Dios lo permití hende sigui goberná i pone e futuro di humanidat na peliger? Esei sigur ku nò. Manera nos a mira, Dios lo tuma akshon i pone fin na sientos di aña di opreshon i miseria. E Kreador di hende i tera ke pa bo sa ku su tempu pa tuma akshon ta aserkando. Kon e ta revelá e detaye importante akí na nos?

Wèl, imaginá bo ku bo ke biaha di un pais pa otro ku outo. Probablemente, promé ku bo bai, bo ta buska informashon tokante e ruta riba Internet, wak mapa i chèk otro fuentenan. Anto, tanten ku bo ta stür, bo ta mira bòrchi- i lugánan ku ta duna bo e siguransa ku bo ta serka di yega bo destinashon. Meskos ku un mapa, Dios a duna nos su Palabra, Beibel, i e ta menshoná un seri di akontesimentu mundial impaktante. I e susesonan históriko ei ku ta tumando lugá ta konvensé nos ku nos ta bibando den e tempu di fin.

Segun Beibel, lo tin un periodo krusial den historia di humanidat ku lo kulminá den e fin. Den e tempu ei, hende rònt mundu lo eksperensiá un kombinashon nunka bisto di akontesimentu i sirkunstansia. Laga nos wak algun di e akontesimentunan akí ku Beibel ta papia di dje.

1. PROBLEMANAN MUNDIAL E profesia na Mateo kapítulo 24 ta menshoná susesonan ku lo tuma lugá riba tera ku ta forma parti di ún señal. E señal ei lo mustra ku nos ta bibando den e “konklushon di e era akí” ku lo hiba na “e fin.” (Versíkulo 3, 14) Algun di e susesonan akí ta guera, skarsedat di kuminda, temblor den un lugá tras di otro, oumento di maldat, falta di amor i tambe astusia di lidernan religioso pa gaña hende. (Versíkulo 6-26) Ta bèrdat ku e kosnan akí tin hopi siglo ta tumando lugá, pero segun ku e fin ta aserká, nan tur lo sosodé pareu den e mesun periodo di tempu. Ademas di e susesonan akí, lo tin tambe e siguiente tres profesianan ku lo indiká ku e fin ta serka.

2. AKTITUT DI HENDE Beibel ta bisa ku den “e último dianan,” esta, e tempu ku lo hiba na e fin, aktitut di hende lo bai di malu pa pió. E ta bisa: “Hende lo stima nan mes, stima plaka; nan lo ta bromadó, arogante, blasfemadó, desobediente na mayornan, malagradesí, desleal, sin kariño; nan lo no ta dispuesto pa sera ningun akuerdo; nan lo ta kalumniadó, sin dominio propio, feros, sin amor pa loke ta bon, traidor, kabesura, hinchá di orguyo, ku ta stima plaser en bes di stima Dios.” (2 Timoteo 3:1-4) Ta bèrdat ku pa hopi tempu kaba hende ta falta otro rèspèt, pero ta solamente den “e último dianan” akí nan aktitut lo bira asina malu. P’esei mes nos por deskribí e periodo akí komo “tempunan krítiko, difísil pa trata kuné.” Abo a ripará ku aktitut di hende a bira pió?

3. HENDE TA RUINÁ NOS PLANETA Segun Beibel, Dios lo “kaba ku esnan ku ta kaba ku e tera.” (Revelashon 11:18) Den ki manera hende ta ruinando òf kabando ku e tera akí? Wèl, meskos ku nan a hasi den tempu di Noe: “Tera tabata korumpí [òf, ruiná, NW] den bista di Dios i tera tabata yen di violensia. Anto Dios a tira un bista riba tera, i mira, e tabata korupto [òf, ruiná, NW].” P’esei, Dios a bisa di e hendenan malbado di e tempu ei: “Mi ta bai destruí nan.” (Génesis 6:11-13) Bo ta mira ku tur dia tin mas i mas violensia den e mundu akí? Ademas, awe hende tin asina tantu arma disponibel ku nan tin e kapasidat di kaba ku bida di tur hende. Fuera di esei, hende ta ruinando e tera na un otro manera tambe. Mal maneho di hende ta pone ku tiki tiki nan ta kaba ku  tur loke ta sostené bida, esta, e aire ku nos ta inhalá, e oséanonan i e ekosistemanan di mata i bestia.

Puntra bo mes: ‘Un poko mas ku shen aña pasá, hende tabatin e kapasidat pa kaba ku nan mes?’ Nò, pero awendia sí. Hende ta usa e kapasidat ei pa akumulá armanan potente i pa kaba ku e medio ambiente. Ademas, ta parse ku hende no por komprondé e konsekuensianan di avansenan teknológiko ni tene esakinan bou di kontrol. Sinembargo, e futuro di nos planeta no ta den man di hende. Dios ta primintí ku promé ku hende yega asina leu di kaba ku bida riba tera, lo e tuma akshon i destruí nan.

4. E TRABOU MUNDIAL DI PREDIKÁ Un otro parti di e profesia na Mateo ta ku un trabou sin presedente lo a tuma lugá. Mateo 24:14 ta bisa: “E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.” E trabou mundial di prediká akí lo ta totalmente diferente for di kualke otro trabou di prediká ku mayoria di religion a hasi durante siglonan. Durante e último dianan, un mensahe spesífiko lo a ser enfatisá, esta, ‘e bon notisia di e Reino.’ Abo sa di un grupo religioso ku ta enfatisá e mensahe akí? I si akaso nan ta prediká e mensahe akí, ta un grupo lokal nan ta òf ta “den henter e tera habitá” nan ta plama e mensahe akí “komo testimonio pa tur nashon”?

E Reino di Dios ta ser prediká na tur parti di mundu den sientos di idioma

E website www.jw.org ta focus riba ‘e bon notisia di e Reino.’ E website tin publikashon ku ta splika e mensahe ei den mas ku 700 idioma. Kua otro organisashon ta hasi asina tantu esfuerso pa pone énfasis riba e bon notisia di e Reino rònt mundu? Hopi tempu promé ku Internet a eksistí, ya kaba Testigunan di Yehova tabata bon konosí pa nan esfuersonan di plama e mensahe di e Reino di Dios. For di 1939, e palabranan “Anunsiando e Reino di Yehova Dios” ta aparesé riba portada di E Toren di Vigilansia. Un buki tokante religion ta komentá ku ta Testigunan di Yehova so ta alkansá asina tantu hende ku nan trabou di prediká. E obra akí ta enfatisá e bon notisia ku pronto e Reino di Dios lo trese e fin.

UN PERIODO KRUSIAL DEN HISTORIA DI MUNDU

Bo a ripará ku tur e kuater profesianan akí ku Beibel ta duna komo parti di e señal ta tumando lugá den nos tempu? Pa un poko mas ku 100 aña kaba e revista akí ta informando su lektornan tokante susesonan mundial pa yuda nan komprondé ku e fin ta serka. Di mes, tin hende ku ainda ta duda den esaki i ta haña ku hende ta  eksagerá. Pa nan, ta keda na kada ken pa kere na unda e susesonan akí ta hiba nos. Nan ta pretendé tambe ku ta pa motibu di e avansenan den medionan di komunikashon, e problemanan mundial ta parse mas grave. Sinembargo, tin mas i mas prueba ku nos ta yegando na final di un periodo krusial den historia di humanidat.

Algun eksperto ta pensa ku tin kambionan drástiko na kaminda pa nos planeta. Por ehèmpel, na 2014, algun sientífiko riba tereno di siensia i seguridat ku sa traha den asosiashon ku e revista Bulletin of the Atomic Scientists a spièrta e Konseho di Siguridat di Nashonnan Uní tokante e peligernan di mas grandi pa humanidat. Nan a bisa: “Despues di analisá tur e peligernan akí, nos a yega na e konklushon ku ainda tin un riesgo grandi ku avansenan riba tereno di teknologia por kousa un katástrofe ku por kaba ku henter humanidat.” Hopi hende ta mas konvensí ku nunka ku nos ta den un periodo krusial den historia di mundu. P’esei tantu e editornan komo e lektornan di e revista akí ta konvensí ku e tempu ku nos ta biba aden sin duda ta e último dianan i ku e fin ta serka. Pero en bes di tin miedu di futuro, bo por ta optimista. Dikon? Pasobra bo tambe lo por sobrebibí e fin!