Bai na kontenido

Bai na kontenido

 TÓPIKO PRINSIPAL | DIKON KOS MALU TA PASA KU BON HENDE?

Loke Dios Ta Bai Hasi ku Maldat

Loke Dios Ta Bai Hasi ku Maldat

Beibel ta bisa nos klaramente kiko Yehova i su Yu, Hesus, lo bai hasi ku e sufrimentu ku Satanas e Diabel a kousa. Beibel ta deklará: “Pa e motibu akí e Yu di Dios [Hesus] a keda manifestá: pa destruí e obranan di Diabel.” (1 Huan 3:8) E mundu malbado akí, yen di golosidat, odio i aktonan malbado, lo ser destruí. Ademas, Hesus ta primintí ku e “lo bai saka e gobernante di e mundu akí [Satanas e Diabel] afó.” (Huan 12:31) Sin e influensia di Satanas, Dios lo trese un hustu mundu nobo i e tera akí lo bira un lugá pasífiko.—2 Pedro 3:13.

Awor, kiko lo pasa ku hende kabesura ku ta nenga di kambia i ku ta sigui insistí riba hasi malu? Wèl, Beibel ta bisa bon kla: “E rektonan lo biba den e tera, i e perfektonan lo keda den djé; ma e malbadonan lo wòrdu kòrtá kitá for di tera, i e traidónan lo wòrdu ranká for di djé ku rais ku tur.” (Proverbionan 2:21, 22) E influensia di e malbadonan lo no t’ei mas. Bou di e kondishonnan pasífiko akí, hende obediente gradualmente lo ser librá di e imperfekshon heredá.—Romanonan 6:17, 18; 8:21.

Kon Dios lo eliminá maldat den e mundu nobo ei? E no ta bai kita hende su boluntat liber i hasi nan robòt. Mas bien, e ta bai siña hende obediente su mandamentunan i yuda nan kambia nan mal pensamentu- i akshonnan.

Dios lo eliminá tur e kousanan di sufrimentu

Kiko Dios ta bai hasi ku susesonan imprevisto? El a primintí ku pronto su Reino lo tuma kontrol di tera. Dios a nombra Hesukristu komo Rei di e Reino ei i e tin poder pa kura hende enfermo. (Mateo 14:14) Hesus tin poder pa kontrolá e forsanan di naturalesa tambe. (Marko 4:35-41) Pues, sufrimentu kousá pa kosnan malu lo no “bini [mas] diripiente riba” hende. (Eklesiástes 9:12) Bou di Kristu su reinado, kalamidat lo no asotá humanidat mas.—Proverbionan 1:33.

Awor, kiko di e miónes di hende inosente ku a muri un morto trágiko? Djis promé ku Hesus a resusitá su amigu Lázaro, el a bisa: “Ami ta e resurekshon i e bida.” (Huan 11:25) Asina mes, Hesus tin e poder pa resusitá esnan ku a muri!

Si e idea di biba den un mundu sin maldat ta atraé bo, pakiko bo no ta analisá Beibel mas a fondo i siña mas tokante e Dios berdadero i su propósito? Gustosamente, Testigunan di Yehova den bo área lo yuda bo haña e konosementu ei. Bo por tuma kontakto ku nan òf skirbi e editornan di e revista akí.