Bai na kontenido

Bai na kontenido

Ken Ta e Antikristu?

Ken Ta e Antikristu?

Un pelíkula di horor tin e título Antichrist.

Un grupo musikal popular a yama nan CD Antichrist Superstar.

Friedrich Nietzsche, un filósofo di siglo 19, a publiká un buki ku el a yama The Antichrist.

Hopi biaha rei- i emperadornan di Edat Medio tabata yama nan enemigunan antikristu.

Martin Luther, un lider di Reforma Aleman, a yama e papanan katóliko romano antikristu.

PA HOPI aña kaba e palabra ‘antikristu’ ta ser usá pa referí na monarkanan i asta komo título di pelíkula. P’esei no ta nada straño ku hende por puntra nan mes: ‘Ken e antikristu ta anto? E palabra akí tin di haber ku nos awe?’ Wèl, nos por haña kontesta riba e preguntanan akí den Beibel, ku ta menshoná e palabra antikristu sinku biaha.

BEIBEL TA IDENTIFIKÁ E ANTIKRISTU

E úniko eskritor di Beibel ku a usa e palabra “antikristu” ta apòstel Huan. Kiko el a bisa tokante e antikristu? Tuma nota di loke el a skirbi den su promé karta: “Yunan stimá, ta e ora final, i manera boso a tende, e antikristu ta bini. Wèl, awor akí mes kaba hopi antikristu a aparesé, i ta p’esei nos sa ku ta e ora final. Nan tabata meimei di nos, pero nan a bai laga nos pasobra nan no tabata di nos. . . . Ta ken ta e gañadó? No ta esun ku ta nenga ku Hesus ta Kristu? Esaki ta e antikristu, esun ku ta nenga e Tata i e Yu.”—1 Huan 2:18, 19, 22.

Apòstel Huan tabata sa ku e antikristu ta tur esnan ku deliberadamente ta plama doktrina falsu tokante Hesus i su siñansanan

Kiko nos por komprondé ku e palabranan akí? Huan a bisa ku tin “hopi antikristu,” loke ta indiká ku e antikristu no ta un solo persona sino un grupo di hende. Segun Huan, esnan ku ta forma e antikristu ta hende- òf organisashonnan ku ta plama mentira, rechasá Hesus komo e Kristu, òf e Mesías, i purba di skonde ken realmente Dios i su Yu Hesukristu ta. Nan por asta pretendé di ta Kristu òf un di su representantenan. I komo ku Huan a bisa ku “nan a bai laga nos,” esei ta indiká ku nan ta rechasá e siñansanan di Beibel. Aparentemente, e grupo akí tabata eksistí kaba tempu ku Huan a skirbi su karta den “e ora final,” ku probablemente ta referí na e añanan promé ku e último apòstel di Hesus a fayesé.

Kiko mas Huan a skirbi tokante e antikristu? Papiando di e profetanan falsu, el a spièrta: “Tur mensahe inspirá ku ta deklará ku Hesukristu a bini komo hende ta di Dios. Ma e mensahe inspirá ku no ta bisa esaki di Hesus no ta di Dios. Ademas, esei ta e mensahe inspirá ku boso a tende ku lo a bini di e antikristu; wèl, awor e mensahe ei ta na mundu kaba.” (1 Huan 4:2, 3) Poko tempu despues, Huan a bolbe enfatisá esaki den su di dos karta: “Hopi gañadó a presentá den mundu; nan ta personanan ku no ta rekonosé ku Hesukristu a bini komo hende. Esun ku ta hasi esei ta e gañadó i e antikristu.” (2 Huan 7) Ta bisto anto ku Huan tabata sa ku e antikristu ta tur esnan ku deliberadamente ta plama doktrina falsu tokante Hesukristu i su siñansanan.

‘PROFETA FALSU’ I “E HÒMBER DI MALDAT”

Hesus a atvertí ku profeta falsu lo bini manera ‘lobo hambrá bistí na kueru di karné’

Hopi tempu promé ku Huan a papia di e antikristu, Hesus a atvertí su siguidónan: “Tene kuidou ku e profetanan falsu ku ta bini serka boso bistí na kueru di karné ma ku di paden ta  lobo hambrá.” (Mateo 7:15) Apòstel Pablo tambe a spièrta e kristiannan na Tesalónika: “No laga ningun hende gaña boso di ningun manera, pasobra e dia ei [e dia di Yehova] lo no bini a ménos ku e apostasia bini promé i e hòmber di maldat, e yu di destrukshon, keda revelá.”—2 Tesalonisensenan 2:3.

De echo, den e promé siglo, apóstata- i profetanan falsu tabata aktivo kaba, i tabata hasi tur loke nan tabata por pa debilitá e fe di e kongregashon kristian. Pues, ku e palabra “antikristu” Huan a referí na tur esnan ku ta plama mentira i doktrina falsu tokante Hesukristu i su siñansanan. Ora Pablo a deskribí e antikristu komo “e yu di destrukshon,” el a laga nos komprondé bon kla kiko Yehova ta pensa tokante e antikristu.

TENE KUIDOU KU E ANTIKRISTU AWE

Kiko di awe? Hende i organisashon ku ta forma e antikristu awe ainda ta rechasá Kristu i su siñansanan. Deliberadamente nan ta plama mentira ku e intenshon di konfundí hende tokante e identidat di e Tata, Yehova Dios, i su Yu, Hesukristu. P’esei nos tin bon motibu pa tene kuidou ku mentira religioso. Laga nos analisá dos ehèmpel.

Pa siglonan, hopi iglesia a promové e doktrina di Trinidat, bisando ku e Tata i e Yu ta e mesun persona. Pues, e antikristu ta duna e identidat di Yehova Dios i di Hesukristu un aspekto misterioso. Esaki ta stroba hende di kurason sinsero di imitá Hesus i hala serka Dios, manera Beibel ta animá nan pa hasi.—1 Korintionan 11:1; Santiago 4:8.

Ademas, iglesianan ta konfundí hende mas tantu ainda ora nan ta promové e uso di tradukshonnan di Beibel ku no ta usa e nòmber di Dios, Yehova. Nan ta hasi esaki apesar ku Yehova su nòmber ta aparesé mas o ménos 7.000 biaha den e teksto original di Beibel. Komo resultado, e identidat di e Dios berdadero ta bira kada bes mas misterioso.

Di otro banda, hende di kurason sinsero ku konosé e nòmber di Dios, Yehova, ta sinti nan atraí na dje. Esaki ta loke Richard a eksperensiá tempu ku el a papia ku dos Testigu di Yehova. E ta konta: “Nan a mustra mi den Beibel ku e nòmber di e Dios berdadero ta Yehova. E echo ku Dios tin un nòmber a impreshoná mi mashá. Nunka mi a yega di tende di esei.” For di e dia ei padilanti el a hasi kambionan den su bida pa biba segun e normanan di Beibel i pa agradá Yehova. E ta sigui bisa: “E echo ku mi a haña sa Dios su nòmber a yuda mi haña un amistat será kuné.”

Pa siglonan, e antikristu a laga miónes di hende keda den skuridat spiritual. Pero ora nos analisá e Palabra di Dios, Beibel, nos por sa ken ta e antikristu i libra nos mes di su mentiranan religioso.—Huan 17:17.