus ta ansioso pa haña e bendishonnan ku e Reino di Dios lo trese.—2 Pedro 3:13.

Pero kuantu nos tin ku warda pa e Reino di Dios pone fin na tur sufrimentu, opreshon i maldat? E kumplimentu di profesianan di Beibel ta mustra ku nos ta bibando den “e último dianan” di e mundu akí. (2 Timoteo 3:1-5) * Pronto, pa medio di e guera di Armagedon e Reino di Dios lo pone fin na e último dianan akí.

Manera nos a mira, e hendenan ku lo ser destruí den e guera final ta esnan ku ta nenga di “obedesé e bon notisia tokante nos Señor Hesus.” (2 Tesalonisensenan 1:8) Pero, kòrda ku Dios no tin plaser den morto di niun hende, ni di e malbado. (Ezekiel 33:11) Komo ku “e no ta deseá pa ningun hende ser destruí” den e guera final ei, e ta sòru pa e bon notisia tokante nos Señor Hesus “ser prediká den henter e tera habitá, komo testimonio pa tur nashon” promé ku e fin yega. (2 Pedro 3:8, 9; Mateo 24:14; 1 Timoteo 2:3, 4) Sí, pa medio di e trabou di prediká ku Testigunan di Yehova ta hasi rònt mundu, awe hende tin e chèns pa siña konosé Dios, obedesé e bon notisia tokante Hesus i biba pa mira e dia ku lo no eksistí guera mas.

^ par. 9 E Reino di Dios lo kaba tambe ku e enemigu di hende, esta, morto. Manera e artíkulo na página 16 ta mustra, Dios lo resusitá miónes i miónes di hende, inkluso hopi ku a bira víktima di guera.

^ par. 10 Pa mas informashon tokante e último dianan, wak kapítulo 9 di e buki, Kiko Beibel Ta Siña Realmente?, publiká pa Testigunan di Yehova.