Bai na kontenido

Bai na kontenido

 TÓPIKO PRINSIPAL | ORASHON TA YUDA KU ALGU?

Orashon—Ku Kiko e Ta Yuda Bo?

Orashon—Ku Kiko e Ta Yuda Bo?

Promé ku bo kuminsá ku algu nobo, kisas bo ta puntra bo mes: ‘Kiko lo mi gana ku esaki?’ Ta egoista di bo parti pa puntra esei tokante orashon? No nesesariamente. Klaru ku nos ke sa si e ta yuda ku algu. Asta un bon hòmber ku yama Yòb a yega di puntra: “Si mi yam’é, lo e kontestá mi?”—Yòb 9:16, NW.

Den e artíkulonan anterior, nos a mira ku orashon ta mas ku djis un kustumber religioso òf un tipo di terapia pa mente. E Dios berdadero tá skucha orashon, i si nos resa na dje na e manera korekto i pidi e kosnan korekto, lo e skucha ku atenshon. De echo, e ta animá nos pa hala serka dje. (Santiago 4:8) Pues anto, kiko nos por ferwagt si nos hasi orashon regularmente? Laga nos wak algun di e benefisionan.

Pas mental.

Ora bo haña bo ku problema i sirkunstansia difísil den bida, bo ta sinti ku ansiedat ta kaba ku bo? Beibel ta animá nos pa “hasi orashon konstantemente” na e momentonan ei i ‘laga Dios sa kiko ta nos petishonnan.’ (1 Tesalonisensenan 5:17; Filipensenan 4:6) Beibel ta sigurá nos ku si nos resa na Dios, “e pas di Dios ku ta surpasá tur komprondementu lo protehá [nos] kurason i [nos] mente.” (Filipensenan 4:7) Pues, ora nos deshogá nos mes serka nos Tata selestial i kont’é tokante nos preokupashonnan, nos por sinti nos mes mas trankil. De echo, na Salmo 55:22 (NW) Beibel ta animá nos pa hasi esei: “Tira bo karga riba Yehova i e lo sostené bo.”

“Tira bo karga riba Yehova, i e lo sostené bo.”—Salmo 55:22, NW

 Hende rònt mundu a yega di eksperensiá e pas mental akí. Hee Ran, di Surkorea, a bisa: “Apesar ku mi tin problema serio, ora mi papia ku Dios tokante nan, mi ta sinti ku un peso a kita fo’i mi, i mi ta haña e forsa pa sigui padilanti.” Cecilia, na Filipinas, a relatá: “Komo mama, mi ta preokupá pa mi yu muhénan i mi mama, kende awor, pa motibu di malesa, no ta rekonosé mi mas. Pero, orashon ta yuda mi hasi mi kosnan di tur dia ku ménos preokupashon. Mi sa ku Yehova lo yuda mi perkurá pa nan.”

Konsuelo i forsa ora nos ta pasa den situashonnan difísil.

Bo tin hopi strès? Bo ta pasando den un sirkunstansia hopi difísil òf unu ku asta ta pone bo bida na peliger? Bo por haña gran alivio ora bo resa na e “Dios di tur konsuelo.” Beibel ta bisa ku e “ta konsolá nos den tur nos tribulashonnan.” (2 Korintionan 1:3, 4) Por ehèmpel, un biaha ku Hesus  tabata sumamente afligí, el a “hinka rudia i kuminsá hasi orashon,” i komo resultado, “un angel for di shelu a aparesé na dje i a fortales’é.” (Lukas 22:41, 43) Un otro hòmber fiel ku a pasa den un situashon difísil tabata Nehemías, ya ku su enemigunan a menas’é pa stòp e di hasi e trabou di Dios. El a pidi Dios: “Fortalesé mi mannan.” E relato ta mustra ku di bèrdat Dios a yud’é vense su miedu i kaba ku e trabou. (Nehemías 6:9-16) Reginald, di Gana, a papia di su eksperensia ku hasimentu di orashon, bisando: “Ora mi hasi orashon, spesialmente ora mi ta pasando den situashonnan difísil, mi ta sinti ku mi ta papia ku un persona ku por yuda mi i ku ta sigurá mi ku mi no tin nodi di ansha.” Sí, Dios ta konsolá nos ora nos resa na dje.

Sabiduria di Dios.

Sierto desishonnan ku nos ta tuma por kambia nos bida i bida di nos sernan kerí pa semper. Kon nos por tuma desishon sabí? Beibel ta bisa: “Si un di boso falta sabiduria [spesialmente ora di trata ku situashonnan difísil], lag’é sigui pidi Dios, i lo e dun’é esaki, pasobra e ta duna tur hende generosamente, sin tira na nan kara.” (Santiago 1:5) Si nos pidi Dios duna nos sabiduria, e por usa su spiritu santu pa guia nos pa tuma bon desishon. De echo, nos por pidié spesífikamente pa spiritu santu pasobra Hesus mes a sigurá nos ku “e Tata ku ta den shelu lo duna spiritu santu na esnan ku pidié!”—Lukas 11:13.

“Konstantemente mi tabata hasi orashon na Yehova p’e guia mi pa tuma e desishon korekto.”—Kwabena, Gana

Hesus mes a sinti ku e mester a pidi yudansa di su Tata ora e tabatin ku tuma desishon importante. Beibel ta bisa ku ora e tabatin ku skohe 12 hòmber ku mester a bira su apòstelnan, el a “pasa henter anochi ta hasi orashon na Dios.”—Lukas 6:12.

Meskos ku Hesus, awe hopi hende ta sinti nan mes mas trankil ora nan mira kon Dios a kontestá nan orashonnan pa yuda nan tuma bon desishon. Regina, di Filipinas, a konta di tur e problemanan ku el a pasa aden: despues di morto di su esposo e mester a sòru pa su mes i pa su famia, el a pèrdè trabou i a pasa difikultat den lantamentu di su dos yunan. Kiko a yud’é tuma desishon sabí? Regina a bisa: “Orashon a yuda mi dependé riba Yehova.” Kwabena, di Gana, a bisa dikon el a pidi Dios su yudansa: “Mi tabatin un trabou den konstrukshon ku tabata paga bon, pero mi a pèrd’é. Konstantemente mi tabata hasi orashon na Yehova p’e guia mi pa mi tuma e desishon korekto. Mi tin sigur ku Yehova a yuda mi skohe un karera ku ta laga mi sòru pa mi mes físikamente i spiritualmente.” Abo tambe por haña Dios su guia ora bo hasi orashon tokante asuntunan ku por afektá bo relashon kuné.

Nos a menshoná djis algun kos ku orashon por yuda bo kuné. (Pa mas ehèmpel, wak e kuadro “ E Benefisionan di Orashon.”) Pero, pa bo por haña e benefisionan akí, bo mester siña konosé Dios i haña sa kiko ta su boluntat. Si ta esei bo ta deseá, nos ta animá bo pa pidi Testigunan di Yehova yuda bo analisá Beibel. * Esaki por ta e promé paso pa hala serka esun ku ta “skucha orashon.”—Salmo 65:2.

^ par. 14 Pa mas informashon, tuma kontakto ku Testigunan di Yehova den bo área òf bishitá nos website, www.jw.org.