ALGUN tempu pasá, e korte di un pais oksidental a sentensiá dos hòmber na morto pa motibu ku supuestamente nan a kometé asesinato. Pero e akusashon tabata infundá. Unabes ku e eror a sali na kla, e abogadonan a traha duru i a logra haña libertat pa ún di e akusadonan. Pero ni e mihó abogadonan no por a hasi nada pa e otro akusado; nan a ehekut’é kaba.

Ya ku e tipo di kasonan akí por pasa den kualke sistema hudisial, Beibel ta urgi: “Sigui hustisia, i solamente hustisia.” (Deuteronomio 16:20) Kaminda huesnan sigui e prinsipio ei, siudadanonan ta sinti nan protehá. E Lei di Dios a duna Israel di antigwedat un sistema hudisial basá riba hustisia i imparsialidat. Laga nos analisá e Lei ei pa wak si en bèrdat “tur [Dios] su kamindanan ta hustu.”—Deuteronomio 32:4.

HUESNAN “SABÍ KU TIN DISERNIMENTU I EKSPERENSIA”

Ora huesnan ta kompetente, hustu i liber di korupshon, hende ta sinti nan mes protehá. E Lei ku Dios a duna Israel a mustra kon importante huesnan asina tabata. Na kuminsamentu di Moises su biahe den desierto, Yehova Dios a bis’é pa skohe “hòmbernan kapas ku ta teme Dios, hòmbernan konfiabel . . . ku ta odia ganashi desonesto” pa sirbi komo hues. (Éksodo 18:21, 22) Kuarenta aña despues, Dios a bolbe enfatisá ku mester di “hòmbernan sabí ku tin disernimentu i eksperensia” pa husga e pueblo.—Deuteronomio 1:13-17.

Siglonan despues, Rei Yehosafat * di Huda a bisa e huesnan: “Pensa bon kiko boso ta hasi, pasobra no ta pa hende boso ta husga, sino pa SEÑOR, kende ta huntu ku boso ora boso ta duna huisio. P’esei awor, laga e temor di SEÑOR ta riba boso; tene masha kuidou kiko boso ta hasi, pasobra SEÑOR nos Dios lo no tin parti den inhustisia, ni den distinshon di persona, ni den tumamentu di plaka pasá bou di mesa.” (2 Krónikanan 19:6, 7) Pues, e rei a kòrda e huesnan ku si nan a laga kudishi òf prehuisio afektá nan desishonnan, Dios lo a tene nan responsabel pa kualke daño ku esaki por a kousa.

Ora e huesnan di Israel a pega na e normanan haltu ei, e nashon a sintié sigur i protehá. Pero tambe e Lei di Dios a perkurá sierto prinsipionan ku a yuda e huesnan tuma desishonnan hustu, asta den e kasonan di mas difísil. Kua ta algun di e prinsipionan akí?

PRINSIPIONAN KU A HIBA NA DESISHONNAN HUSTU

Maske e huesnan israelita mester tabata hòmbernan sabí i kapas, nan no mester a dependé di nan mes abilidat i sabiduria. Yehova Dios a duna nan prinsipionan ku lo por a yuda nan tuma desishonnan korekto. Laga nos wak algun di e prinsipionan akí.

Investigá kada kaso a fondo. Mediante Moises, Dios a duna e huesnan israelita e siguiente instrukshon: “Tende e kasonan entre boso paisanonan, i husga hustamente.” (Deuteronomio 1:16) Un hues  por yega na un veredikto hustu solamente si e tin tur e detayenan di un kaso. Pa e motibu akí Dios a duna esnan ku tabata atendé kasonan hudisial e siguiente instrukshon: “Bo mester investigá i buska pa sa i informá profundamente.” E huesnan mester a hasi sigur ku e akusashon den un kaso kriminal ‘tabata bèrdat’ promé ku nan a sigui ku e kaso.—Deuteronomio 13:14; 17:4.

Skucha testimonio di e testigunan. E testimonio di e testigunan tabata hopi importante den un investigashon. Dios su Lei a bisa: “Un solo testigu no mester lanta kontra un hende pa motibu di kualke inikidat òf kualke piká ku el a kometé; riba testimonio di dos òf tres testigu un kaso ta keda konfirmá.” (Deuteronomio 19:15) E Lei di Dios a instruí e testigunan: “No plama rumor falsu; no tene man ku hende malbado komo un testigu malisioso.”—Éksodo 23:1.

Eksigí onestidat den korte. E kastigu ku un testigu por a haña pa gañamentu den korte tabata sirbi komo un spièrtamentu serio pa tur esnan enbolbí: “Huesnan mester hasi un investigashon profundo; i si e testigu ta un testigu falsu i el a akusá su ruman falsamente, e ora ei boso mester hasi kuné meskos ku e tabatin intenshon di hasi ku su ruman. Asina bo mester kita e maldat for di meimei di boso.” (Deuteronomio 19:18, 19) Pues, si un hende a gaña den korte pa haña un otro hende su herensia, komo kastigu e lo tabatin ku paga un montante ekivalente. Si un hende a gaña deliberadamente riba un otro hende inosente pa nan sentensi’é na morto, lo el a pèrdè su mes bida. E prinsipio akí tabata un motivashon fuerte pa nan papia bèrdat.

Husga sin parsialidat. Unabes ku nan tabatin tur evidensia, e huesnan tabata deliberá tokante e asuntu pa yega na un veredikto. Spesialmente na e momento ei, nan mester a tene kuenta ku un aspekto sumamente importante di Dios su Lei: “No faboresé e pober, ni onra esun poderoso, ma husga  bo próhimo ku hustisia.” (Levítiko 19:15) Den tur kaso ku nan a trata, huesnan mester a husga a base di echo i no a base di aparensia òf nivel sosial di esnan enbolbí.

E prinsipionan ku Dios a duna Israel den su Lei ainda por ta útil den kortenan djawendia. Si huesnan apliká nan, nan por evitá di kometé fayonan hudisial i dikta kastigunan inhustu.

Si huesnan apliká e prinsipionan di e Lei di Dios, nan lo por evitá di kometé fayonan hudisial

HENDE KU A BENEFISIÁ DI BERDADERO HUSTISIA

Moises a hasi e israelitanan e siguiente pregunta: “Ki gran nashon tin, ku tin statutonan i huisionan asina hustu, manera henter e Lei akí ku mi ta pone boso dilanti awe?” (Deuteronomio 4:8) En bèrdat, no tabatin ningun otro nashon ku tabatin un sistema hudisial asina. Rei Sálomon a hasi su bèst pa sigui Yehova su leinan den su hubentut. Bou di su gobernashon e pueblo a “biba den siguridat,” a disfrutá di pas i prosperidat, i a “kome, bebe i regosihá.”—1 Reinan 4:20, 25.

Lamentablemente, ku tempu e israelitanan a bira lomba pa Dios. Pa medio di profeta Yeremías, Dios a deklará: “Ata, nan a rechasá e palabra di SEÑOR; anto ki sorto di sabiduria nan tin?” (Yeremías 8:9) Komo resultado, Herúsalèm a bira “e stat dramadó di sanger” yen di “abominashon.” Finalmente, Herúsalèm a ser destruí i a keda bandoná pa 70 aña.—Ezekiel 22:2; Yeremías 25:11.

Profeta Isaías a biba durante e tempunan difísil ku Israel a pasa aden. Pensando riba e historia di Israel, Isaías a sintié motivá pa deklará un bèrdat importante tokante Yehova Dios i Su Lei: “Ora bo huisionan bini riba tera, e habitantenan di mundu ta siña hustisia.”—Isaías 26:9.

Isaías mes lo mester a keda masha kontentu ora el a ser inspirá pa profetisá tokante e gobernashon di e Rei Mesiániko, Hesukristu, bisando: “E lo no husga segun loke su wowo ta mira, ni hasi desishon segun loke su orea ta tende; ma ku hustisia e lo husga e pobernan, i disidí ku onestidat pa e afligínan di e tera.” (Isaías 11:3, 4) Ki un futuro maravioso ta warda tur esnan ku lo bira siudadano di e Reino di Dios den man di e Rei Mesiániko!—Mateo 6:10.

^ par. 6 E nòmber Yehosafat ta nifiká “Yehova Ta Hues.”