Bai na kontenido

Bai na kontenido

 TÓPIKO PRINSIPAL | KON PA TRATA KU ANSIEDAT

Ansiedat pa Motibu di Peliger

Ansiedat pa Motibu di Peliger

Alona a bisa: “Ora mi tende e sirena zona, mi kurason ta kuminsá bati masha duru mes i mi ta kore bai na un bùnker. Pero asta einan mi ta sinti mi anshá. Mi ta sinti mi pió ora mi ta pafó i no tin kaminda di skonde. Un biaha ku mi tabata kana riba kaya mi a kuminsá yora i no por a hala rosea. Ta te despues di vários ora mi a bin kalma. Nèt e ora ei e sirena a kuminsá zona atrobe.”

Alona

Guera ta djis ún di e hopi kosnan ku por pone nos bida na peliger. Por ehèmpel, si bo haña sa ku abo òf un ser kerí tin un malesa grave, e notisia ei por kai manera un bòm. I otronan ta anshá pa motibu ku nan tin miedu di futuro. Kisas nan ta puntra nan mes: ‘Mi yunan òf mi nietunan lo tin ku biba den un mundu yen di guera, krímen, polushon, kambio di klima i epidemia?’ Kon nos por trata ku e ansiedatnan ei?

En bista ku kos malu ta sosodé, “un hende prudente ta mira maldat i ta skonde.” (Proverbionan 27:12) Meskos ku nos ta protehá nos mes físikamente, asina tambe nos por tuma medida pa protehá nos salú mental i emoshonal. Entretenimentu violento i asta reportahe di notisia ku imágennan kruel por kousa ansiedat pa tantu nos mes komo pa nos yunan. Nos no ta serando wowo pa realidat ora nos evitá di wak sorto di kosnan asina, pasobra Dios no a krea nos mente pa nos yen’é ku  maldat. En bes di esei, nos mester yena nos mente ku ‘tur loke ta berdadero, hustu, puru, i ku ta promové stimashon.’ Asina, “e Dios di pas” lo duna nos pas mental i un kurason trankil.—Filipensenan 4:8, 9.

ORASHON TA IMPORTANTE

Berdadero fe ta yuda nos trata ku ansiedat. Beibel ta urgi nos pa ‘keda alerta i no neglishá orashon.’ (1 Pedro 4:7) Nos por pidi Dios pa e yuda nos i duna nos sabiduria i kurashi pa saka lo mihó di nos sirkunstansia ku e konfiansa ku “e ta tende kiko ku nos pidié.”—1 Huan 5:15.

Huntu ku su esposo, Avi

Beibel ta bisa ku no ta Dios ta “e gobernante di e mundu akí,” sino Satanas, i ku “henter mundu ta den poder di e Malbado.” (Huan 12:31; 1 Huan 5:19) Ta p’esei mes ta ku bon motibu Hesus a siña nos pa hasi orashon asina akí: “Libra nos di e Malbado.” (Mateo 6:13) Alona a bisa: “Asina ku e sirena kuminsá zona, mi ta pidi Yehova yuda mi tene mi emoshonnan bou di kontrol. Tambe mi kerido esposo ta bèl mi i hasi orashon ku mi. E orashonnan ei ta ègt yuda mi.” Ta nèt manera Beibel ta bisa: “SEÑOR ta serka di tur esnan ku ta sklama na dje, serka di tur esnan ku ta sklama na dje den bèrdat.”—Salmo 145:18.

NOS SPERANSA PA FUTURO

Den e Sermon Riba Seru Hesus a siña su siguidónan pidi den orashon: “Laga bo Reino bini.” (Mateo 6:10) E Reino di Dios lo kaba ku tur ansiedat ku ta hasi nos daño. Mediante Hesus, e “Prens di Pas,” Dios lo “hasi gueranan stòp te na e fin di tera.” (Isaías 9:6; Salmo 46:9) Beibel ta bisa: “[Dios] lo husga entre hopi pueblo . . . Nashon lo no lanta spada kontra nashon, i nunka mas nan lo no trein pa guera. . . . Ningun hende lo no spanta nan.” (Mikéas 4:3, 4) Famianan felis “lo traha kas i biba den nan; tambe nan lo planta kunukunan di wendrùif i kome nan fruta.” (Isaías 65:21) “I ningun habitante lo no bisa: ‘Mi ta malu.’”—Isaías 33:24.

Aunke awe nos tuma medida di prekoushon, tòg no ta semper fásil pa evitá “suseso imprevisto” òf evitá di ta na e lugá robes i na e momento robes. (Eklesiástes 9:11NW) Pa hopi siglo kaba, guera, violensia i malesa ketu bai ta mata bon hende. Ki speransa tin pa e víktimanan inosente ei?

Miónes di hende, un kantidat ku Dios so sa, lo bolbe biba. Aworakí nan ta drumí i ta safe den Dios su memoria te ora ku “tur esnan ku ta den graf . . . lo sali afó.” (Huan 5:28, 29) Enkuanto e resurekshon, Beibel ta sigurá nos: “Nos tin e speransa akí manera un anker pa nos alma; e ta sigur i tambe firme.” (Hebreonan 6:19) Anto Dios “a duna tur hende un garantia di esaki ya ku el a lant’é [Hesus] for di morto.”—Echonan 17:31.

Pero mientrastantu, tur hende ku ta hasi esfuerso pa agradá Dios lo haña nan enfrentá ku ansiedat. Paul, Janet i Alona a logra trata ku ansiedat pasobra nan a tuma medida práktiko, a hala serka Dios mediante orashon i a pone fe den e futuro ku Beibel ta papia di dje. Den nos kaso tambe, ‘e Dios ku ta duna speransa lo yena nos ku pleno goso i pas pa medio di nos konfiansa den dje.’—Romanonan 15:13.