Algun hende ta pensa ku orashon ta pèrdèmentu di tempu i ku no tin un persona ta skucha orashon. Otronan a purba di hasi orashon pero ta sinti ku nan no a haña kontesta. Un ateista a forma un idea di loke é ta kere Dios ta i a pidi Dios: “Djis flùister algu den mi orea.” Pero el a bisa ku Dios “no a bisa ni un pia di palabra.”

No opstante, Beibel ta sigurá nos ku tin un Dios ku ta skucha orashon. Den Beibel nos ta lesa loke Dios a bisa un pueblo hopi tempu pasá: “Siguramente e [Dios] lo ta miserikòrdioso ku bo ora ku e tende e zonido di bo yoramentu; ora ku e tende esaki, e lo kontestá bo.” (Isaías 30:19) Un otro versíkulo di Beibel ta bisa: “Orashon di e rektonan ta su delisia.”—Proverbionan 15:8.

Hesus a hasi orashon na su Tata, anto “el a ser skuchá.”—Hebreonan 5:7

Ademas, Beibel ta konta ku Dios a skucha orashon di diferente hende. Un teksto di Beibel ta bisa ku Hesus a ofresé “petishon . . . na Esun ku por a salb’é” i “el a ser skuchá.” (Hebreonan 5:7) Nos por haña algun ehèmpel mas na Daniel 9:21 i 2 Krónikanan 7:1.

Dikon anto tin hende ta sinti ku nan no ta haña kontesta pa nan orashonnan? Pa nos orashonnan ser skuchá, nos tin ku resa solamente na e Dios ku Beibel ta papia di dje, Yehova, * na niun otro dios òf antepasado. Ademas, Dios ke pa loke nos pidi ta “di akuerdo ku su boluntat,” esta, nos mester pidi kos ku ta agrad’é. Si nos hasi orashon asina, Dios ta sigurá nos ku “e ta tende nos.” (1 Huan 5:14) Pues, pa nos orashonnan ser skuchá, nos mester siña konosé e Dios ku Beibel ta papia di dje i siña kiko ta su boluntat.

Hopi hende ta kere ku orashon no ta djis un formalidat religioso pero ku di bèrdat Dios ta skucha orashon i ta kontestá nan. Isaac, di Kenia, a bisa: “Mi a resa pidi Dios p’e laga mi komprondé loke Beibel ta bisa. Djis despues un persona a aserká mi i a duna mi e yudansa ku mi tabatin mester.” Hilda, di Filipinas, kier a stòp di huma. Despues di vários intento, su kasá a sugerié: “Dikon bo no ta resa pidi Dios yuda bo?” Hilda a sigui e konseho ei i a bisa: “E manera ku Dios a yuda mi a laga mi keda asombrá. Tabata komo si fuera mi a kuminsá pèrdè gana di huma, i asina mi a logra stòp.”

Bo ta kere ku Dios lo ta interesá pa yuda bo ku bo problemanan personal si bo hasi orashon ku ta di akuerdo ku su boluntat?

^ par. 6 Beibel ta bisa ku Dios su nòmber ta Yehova.