Bai na kontenido

Bai na kontenido

 HISTORIA DI BIDA

Un Herensia Ku A Pasa pa Shete Generashon

Un Herensia Ku A Pasa pa Shete Generashon

Hende ta bisa ku mi parse mi tata. Mi tin e mesun postura, wowo i sentido di humor kuné. Pero tambe el a duna mi un tesoro spiritual ku a pasa pa shete generashon kaba di mi famia. Laga mi konta bo nos historia.

Mi tata ta konta mi tokante nos herensia spiritual

Nos historia ta kuminsá ku Thomas (1) * Williams ku a nase dia 20 di yanüari 1815 na Horncastle, Inglatera. Su mama a fayesé ora e tabatin dos aña i su tata, John Williams, mester a lanta Thomas i su tres rumannan. John a siña Thomas e fishi di karpinté, pero Thomas kier a dediká su bida na algu otro.

Den e tempu ei, religionnan tabata lantando kabes atrobe na Inglatera. Pastor John Wesley a separá for di e Iglesia di Inglatera i a forma e Sosiedat Metodista, un grupo ku tabata promové estudio personal di Beibel i evangelisashon. Wesley su siñansanan a plama masha lihé i famia Williams a aseptá nan mesora. Thomas a bira un predikadó metodista ku a sigui Wesley i mesora el a ofresé su mes pa bai traha komo misionero na e islanan den Oséano Sur Pasífiko. Na yüli 1840, e ku su kasá, Mary, (2) a yega na Lakeba. * Esaki ta un isla volkániko na Fidji ku e tempu ei tabata habitá pa kanibal.

NAN A BIBA MEIMEI DI KANIBAL

Thomas ku Mary a pasa den pruebanan severo durante e promé añanan ku nan a biba na Fidji. Nan mester a traha oranan largu bou di kondishonnan prekario i den un higra di solo. Ademas di kanibalismo, nan a mira hopi atrosidat tambe: hende tabata strangulá biuda, mata bebi i tabatin guera entre tribu. I generalmente e hendenan lokal no tabata aseptá nan mensahe. Mary i su promé yu, John, a bira malu i nan a hera di muri. Na aña 1843, Thomas a skirbi: “Mi kurason tabata kibrá. . . . I mi tabata hopi desesperá.” Pero é ku Mary a perseverá, i nan a laga nan fe den Yehova Dios duna nan forsa.

Durante e tempu ei, Thomas a hasi bon uso di su fishi pa traha e promé kas estilo europeo na Fidji. E kas tabatin algun inovashon ku a hala atenshon di e poblashon lokal. Por ehèmpel, e tabata trahá riba staka di manera ku bientu por a pasa bou di e kas. Nèt promé ku Thomas a kaba di traha e kas, Mary a duna lus na nan di dos yu, Thomas Whitton (3) Williams, kende tabata e tatarawela di mi tata.

Na 1843, Thomas Williams Sr. a yuda tradusí e evangelio di Huan na idioma fidji, un trabou ku el a haña masha difísil. * Sinembargo, antropologia sí tabata su kuki, pasobra e tabata un bon opservadó. El a dokumentá e resultadonan di su investigashon  den su buki Fiji and the Fijians (1858), ku ta deskribí bida di e hendenan na Fidji den siglo 19.

Despues di 13 aña di trabou duru na Fidji, Thomas Sr. su salú a bai asina atras ku el a hañ’é ta bai biba na Australia ku su famia. Despues di un karera largu i notabel komo pastor, Thomas a muri na Ballarat, Victoria, na 1891.

MINA DI “ORO” DEN WÈST

Na 1883, Thomas Whitton Williams, su kasá Phoebe, (4) i nan yunan a muda bai Perth, na Wèst Australia. Nan di dos yu Arthur Bakewell (5) Williams, ku ta mi tatarawela, tabatin nuebe aña e tempu ei.

Tempu Arthur tabatin 22 aña, el a bai buska un mihó porvenir na Kalgoorlie, un stat konosí pa su mina di oro, un 600 kilometer ost di Perth. Einan el a lesa algun literatura di e Studiantenan Internashonal di Beibel, manera e Testigunan di Yehova tabata ser yamá e tempu ei. Tambe el a aboná riba e revista Zion’s Watch Tower. El a keda asina enkantá ku loke el a lesa ku el a kuminsá kompartí e konosementu ei ku otro hende i forma grupo pa studia Beibel. Asina e aktividatnan di Testigunan di Yehova a kuminsá na Wèst Australia.

Arthur a konta su famia tambe di e kosnan nobo ku el a siña. Su tata, Thomas Whitton, a apoy’é, pero poko tempu despues el a fayesé. Su mama, Phoebe, i su ruman muhénan, Violet i Mary, tambe a bira Studiante di Beibel. Violet a bira un pionero, esta, un predikadó di tempu kompleto. Arthur a bisa ku Violet tabata “e pionero di mas zeloso i diligente di Wèst Australia.” Kisas Arthur a eksagerá un tiki, pero Violet su zelo sin duda tabatin gran influensia riba e siguiente generashon di famia Williams.

Ku tempu, Arthur a kasa i muda bai Donnybrook, un stat kaminda tabatin hopi plantashon di mata di fruta na zùitwèst di Wèst Australia. Einan el a haña e beinam “E Loko di 1914” pasobra e tabata papia zelosamente di e profesianan di Beibel ku mester a kumpli den e aña ei. * Tur e bofon ei a stòp ora Promé Guera Mundial a dal aden. Arthur tabata prediká regularmente na e klientenan ku tabata bin kumpra kos den su tienda. Den e bentana di e tienda e tabata pone literatura di Beibel pa tur hende mira. Ademas, el a kologá un bòrchi na e bentana ku tabata bisa ku e lo a duna 100 pònt britániko na esun ku por a proba ku Trinidat ta eksistí, un doktrina ku e mes a rechasá firmemente. Niun hende no a haña e plaka.

E kas di famia Williams a bira e lugá sentral pa studia Beibel den grupo i pa tene reunion di kongregashon na Donnybrook. Mas despues, Arthur a konstruí un di e promé Salònnan di Reino, òf lugá di reunion, na Wèst Australia. Te ku su kasi 80 aña, e tabata dal su bachi i dashi, siya su kabai bieu ku  tabata yama Doll i bai prediká den henter e distrito di Donnybrook.

Arthur tabata un hòmber ketu, zeloso i masha respetá. Esaki a hasi un impakto profundo riba su yunan. Su yu muhé Florence (6) a sirbi komo misionero na India. Arthur su yu hòmbernan, Arthur Lindsay (7) i Thomas, tambe a sirbi pa hopi aña komo ansiano di kongregashon meskos ku nan tata.

E DUSHI APEL LADY WILLIAMS

Mi bisatawela, Arthur Lindsay Williams, tabata un hòmber konosí i mashá stimá pa su karakter amabel. Semper e tabatin tempu pa hende i tabata trata nan ku rèspèt. E tabata kampion den kapmentu di palu i a yega di gana 18 kampeonato regional den 12 aña.

Sinembargo, Arthur no a keda masha kontentu ora ku mi tawela, Ronald, (8) ku tabatin dos aña di edat e tempu ei, a kue un hacha i kap un palu chikí di apel ku tabatin banda di nos kas. E mama di Ronald a mara e palu, i despues di tempu e palu a pari apel masha dushi mes. Nan a yama e apel ei Lady Williams, un variedat nobo di apel ku despues hende a usa pa produsí un otro tipo di apel ku yama Cripps Pink, un di e apelnan di mas konosí na mundu.

Ménos mal ku mi tawela Ronald a haña mihó ko’i hasi ku su mannan ora el a bira grandi. E ku mi wela a sirbi shete aña komo trahadó boluntario riba proyektonan di konstrukshon di Testigunan di Yehova na Australia i na Islanan Sálomon. Awor mi tawela tin kasi 80 aña, pero ainda e ta sirbi komo ansiano di kongregashon, i e ta yuda traha i renobá Salònnan di Reino na Wèst Australia.

ORGUYOSO DI MI HERENSIA

Siguiendo e ehèmpel di nos antepasadonan, mi mayornan Geoffrey (9) ku Janice (10) Williams, a traha duru pa inkulká e prinsipionan di Beibel den ami (12) ku mi ruman muhé Katharine (11) segun ku nos tabata krese. Ora mi tabatin 13 aña, mi a disidí di biba segun e normanan ei i sirbi Dios pa restu di mi bida. Mi a disidí di hasi esaki e anochi despues di a skucha un diskurso na un asamblea. Einan John E. Barr, un miembro di e Kuerpo Gobernante di Testigunan di Yehova, a bisa e hóbennan: “No tira e kos di mas presioso ku bo tin afó, esta, e oportunidat di konosé i stima Yehova.” Dos aña despues mi a kuminsá traha komo pionero.

Awe, ami ku mi kasá Chloe ta disfrutá di e trabou di tempu kompleto den un área aislá. Nos ta prediká na un pueblo minero ku yama Tom Price, na nortwèst di Wèst Australia. Nos ta traha partaim pa kubri nos gastunan. Mi mayornan, mi ruman muhé, Katherine, i su kasá, Andrew, ta traha komo pionero na Port Hedland ku ta keda un 420 kilometer nort di Tom Price. Ami ku mi tata ta sirbi tambe komo ansiano di kongregashon.

For di shete generashon pasá, mi antepasado Thomas Williams tabata desididu pa sirbi Yehova fielmente. Mi ta orguyoso di por a haña e herensia spiritual balioso akí.

^ par. 5 E numbernan den e artíkulo akí ta korespondé ku e personanan ku tin riba e potrètnan na página 12 i 13.

^ par. 6 Ántes e isla tabata yama Lakemba. E ta situá na e archipiélago di Lau na e parti ost di Fidji.

^ par. 10 E misionero John Hunt a tradusí gran parti di e Tèstamènt Nobo na e idioma fidji ku a ser publiká na 1847. Algu remarkabel di e tradukshon akí ta ku e tin e nòmber divino, “Jiova,” na Marko 12:36, Lukas 20:42 i Echonan 2:34.

^ par. 16 Wak e tópiko “1914—Un Aña Signifikativo den Profesia Bíbliko” den e apèndiks di e buki Kiko Beibel Ta Siña Realmente? publiká pa Testigunan di Yehova i disponibel online i pa download for di jw.org/pap.