Mi tabata meskos ku kualke otro tiner. Pero na 1984, mi a sali Miss Hong Kong. Mi a bira masha famoso, i mi bida a kambia di un dia pa otro. Mi potrèt a sali riba portada di revista- i korantnan. Mi tabata kanta, baila, duna spich, presentá programa di televishon, bisti paña nèchi i anda ku personanan importante, entre otro, e gobernador di Hong Kong.

E siguiente aña, mi a bira un aktris i a kuminsá hunga den pelíkula, i vários biaha mi tabatin e ròl prinsipal. Reporteronan tabata ke sa mi historia, fotógrafonan kier a saka mi potrèt i mi tabata haña invitashon pa ta presente ora tin estreno di pelíkula, ora di kòrta sinta i na komementunan. Semper mi tabata e sentro di atenshon.

Den un pelíkula di akshon

Pero, pokopoko mi a ripará ku e kosnan akí no tabata dje dushi ei manera mi a imaginá. Mayoria di biaha mi tabata hunga den pelíkula di akshon, i esei tabata peligroso, pasobra no ta semper aktornan na Hong Kong tabatin un persona pa hunga na nan lugá den e esenanan peligroso manera na Hollywood. P’esei mi mes mester a hunga nan; por ehèmpel, mi mester a pasa ku un bròmer over di un outo. Hopi pelíkula ku mi a hunga aden tabata inmoral i violento, i algun di nan tabatin asta demonismo.

Na 1995, mi a kasa ku un produktor di sine. Aunke hende por a pensa ku mi tabatin tur loke por a hasi mi felis, esta, fama, plaka i un kasá ku ta stima mi, tòg mi tabata tristu i deprimí. P’esei mi a disidí di stòp di hunga den pelíkula.

MI A KÒRDA RIBA LOKE MI A SIÑA TEMPU MI TABATA MUCHA

Mi a kuminsá pensa hopi riba e fe ku mi tabatin tempu mi tabata mucha. E tempu ei, tur djasabra ami ku mi ruman muhé tabata bishitá un famia Testigu di Yehova. E tata, Joe McGrath, tabata studia Beibel ku nos i su tres yu muhénan. Nan tabata un famia amabel i amoroso, i “Tio Joe,” manera nos tabata yam’é, tabata trata su esposa i yunan ku rèspèt. Mi tabata gusta bai nan reunionnan ku nan, i tin biaha nos tabata bai asambleanan grandi. Esei tabata tempunan dushi, i mi tabata sinti mi safe ku e Testigunan.

En kambio, kos malu tabata pasa ku mi na mi kas. E kosnan ku mi tata tabata hasi a kousa mi mama hopi doló i a pon’é bira hopi deprimí. Tempu mi tabatin mas o ménos dies aña, mi mama a stòp di asosiá ku Testigunan di Yehova. Mi a sigui sirbi Dios sí,  pero no di kurason. Mi a batisá ku 17 aña, pero un poko tempu despues mi a kuminsá hasi kos ku no ta pas pa un kristian, i komo konsekuensia di esei mi no tabata un Testigu di Yehova mas.

MI A DISIDÍ DI BAI BÈK

Un poko tempu despues ku mi a kasa, dos representante di e kongregashon di Testigunan di Yehova ku ta keda serka di mi kas a bishitá mi. Nan a splika mi kon mi por a drecha mi amistat ku Yehova, anto nan a hasi areglo pa un misionero ku yama Cindy yuda mi. E tempu ei, kasi mi no tabatin fe mas den Dios, i p’esei mi a pidi Cindy pa mustra mi ku Beibel realmente ta e Palabra di Dios. El a mustra mi algun profesia di Beibel ku a kumpli. Pokopoko nos a bira bon amiga, i el a ofresé pa e repasá algun siñansa básiko di Beibel ku mi. Mi a aseptá, i pa promé biaha den mi bida, mi a komprondé ku Yehova ta un Dios di amor ku ke pa mi ta felis.

Ora mi a kuminsá bai e reunionnan kristian atrobe, mi tabata gusta e kompania di e Testigunan mas ku di e hendenan ku mi tabata traha kuné tempu mi tabata aktris. Pero e kosnan ku mi a pasa aden tempu mi tabata mucha a pone mi sinti ku mi no por a konfia niun hende. Ademas, mi no tabata gusta kon mi a bira. P’esei un miembro di e kongregashon a mustra mi for di Beibel kon mi por trata ku e problemanan emoshonal ei, i tambe mi a siña kon pa haña berdadero amigu.

ALGU MIHÓ KU FAMA

Na 1997, ami ku mi kasá a muda bai Hollywood, California. Einan mi a kuminsá dediká mas tempu na yuda hende apliká loke Beibel ta siña. E trabou ei ta duna mi mas satisfakshon ku tur e fama i rikesa ku mi a haña tempu mi tabata hunga den pelíkula. Por ehèmpel, na 2002, mi a topa ku Cheri, un konosí di Hong Kong. Ami ku Cheri a eksperensiá hopi kos similar. El a sali Miss Hong Kong e aña promé ku mi, i ora mi a sali Miss Hong Kong, ta é a koroná mi. E tambe a bira un aktris. Despues el a bira un produktor di sine, i el a traha ku direktornan famoso. I meskos ku mi, e tambe a muda bai Hollywood.

Mi a sinti duele di Cheri ora mi a haña sa ku su komprometido a fayesé despues di a haña un atake di kurason. Cheri su religion budista no a dun’é ningun konsuelo. E tambe tabatin e fama ku hopi hende tabata envidiá, pero tòg e tabata tristu i no tabata konfia niun hende. Mi a kuminsá papia kuné tokante Beibel, pero debí na su kreensianan budista, tabata difísil pa el a aseptá loke Beibel ta siña.

Mi amiga Cheri den un pelíkula

Un dia, na aña 2003, Cheri a yama mi for di Vancouver, Canada, kaminda e tabata filma un pelíkula. Ku hopi entusiasmo, el a konta mi ku e tabata stür i miéntras ku e tabata atmirá e paisahe, diripiente el a kuminsá hasi orashon na bos haltu i a puntra: “Bisa mi, ta abo ta e Dios berdadero? Kon yama bo?” Na e momento ei, el a pasa banda di un Salòn di Reino i a mira e nòmber Yehova. El a sinti ku esei tabata Dios su kontesta i kier a tuma kontakto ku Testigunan di Yehova mas pronto posibel. Mi a yud’é tuma kontakto ku nan, i denter di un par di dia el a kuminsá asistí na un kongregashon di abla chines na Vancouver.

Despues Cheri a bisa mi: “E hendenan akí ta ègt interesá den mi. Mi por  bisa nan kon mi ta sinti mi.” Mi a keda hopi kontentu di tende esei, pasobra tempu ku Cheri tabata traha den e industria di sine, e no tabatin amigu. Cheri a sigui bai e reunionnan, pero na 2005 el a firma un kontrakt pa produsí dos pelíkula di taya na China, i p’esei e mester a bai biba bèk na Hong Kong. Afortunadamente, na 2006, Cheri a dediká su bida na Yehova i a batisá na un asamblea di Testigunan di Yehova na Hong Kong. Maske e tabata ke hasi mas pa Yehova, tabata difísil pa e logra esei pasobra su trabou den e industria di sine tabata eksigí hopi di dje. P’esei e tabata sintié hopi infelis.

E GOSO DI YUDA OTRO HENDE

Na 2009, Cheri su sirkunstansia di bida a kambia; el a disidí di laga e industria di sine pa e por hasi mas pa Yehova. El a haña hopi amigu den e kongregashon kristian. Awor e ta prediká e bon notisia di e Reino fultaim i ta gusta yuda hende pa nan hiba un mihó bida.—Mateo 24:14.

Cheri a disidí di siña e idioma nepales pa yuda e grupo di Testigunan di abla nepales na Hong Kong. Hopi biaha hende ta ignorá òf asta despresiá mayoria di hende di Nepal ku ta biba na Hong Kong komo ku nan ta papia masha poko ingles òf chines i pa motibu ku nan kustumbernan ta diferente. Cheri a konta mi tokante e goso ku e ta sinti ora e yuda e hendenan akí komprondé loke Beibel ta siña. Por ehèmpel, un dia ora e tabata prediká di kas pa kas, el a topa ku un señora di Nepal ku no tabata sa nada tokante e Dios berdadero, Yehova, i masha poko tokante Hesus. Cheri a mustr’é for di Beibel ku Hesus a hasi orashon na su Tata den shelu. Ora e señora a haña sa ku e por hasi orashon na e Dios berdadero, kende su nòmber ta Yehova, el a aseptá e bon notisia gustosamente. Un poko tempu despues, e señora su esposo i yu muhé tambe a kuminsá studia Beibel.—Revelashon 4:11; Lukas 22:41, 42.

Cheri awe

Ora mi a mira kuantu Cheri tabata disfrutá di e trabou di prediká fultaim, mi a puntra mi mes: ‘Ta kiko ta stroba mi di hasi loke e ta hasiendo?’ N’e tempu ei, mi tambe tabata biba na Hong Kong atrobe. Mi a disidí di hasi algun kambio den mi bida pa mi por hasi mas pa yuda hende haña sa kiko Beibel ta siña. Mi a ripará ku loke ta hasi mi realmente felis ta ora mi skucha hende i yuda nan komprondé e Palabra di Dios.

Mi a ripará ku loke ta hasi mi realmente felis ta ora mi yuda hende komprondé e Palabra di Dios

Por ehèmpel, mi a duna un kurso di Beibel na un señora di Vietnam ku tur ora tabata tristu i hopi biaha tabata awa na wowo. Awor e ta felis, i e tin bon amigu den e kongregashon.

Tantu ami komo Cheri a haña algu mihó ku fama. Nos a haña fama, i tabata emoshonante pa traha den e industria di sine. Pero nos ta haña hopi mas satisfakshon ora nos ta siña hende tokante Yehova Dios, pasobra nos sa ku nos ta glorifik’é. Nos mes por a mira ku e siguiente palabranan di Hesus ta bèrdat: “Tin mas felisidat den duna ku den risibí.”—Echonan 20:35.