“Ora bo tin un amistat será ku Dios, bo ta haña un sintimentu di siguridat, satisfakshon i stabilidat. Bo ta sinti ku Dios ta pendiente di bo i semper ke lo mehor pa bo.”—CHRISTOPHER, UN YÒNKUMAN DI GANA.

“Dios ta mira ora bo ta tristu, i e ta duna bo muchu mas amor i atenshon ku bo ta ferwagt.”—HANNAH, UN MUCHA MUHÉ DI 13 AÑA DI ALASKA.

“E echo ku mi sa ku Dios ta mira mi komo su amiga, ta laga mi sinti trankil. Su amistat ta e kos di mas balioso ku mi tin.”—GINA, UN SEÑORA DI 45 AÑA DI JAMAICA.

Christopher, Hannah i Gina no ta e únikonan ku ta sinti asina. Hopi hende rònt mundu ta konvensí ku Dios ta mira nan komo su amigunan. Kiko di abo? Bo ta sinti ku bo tin un amistat ku Dios? Lo bo ke tin un mihó relashon kuné? Kisas bo ta puntra bo mes: ‘Un simpel ser humano manera mi por ta amigu di e Dios Todopoderoso? Kon esei ta posibel?’

BO POR TA AMIGU DI DIOS

Segun Beibel, nos por tin un amistat íntimo ku Dios. Por ehèmpel, Isaías 41:8 ta bisa ku Dios a yama Abraham, e patriarka hebreo, “mi amigu.” Ademas, nos ta haña e siguiente invitashon kaluroso na Santiago 4:8: “Hala serka Dios, i lo e hala serka boso.” Pues, ta bisto ku un bon relashon ku Dios ta posibel. Sí, nos por ta amigu di Dios. Pero kon nos por “hala serka” dje si e ta invisibel?

Pa kontestá e pregunta akí, pensa un ratu riba kon dos hende ta sera amistat ku otro. Normalmente, ora nan topa pa promé biaha, nan ta sera konosí ku otro i bisa nan nòmber. Despues, segun ku nan ta sigui trata ku otro regularmente, nan ta kompartí loke nan ta sinti i pensa, i nan amistat ta krese. Anto nan amistat ta bira mas será ainda ora nan ta hasi kos pa otro. Tur esaki ta konta tambe si nos ke tin un amistat será ku Dios. Ban wak kon esei ta posibel.