Di unda maldat ta bini?

Ken a purba di pone Hesus hasi malu?—Mateo 4:8-10

Normalmente, hende ke ta onesto, amabel i na pas ku otro. Dikon anto nos ta mira asina tantu violensia, inhustisia i krueldat? Notisianan horibel a bira kos di tur dia. Ken ta tras di tur e maldat akí?—Lesa 1 Huan 5:19.

Dios a krea hende ku e tendensia pa hasi malu? Nò, al kontrario, Dios a krea hende den su imágen, ku e kapasidat pa imitá su amor. (Génesis 1:27; Yòb 34:10) Pero Dios a duna hende un regalo masha balioso tambe: boluntat liber. Ora nos promé mayornan a skohe pa hasi malu, nan a rechasá Dios su ehèmpel i a bira imperfekto. Nos a heredá e tendensia pa peka for di nan.—Lesa Deuteronomio 32:4, 5.

Maldat lo eksistí pa semper?

Dios ke pa nos resistí nos mal tendensianan. (Proverbionan 27:11) P’esei e ta siña nos kon pa evitá di hasi malu i haña berdadero felisidat. Pero, aworakí nos no por imitá e amor di Dios perfektamente.—Lesa Salmo 32:8.

Aunke aworakí tin hopi maldat, Dios ta toler’é pa solamente un poko tempu mas pa tur hende por mira e konsekuensianan tristu. (2 Pedro 3:7-9) Pero pronto tera lo ta yen di hende felis ku ta obedesé Dios.—Lesa Salmo 37:9-11.