Bai na kontenido

Bai na kontenido

 TÓPIKO PRINSIPAL | KIKO DIOS TA PENSA DI GUERA?

Dios Su Punto di Bista di Guera den e Promé Siglo

Dios Su Punto di Bista di Guera den e Promé Siglo

E pueblo tabata sufri. Meskos ku nan antepasadonan, sin duda e hudiunan di promé siglo tambe tabata pidi Dios konstantemente pa e aliviá nan, e biaha akí for di opreshon di e Imperio Romano. Anto nan a tende di Hesus. Ta e lo a bira e Mesías primintí? No ta nada straño anto ku hopi hende a “karga speransa ku e hòmber akí tabata esun ku lo a libra Israel” for di nan opresornan romano. (Lukas 24:21) Pero nan no a haña alivio. En bes di esei, na aña 70 di e promé siglo, e ehérsito romano a bini i a destruí Herúsalèm i su tèmpel.

Ta kiko a pasa? Dikon Dios no a bringa pa e hudiunan manera el a hasi den antigwedat? Òf dikon e no a laga nan bai guera pa libra nan mes di e opreshon? Dios su punto di bista di guera a kambia? Nò, pero algu a kambia drástikamente ku e hudiunan: nan a rechasá Dios su Yu, Hesus, komo e Mesías. (Echonan 2:36) P’esei, komo nashon, nan a pèrdè e relashon spesial ku nan tabatin ku Dios.—Mateo 23:37, 38.

E nashon hudiu i e Tera Primintí no tabatin Dios su protekshon mas. P’esei, ya nan no por a bai guera mas ku Dios su aprobashon òf yudansa. Manera Hesus a profetisá, e nashon di Israel a pèrdè e fabor di Dios. Awor un nashon nobo, un nashon spiritual, ku Beibel ta yama “e Israel di Dios,” lo a haña e bendishonnan. (Galationan 6:16; Mateo 21:43) E kongregashon di kristian ungí ku spiritu santu a resultá di ta e Israel spiritual di Dios. Beibel a bisa bon kla di nan: “Awor boso ta e pueblo di Dios.”—1 Pedro 2:9, 10.

Awor ku ta e kristiannan di promé siglo tabata “e pueblo di Dios,” Dios a bringa pa nan pa libra nan for di e opreshon romano, òf el a manda nan bai bringa kontra nan opresornan? Nò, e no a hasi esei. Dikon nò? Pasobra, manera nos a mira den e artíkulo anterior, ora Dios a duna òrdu pa bai guera, ta e so tabatin derecho di determiná ki ora e guera lo a tuma lugá. Dios no a bringa pa e kristiannan di promé siglo ni e no a manda nan bai guera. Pues ta klaru ku den e promé siglo no tabata e tempu pa Dios kaba ku maldat i opreshon.

Meskos ku Dios su sirbidónan di antigwedat, e kristiannan di promé siglo mester a warda te ora e tempu pa Dios kaba ku maldat i opreshon a yega. Mientrastantu, nan no tabatin mag di tuma e asuntu den nan mes man i bringa kontra nan enemigunan. Hesukristu a mustra esaki bon kla den su siñansanan. Por ehèmpel, e no a manda su siguidónan bai guera, pero en bes di esei, el a bisa nan: “Sigui stima boso enemigunan i hasi orashon pa esnan ku ta persiguí boso.” (Mateo 5:44) Ora Hesus a profetisá ku e ehérsito romano lo a ataká Herúsalèm di promé siglo, e no a bisa su disipelnan pa nan keda i bringa kontra nan, sino pa nan hui, ku ta nèt loke nan a hasi.—Lukas 21:20, 21.

Ademas, apòstel Pablo a skirbi bou di inspirashon: “No tuma vengansa, rumannan stimá, . . . pasobra ta pará skirbí: ‘Vengansa ta di mi; ami lo paga bèk, Yehova ta bisa.’” (Romanonan 12:19) Pablo a sita loke Dios a bisa siglonan promé, manera Levítiko 19:18 i Deuteronomio 32:35 ta trese  padilanti. Manera nos a mira den e artíkulo anterior, un manera ku Dios a tuma vengansa pa su pueblo den antigwedat tabata ora el a yuda nan bringa kontra nan enemigunan. Pues, Pablo a mustra ku Dios su punto di bista di guera no a kambia. Den promé siglo, ainda Dios a mira guera komo un medio legítimo pa tuma vengansa pa su sirbidónan i pa pone un fin na opreshon i maldat. Pero, meskos ku den antigwedat, ta Dios so tabatin derecho di determiná ki ora e guera lo a tuma lugá i ken lo a bringa.

Pues, ta bisto ku Dios no a outorisá e kristiannan di promé siglo pa bai guera. Pero kiko di awe? Dios a outorisá un sierto grupo di hende pa bai guera? Òf awor ta e tempu pa Dios tuma akshon i bringa na fabor di su sirbidónan? Kiko Dios ta pensa di guera awe? E último artíkulo di e seri akí lo kontestá e preguntanan ei.