• NASÍ NA AÑA: 1960

  • PAIS NATAL: LÍBANO

  • SU PASADO: EKSPERTO DEN KUNG FU

MI PASADO:

Mi a lanta den un área ku yama Rmeich, serka di e frontera entre Israel i Líbano, durante un guera sivil. Mi ta kòrda kla kla e eksploshonnan di mina di tera i e víktimanan inosente ku a pèrdè man i pia. Bida tabata duru. Krímen i violensia tabata reina tur kaminda.

Nos famia tabata miembro di Iglesia Maronita, un di e iglesianan katóliko oriental. Mi tata semper tabata drùk pasobra e tabatin ku perkurá materialmente pa nos famia ku tabata konsistí di 12 miembro. Pero mi mama semper tabata sòru pa nos bai misa. Ku tempu, mi a kuminsá sinti ku ni iglesia ni komunidat en general no tabata apoyá esnan ku mas tabatin mester di yudansa.

Tempu mi tabata tiner, mi a kuminsá gusta kung fu. Mi tabata train pisá i mi a bira ábil den tira moketa, ‘drop kick’ i den usa diferente arma di arte marsial. Mi tabata pensa ku si mi no por a kaba ku guera, por lo ménos mi por a purba para violensia. Asina mi a mira dos hende bringa, mi tabata bula aden i purba stòp nan. Mi no tabata tuma nada na man di niun hende i un chinchan kos tabata pone mi rabia. Hopi hende na zùit Líbano tabatin miedu di mi pasobra mi tabata bringa mi mes guera kontra violensia i inhustisia.

Na 1980 mi a djòin un ekipo di kung fu na Beirut. Tur dia bòm, rakèt i misil tabata kai, pero esei no a stroba mi di bai train. Mi bida tabata drei rònt di kome, drumi i biba manera Bruce Lee, un aktor chines-merikano i kampion di kung fu. Mi tabata peña meskos kuné, kana meskos kuné i grita meskos ku ora e tabata bringa. Nunka mi tabatin un smail riba mi kara.

BEIBEL A KAMBIA MI BIDA:

Mi meta tabata pa bira un profeshonal di kung fu na China. Un anochi ku mi tabata train pisá preparando pa mi biahe pa China, mi a tende un hende bati na porta. Logá tabata un amigu di mi ku a bini ku dos Testigu di Yehova. Mi tabatin un pak pretu bistí i mi  tabata papa sodá. Mi a bisa nan: “Mi no sa nada di Beibel.” Mi no por a imaginá ku for di e momento ei mi bida tabata bai kambia.

E Testigunan a mustra mi den Beibel dikon hende lo no por eliminá violensia i inhustisia riba nan mes. Nan a splika mi ku ta Satanas e Diabel ta e kousante di e tipo di problemanan akí. (Revelashon 12:12) Mi a keda mashá impreshoná pa e manera trankil ku nan a papia ku mi i e konvikshon ku nan a demostrá. Anto loke a konmové mi mas ainda ta ora mi a siña ku Dios tin un nòmber. (Revelashon 4:11) Tambe nan a mustra mi e teksto di 1 Timoteo 4:8, ku ta bisa: “Entrenamentu físiko ta yuda ku algu; pero deboshon na Dios ta probechoso pa tur kos, ya ku e ta inkluí e promesa di bida tantu pa awor komo pa futuro.” E palabranan ei tabatin un impakto grandi den mi bida.

Lamentablemente, mi a pèrdè kontakto ku e Testigunan pasobra mi famia a bisa nan pa no bini mas. Apesar di esei, mi a disidí di stòp di praktiká kung fu i kuminsá studia Beibel. Mi rumannan no a gusta e idea ei, pero mi tabata determiná pa haña e Testigunan di Yehova atrobe pa mi studia Beibel ku nan.

Mi a sigui buska e Testigunan sin por a haña nan. Den e mesun temporada ei mi tabata hopi tristu pa motibu di e morto di mi tata i otro gòlpinan di bida den famia. Mi a kuminsá traha na un kompania di konstrukshon i un dia un kolega di trabou ku yama Adel a puntra mi dikon mi ta asina tristu. El a kuminsá papia tokante e speransa di resurekshon den Beibel. E Testigu amabel akí tabatin e pasenshi di studia Beibel ku mi pa e siguiente nuebe lunanan.

Mas mi tabata siña for di Beibel, mas mi a mira e nesesidat di hasi kambionan grandi den mi personalidat. No tabata fásil. Semper mi tabata krepchi, kla pa disgustá i tabata fada masha lihé. Pero Beibel a siña mi kon pa kontrolá mi beis i pa mi no laga delaster un kos traha riba mi nèrvionan. Por ehèmpel, Hesus a duna e siguiente konseho na Mateo 5:44: “Sigui stima boso enemigunan i hasi orashon pa esnan ku ta persiguí boso.” I Romanonan 12:19 ta spièrta nos: “No tuma vengansa, . . . pasobra ta pará skirbí: ‘Vengansa ta di mi; ami lo paga bèk, Yehova ta bisa.’” E tekstonan akí i tambe otronan a yuda mi poko poko pero sigur pa logra haña pas interior.

E BENEFISIONAN:

Maske na prinsipio mi famia a bai kontra mi desishon di studia Beibel ku Testigunan di Yehova, nan a kuminsá respetá e Testigunan. De echo, un di mi ruman hòmbernan tambe a kuminsá adorá Yehova i mi mama a defendé nos fe te na su morto.

Tambe Dios a bendishoná mi ku un kasá fiel i presioso ku yama Anita, kende ta mi kompañera stimá den sirbishi di tempu kompleto. For di aña 2000, ami ku Anita ta biba na Eskilstuna, Suesia. Einan nos ta dediká nos mes na siña hende ku ta papia arabir tokante Beibel.

Ainda mi ta sinti pa esnan ku ta sufri pa motibu di violensia. Pero, mi ta haña berdadero goso i pas pasobra mi sa pakiko tin tantu sufrimentu i mi sa ku pronto Dios lo kaba kuné.—Salmo 37:29.

Ami ku mi kasá ta mashá felis den nos sirbishi. Nos gusta siña otro hende tokante Yehova