“Mi a bai kumpra kuminda, pero ta buskuchi so mi a haña, anto 10.000 biaha mas karu ku e preis normal! E siguiente dia, e tiendanan no tabatin ni kuminda mas.”—Paul, Zimbabwe.

“Mi kasá a pone mi sinta i bisa mi ku e ta bai for di kas. Kon mi ta hasi biba ku un traishon asina? Kiko lo para di mi yunan?”—Janet, Merka.

“Ora e sirena zona, mi ta kore buska un kaminda pa skonde i kai drumi abou miéntras ku misil ta eksplotá. Oranan despues ainda mi mannan ta tembla.”—Alona, Israel.

Nos ta bibando den un tempu di ansiedat, “tempunan krítiko, difísil pa trata kuné.” (2 Timoteo 3:1) Krísis finansiero, kiebro di famia, guera, epidemia di malesa mortal, desaster natural i otro kalamidat ku hende mes ta kousa ta laga nan keda tur tolondrá. Ademas di esei, tin yen di asuntu personal ku por preokupá hende. Por ehèmpel, awendia hopi hende tin miedu di kanser, i otronan ta preokupá ku e ambiente ku nan yu- i nietunan ta lanta aden.

Pero no ta tur preokupashon ta malu. Por ehèmpel, nos por bira nèrvioso promé ku un eksamen, presentashon òf entrevista pa un trabou. Ademas, miedu di peliger ta yuda nos evitá di kousa nos mes daño. Pero demasiado ansiedat por ta dañino. Algun estudio resien ku a evaluá mas ku 68.000 adulto ta mustra ku asta un tiki ansiedat por oumentá e riesgo di un morto prematuro. Ta ku bon motibu anto Hesus a puntra: “Kua di boso, ni maske kuantu e ansha, por rèk su bida un krenchi?” Pues, demasiado ansiedat no ta alargá nos bida. P’esei Hesus a konsehá nos: “Stòp di ta anshá.” (Mateo 6:25, 27) Pero kon esei ta posibel?

Pa logra esei, nos tin tuma medidanan práktiko, kultivá un fe fuerte den Dios i karga un speransa konfiabel pa futuro. Asta si nos no ta pasando den situashonnan asina difísil aworakí, kisas den futuro sí esei lo por ta e kaso. Ban wak kon e pasonan akí a yuda Paul, Janet i Alona pa trata ku ansiedat.