Bai na kontenido

Bai na kontenido

 HISTORIA DI BIDA

Yehova A Duna Mi Mas di Loke Mi Meresé

Yehova A Duna Mi Mas di Loke Mi Meresé

Tempu mi tabatin 17 aña, mi tabatin e mesun tipo di preokupashon i ambishon ku mayoria di hóben di mi edat. Por ehèmpel, mi tabata gusta landa i hunga futbòl ku mi amigunan. Pero den un anochi mi bida a kambia kompletamente. Mi a haña un aksidente ku bròmer i mi a keda paralisá di mi nèk bai abou. Esei tabata mas o ménos 30 aña pasá, i for di e tempu ei mi ta na kama.

Mi a lanta na Alicante, un stat ku ta keda na e kosta ost di Spaña. Tempu mi tabata hóben, kada bes tabatin problema den mi famia. I p’esei mi tabata pasa mayoria di mi tempu riba kaya. Serka di mi kas tabatin un lugá di drecha tayer. Einan mi a bira amigu di un di e trahadónan ku yama José María. E tabata amabel, i el a duna mi e atenshon ku mi famia nunka a duna mi. Den tempunan difísil e tabata manera un ruman pa mi, un berdadero amigu, maske e tabata 20 aña mas grandi ku mi.

José María a kuminsá studia Beibel ku Testigunan di Yehova. Mi a ripará ku e tabata gusta studia Beibel pasobra hopi biaha e tabata papia ku mi tokante loke e tabata siña. Mi tabata skuch’é ku rèspèt, pero mi no tabata ègt interesá. Mi tabata yòn i mi kabes no tabata den e kosnan ei. Pero pronto esei a kambia.

UN AKSIDENTE KU A KAMBIA MI BIDA

En realidat, mi no gusta papia tokante e aksidente ei. Pero loke mi por bisa ta ku mi tabata bobo i iresponsabel. Den ún dia, mi bida a kambia por kompleto. Mi tabata un hóben yen di vigor, i diripiente mi tabata den hospital i mi no por a move bai niun kaminda pasobra mi tabata paralisá. Tabata hopi difísil pa mi aseptá e situashon ku mi tabata aden, i mi no tabata mira ningun motibu pa sigui biba.

José María a bin bishitá mi na hospital, i mesora el a perkurá pa Testigunan di Yehova di un kongregashon den bisindario bishitá mi regularmente. Esei a konmové mi. Asina ku mi a sali for di kuido intensivo, mi a kuminsá studia Beibel. Mi a haña sa dikon hende ta sufri i muri, i dikon Dios ta permití kos malu sosodé. Mi a siña tambe tokante Dios su promesa di un mundu den kua tur hende lo ta perfekto i niun hende lo bisa “mi ta malu.” (Isaías 33:24) Pa promé biaha den mi bida mi a haña un speransa maravioso.

Ora mi a sali for di hospital, mi a sigui studia Beibel i mi a progresá masha lihé. Ku yudansa di un ròlstul spesial mi por a asta asistí na algun reunion di Testigunan di Yehova i partisipá den e obra di prediká. Dia 5 di novèmber 1988, mi a batisá den un tobo spesial. E tempu ei mi tabatin 20 aña di edat. Yehova Dios a yuda mi mira bida na un otro manera, i esei a duna mi un aktitut positivo. Pero kiko mi por a hasi pa mustra apresio pa loke Dios a hasi pa mi?

 APESAR DI MI LIMITASHON FÍSIKO, MI NO POR “PARA KETU”

Mi tabata determiná pa no laga e echo ku mi tabata paralisá stroba mi di hasi tur loke mi tabata por den e sirbishi di Yehova. Mi tabata ke hasi progreso. (1 Timoteo 4:15) Na prinsipio, esei no tabata fásil pasobra mi famia tabata oponé mi kreensianan nobo. Pero mi rumannan den fe tabata kla pa yuda mi; nan a sòru pa mi bai reunion regularmente i pa mi partisipá den e obra di prediká.

Ku tempu tabata bisto ku lo mi bai tin mester di kuido 24 ora pa dia. Despues di hopi esfuerso mi a logra haña un lugá di kuido adekuá den e stat Valencia ku ta keda 160 kilometer na nort di Alicante. I mi a keda biba einan.

Maske mi ta paralisá, mi ta determiná pa sigui papia ku otro hende tokante mi fe

Maske mi ta paralisá, mi ta determiná pa sigui sirbi Yehova. Ku e ònderstant i otro supsidio ku mi ta haña, mi a kumpra un selular i un kòmpiuter ku mi a laga nan instalá banda di mi kama. Tur mainta un verpleegster ta sende mi kòmpiuter i mi selular. Mi ta usa un palanka ku mi por move ku mi kachete pa traha riba mi kòmpiuter. Ademas, mi tin un tipo di pèn spesial ku mi ta tene ku mi boka pa mi por taip riba un keyboard òf primi e numbernan riba mi selular.

Ku un tipo di pèn spesial Félix ta primi e numbernan riba su selular

Kon tur esakinan a yuda mi? Wèl, mi por bai riba nos website jw.org i riba nos BIBLIOTEKA ONLINE. E websitenan akí a yuda mi mashá. Hopi biaha mi ta studia i analisá publikashonnan basá riba Beibel pa oranan largu pa mi por siña mas tokante Dios i su bunita kualidatnan. I kada biaha ku mi ta sinti mi mi so òf un tiki desanimá, mi ta bai riba e website i semper mi ta haña algu ku ta animá mi.

Ademas, via mi kòmpiuter mi ta skucha i partisipá plenamente na e reunionnan. Mi por duna komentario, hasi orashon i duna diskurso. I ora nos ta studia E Toren di Vigilansia, mi por lesa e paragrafnan pa e kongregashon. Maske mi no por asistí personalmente na e reunionnan, tòg mi ta sinti ku mi ta parti di e kongregashon.

Mi telefòn i kòmpiuter ta yuda mi tambe pa partisipá den e obra di prediká. Ta bèrdat ku mi no por prediká di kas pa kas manera hopi otro Testigu di Yehova ta hasi. Pero esei no ta stroba mi, pasobra e aparatonan akí ta yuda mi kompartí mi fe ku otro hende. I mi ta disfrutá asina tantu di prediká via telefòn ku e ansianonan di mi kongregashon a duna mi e privilegio di organisá kampañanan di prediká via telefòn. E kampañanan akí ta un gran ayudo pa kristiannan ku no por sali prediká di kas pa kas pa motibu di nan edat òf problema di salú.

Félix ta duna lès di Beibel

Pero mi bida no ta drei solamente rònt di e medionan akí. Tur dia mi bon amigunan ta bishitá mi.  Hopi biaha nan ta bini ku famia i konosí ku ta interesá den Beibel pa mi papia ku nan. I tin biaha famianan ku ta bin bishitá mi ta laga mi partisipá den nan Adorashon Komo Famia. Loke mas mi gusta ta ora e muchanan bisa mi dikon nan stima Yehova.

Un famia ta laga Félix partisipá den nan Adorashon Komo Famia

Mi ta keda masha kontentu ku tur e bishitanan ku mi ta haña. Tur ora mi kamber ta yen di hende. Asta hende ku ta biba leu ta bin bishitá mi. Manera bo por imaginá, tur e amor i atenshon ku mi ta haña ta impreshoná e verpleegsternan mashá. Tur dia mi ta gradisí Yehova ku mi por ta parti di un hermandat asina maravioso.

DEN E LUCHA

Ora un hende kumindá mi i puntra mi kon ta bai, mi ta djis bisa nan: “Ata mi akí, luchando.” Ta klaru ku mi no ta e úniko ku ta lucha ku mi problemanan. Sea kual sea nos sirkunstansia, nos tur tin ku sigui den “e bon lucha di fe.” (1 Timoteo 6:12) Kiko a yuda mi wanta tur e añanan akí? Tur dia mi ta hasi orashon i gradisí Yehova ku el a duna mi bida. Mi ta purba di hasi mas tantu posibel den Yehova su sirbishi i enfoká riba e speransa ku mi tin pa futuro.

José María

Hopi biaha mi ta pensa kon bida lo ta den e mundu nobo ora ku mi por kore atrobe. Tin biaha ora ku ami i mi bon amigu José María, kende tin polio, ta huntu, mi ta bis’é den wega ku nos lo bai kore un máratòn den Paradeis. Mi ta puntr’é: “Ken bo ta kere lo gana?” E ta kontestá mi: “No ta importá ken lo gana. Loke ta importante ta pa nos ta den Paradeis pa kore.”

No tabata fásil pa mi siña biba ku mi limitashonnan. Mi sa ku tempu mi tabata yòn, mi a hasi kos di bobo, i p’esei mi mester sufri e konsekuensianan. Pero mi ta sumamente gradisidu ku Yehova no a bandoná mi. El a bendishoná mi ku hopi kos: e gana di biba, e goso di yuda otro hende, un famia spiritual rònt mundu i un maravioso speransa pa futuro. Si mi mester bisa den poko palabra kon mi ta sinti mi, lo mi bisa ku Yehova a duna mi mas di loke mi meresé. ▪