Bai na kontenido

Bai na kontenido

 BEIBEL TA KAMBIA BIDA DI HENDE

Tres Pregunta Ku A Kambia Mi Bida

Tres Pregunta Ku A Kambia Mi Bida
  • NASÍ NA AÑA: 1949

  • PAIS NATAL: MERKA

  • SU PASADO: TABATA BUSKA UN PROPÓSITO DEN BIDA

MI PASADO:

Mi a krese na Ancram, un pueblito den e estado di New York. Den gran parti di e pueblito tabatin boerderij ku ta prosesá produkto di lechi. De echo, tabatin mas baka ku hende.

Mi famia tabata bai na e úniko misa ku tabatin den e pueblo. Djadumingu mainta mi opa tabata pòlish mi sapatunan, i despues mi tabata bai zondagschool ku un Beibel blanku chikitu ku mi oma a regalá mi. Mi famia a siña ami ku mi rumannan pa traha duru, respetá nos bisiñanan i yuda nan i pa ta gradisidu pa tur loke nos tin.

Ora mi a bira grandi, mi a bai biba otro kaminda i mi a bira yùfrou di skol. Mi tabatin yen di pregunta tokante Dios i bida. Algun di mi alumnonan tabatin hopi talento. Otronan no tabatin e mesun talentonan ei, pero nan tabata hasi nan bèst sí. Tin di nan tabatin desabilidat físiko miéntras ku otronan tabatin hopi bon kondishon. Pa ami, e situashon akí tabata inhustu. Tin biaha e mayornan di e alumnonan desafortuná tabata bisa kosnan manera: “Ta asina Dios a traha mi yu.” Mi tabata puntra mi mes dikon Dios ta laga algun bebi nase ku desabilidat. Kon ku bai bin, e bebi no a hasi nada malu.

Tambe mi tabata puntra mi mes: “Kiko mi tin ku hasi pa mi tin un propósito den bida?” Mi tabata sinti ku añanan tabata pasa bai sin mi hasi nada ku ta bale la pena. Mi a lanta den un bon famia, mi a bai bon skol i mi tabatin un trabou ku mi tabata gusta. Pero mi tabata sinti un bashí grandi den mi bida. Mi tabata spera ku un dia lo mi por a kasa, tin un kas bunita, haña yu, sigui traha te ora mi baha ku penshon i finalmente bai den un kas di kuido. Mi tabata puntra mi mes si tabatin algu mas den bida.

BEIBEL A KAMBIA MI BIDA:

Un biaha, den zomer, ami ku algun kolega a bai keiru rònt Europa. Nos a bishitá e Monasterio di Westminster, Katedral di Notre-Dame, Vatikano i tambe hopi otro misa mas chikitu. Tur kaminda ku mi a bai, mi a hasi e preguntanan ku mi tabatin. Ora  ku mi a bai kas bèk na Sloatsburg, New York, mi a bishitá vários misa. Pero nan no por a duna mi kontesta satisfaktorio.

Riba un dia, un di mi alumnonan di 12 aña di edat a aserká mi i a hasi mi tres pregunta. Promé, el a puntra mi si mi tabata sa ku e ta un Testigu di Yehova. Mi a bis’é ku sí. Despues, el a puntra mi si mi kier a sa mas tokante Testigunan di Yehova. Atrobe mi a bis’é sí. Por último, el a puntra mi unda mi tabata biba. Ora mi a dun’é mi adrès, nos a ripará ku mi tabata biba djis na skina di e kaya kaminda é ku su famia tabata biba. Na e momento ei mi no por a imaginá kon e tres preguntanan di e mucha muhé akí lo a bin kambia mi bida pa semper.

Poko tempu despues, el a bini riba baiskel pa studia Beibel ku mi. Mi a hasié e mesun preguntanan ku mi a hasi vários lider religioso. Na kontraste ku nan, e mucha muhé akí sí a duna mi kontesta kla i satisfaktorio for di mi mes Beibel—kontestanan ku nunka mi a yega di haña!

Loke mi a siña for di Beibel a yena mi ku goso i satisfakshon. E teksto di 1 Huan 5:19 a konmové mi mashá. E ta bisa: “Henter mundu ta den poder di e Malbado.” Mi a sinti un alivio ora mi a siña ku no ta Dios ta kousa tur e tristesa i doló ku nos ta mira rònt di nos, sino Satanas, i ku Dios ta bai drecha e situashon akí pronto. (Revelashon 21:3, 4) Mi a bin realisá ku e siñansanan di Beibel ta lógiko basta nan ta bon spliká. Maske e Testigu ku a studia ku mi tabatin apénas 12 aña di edat, mi a yega na e konklushon ku e bèrdat ta keda e bèrdat sin importá ken tres’é padilanti.

Tòg mi tabata ke wak si e Testigunan ta praktiká loke nan ta prediká. Por ehèmpel, e mucha muhé tabata pone énfasis riba kualidatnan manera pasenshi i amabilidat ku kristiannan berdadero mester demostrá. (Galationan 5:22, 23) Pues mi a disidí di wak si di bèrdat e mes tabata demostrá e kualidatnan akí. Un dia, pa malu mi a yega lat pa mi estudio. Mi a hasié djis pa mi wak si lo el a keda warda riba mi, i no rabia pa esei. Wèl, ora mi a kore drenta mi kurá di kas, mi a mir’é ta warda dilanti di mi porta di kas. El a kore bini na mi outo i bisa: “Mi a hera di bai kas pa bisa mi mama bèl polis i hospital pa wak si yùfrou ta bon pasobra yùfrou no sa yega lat nunka. Mi tabata tur preokupá!”

Un otro biaha mi a hasié un pregunta ku mi a pensa ku lo ta difísil pa un mucha di 12 aña kontestá. Mi kier a wak si lo el a djis inventá un kontesta. Ora mi a puntr’é, el a wak mi ku un kara serio i bisa mi: “Esei sí ta un pregunta difísil. Mi ta bai skirbié pa mi puntra mi mayornan.” Manera el a primintí, e siguiente biaha ku el a bini pa nos studia, el a trese un Toren di Vigilansia ku tabatin e kontesta pa mi pregunta. Esei ta loke a atraé mi na e Testigunan di Yehova: nan publikashonnan ta duna kontesta basá riba Beibel pa tur mi preguntanan. Mi a sigui studia ku e mucha muhé i despues di ún aña mi a batisá komo Testigu di Yehova. *

E BENEFISIONAN:

Ora ku por fin mi a haña kontesta satisfaktorio pa mi preguntanan, mi kier a kompartí nan ku tur hende. (Mateo 12:35) Na kuminsamentu mi famia no tabata di akuerdo ku mi kreensianan nobo. Pero ku tempu nan aktitut a kambia. Mi mama a kuminsá studia Beibel poko tempu promé ku el a fayesé. Maske e no a logra batisá, mi tin sigur ku el a disidí di sirbi Yehova.

Na 1978, mi a kasa ku un Testigu ku yama Elias Kazan. Na 1981 nos a haña invitashon pa bira miembro di e famia di Bètel na Merka. * Lamentablemente, Elias a fayesé despues di apénas kuater aña ku nos a sirbi einan. Maske mi tabata biuda, mi a keda sirbi na Bètel. Esaki a yuda mi keda di focus i tabata un konsuelo pa mi.

Na aña 2006, mi a kasa ku Richard Eldred, un miembro di e famia di Bètel. Ami ku Richard ta sigui disfrutá di nos privilegio di sirbi einan. Awor ku mi a haña e bèrdat tokante Dios, mi ta ègt sinti ku mi a haña no solamente kontesta pa mi preguntanan sino tambe un bida ku berdadero propósito. I tur esaki a kuminsá ku tres pregunta di un mucha muhé.

^ par. 16 Na tur, e mucha muhé akí i su rumannan mas grandi a yuda sinku di nan maestronan studia Beibel i kuminsá sirbi Yehova.

^ par. 18 “Bètel” ta nifiká “Kas di Dios.” Asina Testigunan di Yehova ta yama nan sukursalnan rònt mundu. (Génesis 28:17, 19) E miembronan di e famia di Bètel ta kumpli ku vários tarea pa apoyá e trabou edukativo di Testigunan di Yehova.