Bai na kontenido

Bai na kontenido

 TÓPIKO PRINSIPAL | DIKON KOS MALU TA PASA KU BON HENDE?

Dikon Kos Malu Ta Pasa ku Bon Hende?

Dikon Kos Malu Ta Pasa ku Bon Hende?

Yehova Dios * ta e Kreador di tur kos i ta todopoderoso. P’esei hopi hende ta kulp’é pa tur loke ta sosodé na mundu, asta kosnan malu. Sinembargo, laga nos wak kiko Beibel ta bisa di e Dios berdadero:

  • “SEÑOR ta hustu den tur su kamindanan.”—Salmo 145:17.

  • “Tur [Dios] su kamindanan ta hustu; un Dios di fieldat i sin inhustisia, hustu i rekto e ta.”—Deuteronomio 32:4.

  • “Yehova tin masha kariño, kompashon i miserikòrdia.”—Santiago 5:11.

Naturalmente, no ta Dios ta pone kos malu pasa. Ma ta é ta instigá otro hende pa kometé maldat? Klaru ku nò. Beibel ta bisa: “Ora un hende ta pasa den prueba, e no mester bisa: ‘Dios ta pone mi na prueba.’” Dikon nò? “Pasobra ningun hende no por pone Dios na prueba ku kos malu, i e mes tampoko no ta pone ningun hende na prueba ku kos malu.” (Santiago 1:13) Dios no ta pone niun hende na prueba ni e no ta kousa kosnan malu òf instigá hende pa hasi malu. Ken òf kiko nos tin ku kulpa anto?

NA E LUGÁ ROBES I NA E MOMENTO ROBES

Beibel ta menshoná un motibu dikon hende ta sufri: “Tempu i suseso imprevisto ta kai riba tur hende.” (Eklesiástes 9:11, NW) Ku otro palabra, si pa un hende su di malu, e ta nèt na e kaminda i na e momento ku un aksidente imprevisto tuma lugá, e por keda afektá. Kasi 2.000 aña pasá Hesus a papia di un suseso ku a enbolbé 18 hende ku a pèrdè nan bida ora ku un toren a basha abou riba nan. (Lukas 13:1-5) Nan no a bira víktima debí na e manera ku nan a biba; simplemente pa nan di malu nan tabata bou di e toren ora el a basha abou. Na yanüari 2010 un temblor devastador a asotá Haiti, i segun gobièrnu haitiano mas ku 300.000 hende a pèrdè nan bida. Tur e hendenan ei a pèrdè nan bida sin importá ken nan tabata. Tambe, tur hende por bira malu un ora pa otro.

Dikon Dios no ta protehá bon hende di desasternan natural?

Kisas algun hende ta puntra nan mes: ‘Dios no por evitá e kalamidatnan mortal ei? E no por protehá bon hende di kosnan asina?’ Pa Dios por intervení, lo e mester sa ki ora un kos malu ta bai pasa. Sin duda, Dios tin e kapasidat pa sa futuro. Pero, e pregunta ku nos tin ku konsiderá ta: Ta tur ora Dios ta usa su poder pa wak kiko ta bai pasa den futuro?—Isaías 42:9.

Beibel ta bisa: “Dios ta den e shelunan; e ta hasi tur loke ta agrad’é.” (Salmo 115:3) Dios ta hasi loke e ta haña ta nesesario, pero no tur  loke e tin kapasidat pa hasi. Esaki ta konta tambe pa loke e ta haña ta bon pa premirá. Por ehèmpel, despues ku maldat a kuminsá reina den e statnan antiguo Sódoma i Gomora, Dios a bisa e patriarka Abraham: “Lo mi baha awor i wak si nan a hasi kompletamente segun e klamor ku a yega na mi; si no, lo mi haña sa.” (Génesis 18:20, 21) Pa un tempu Yehova a opta pa no sa kuantu maldat tabatin den e statnan ei. Meskos tambe, Yehova por opta pa no sa tur kos. (Génesis 22:12) Esei no ke men sí ku Yehova ta imperfekto òf débil. Siendo ku “su obra ta perfekto,” e ta balansá su kapasidat di sa futuro ku su propósito. E no ta obligá niun hende pa sigui un sierto rumbo. * (Deuteronomio 32:4) Na ki konklushon nos por yega e ora ei? Simplemente esaki: Ta Dios ta disidí ki ora i kiko e ke premirá.

Dikon Dios no ta protehá bon hende di kriminalidat?

TA HENDE TA KULPABEL?

Hende sigur ta karga parti di e kulpa. Wak kon Beibel ta deskribí un proseso ku por hiba na un mal echo. “Kada hende ta ser poné na prueba ora e ser atraí i sedusí pa su mes deseo. Anto ora nutri e deseo, e ta duna lus na piká; i piká, na su turno, ora e keda realisá, ta produsí morto.” (Santiago 1:14, 15) Ora hende laga mal deseo pone nan kometé maI echo, sin duda nan lo kosechá e mal konsekuensianan. (Romanonan 7:21-23) Manera historia ta mustra, hende a kometé aktonan teribel i a kousa hopi sufrimentu. Ademas, hende malbado por influensiá otronan pa bira korupto i asina sigui plama maldat.—Proverbionan 1:10-16.

Hende a kometé aktonan teribel i a kousa hopi sufrimentu

Akaso Dios mester intervení i prevení hende di hasi malu? Laga nos pensa riba kon Dios a traha hende. Beibel ta bisa ku Dios a krea hende den su imágen i semehansa. Pues, hende tin e kapasidat pa reflehá Dios su kualidatnan. (Génesis 1:26) Dios a duna hende un boluntat liber i nos por skohe pa stim’é i keda leal na dje hasiendo loke ta korekto den su bista. (Deuteronomio 30:19, 20) Pero si Dios obligá hende pa sigui un sierto rumbo, ta komo si fuera e ta kita for di nan e boluntat liber ku el a duna nan, no ta bèrdat? Hende lo ta manera robòt e ora ei, hasiendo eksaktamente loke nan ta programá pa hasi. Esei lo ta e kaso tambe si ta suerte òf destino ta determiná e kosnan ku nos ta hasi òf e kosnan ku ta pasa ku nos den nos bida. Nos por ta kontentu anto ku Dios ta onra nos lagando nos skohe nos mes rumbo. Ma esei no ta nifiká ku ta pa semper nos lo tin ku sufri pa motibu di fayo i desishonnan robes di otro hende.

 POR TA UN KUESTION DI LEI DI KARMA?

Si bo hasi e pregunta riba e promé página di e revista akí na un hindú òf un budista, probablemente lo e kontesta bo: “Kos malu ta pasa ku bon hende pa motibu di e lei di karma. Nan ta paga pa loke nan a hasi den nan bida anterior.” *

Pa nos komprondé e asuntu akí mihó, laga nos wak kiko Beibel ta bisa di morto. Den e Hòfi di Edén, kaminda hende a originá, e Kreador a bisa e promé hòmber Adam: “Di tur palu di e hòfi bo mag kome libremente, ma di e palu di konosementu di bon i malu lo bo no kome, pasobra e dia ku bo kome di dje, lo bo muri sigur.” (Génesis 2:16, 17) Si Adam no a desobedesé Dios i peka, lo el a biba pa semper. Ma morto a bira e kastigu pa su desobedensia. Anto, ora yunan a kuminsá nase, “morto a pasa pa tur hende.” (Romanonan 5:12) Pues, bo por bisa ku “e salario ku piká ta paga ta morto.” (Romanonan 6:23) Beibel ta bisa tambe: “Esun ku muri ta keda apsolvé di su piká.” (Romanonan 6:7) Ku otro palabra, hende no ta sigui paga pa nan pikánan despues di morto.

Awendia, miónes di hende ta bisa ku sufrimentu di hende tin di haber ku lei di karma. Generalmente, e persona ku ta kere den karma ta aseptá su mes sufrimentunan i esnan di otro hende sin ku esei molesti’é. Tòg e kreensia akí no ta duna ningun speransa ku kos malu ta bai stòp di pasa. Aparentemente, e úniko kos ku por aliviá un hende di e siklo di reenkarnashon akí ta si e komportá su mes na un manera aseptabel i haña konosementu spesial. Ta klaru ku e ideanan akí no ta kuadra ku loke Beibel ta bisa. *

E KOUSANTE PRINSIPAL DI MALDAT!

Bo tabata sa ku e kousante prinsipal di sufrimentu ta “e gobernante di mundu,” esta, Satanas e Diabel?—Huan 14:30

Pero e kousante prinsipal di maldat no ta hende. Originalmente, Satanas e Diabel, ku tabata un angel fiel di Dios, “no a keda firme den e bèrdat” i a trese piká na mundu. (Huan 8:44). El a instigá un rebelion den Hòfi di Edén. (Génesis 3:1-5) Hesus a yam’é “e Malbado” i “e gobernante di mundu.” (Mateo 6:13; Huan 14:30) Awe tambe Satanas ta instigá mayoria di hende pa ignorá e kamindanan di Yehova. (1 Huan 2:15, 16) Beibel ta bisa na 1 Huan 5:19: “Henter mundu ta den poder di e Malbado.” Tambe tin otro kriaturanan spiritual ku a bira malbado i a uni ku Satanas den su rebelion. Beibel ta mustra ku Satanas i su demoñonan ta “gaña henter e tera habitá” i ta kousa “ai [na] tera.” (Revelashon 12:9, 12) Pues, ken ta e kulpabel prinsipal di maldat? Satanas e Diabel!

Klaramente anto, Dios no ta responsabel pa e kosnan malu ku ta pasa ku hende; tampoko e no ta pone hende sufri. Al kontrario, el a primintí di kaba ku maldat. E siguiente artíkulo lo mustra esaki.

^ par. 3 Beibel ta bisa ku Dios su nòmber ta Yehova.

^ par. 11 Pa sa dikon Dios ta permití maldat sigui, wak kapítulo 11 di e buki Kiko Beibel Ta Siña Realmente? publiká pa Testigunan di Yehova.

^ par. 16 Si bo ke sa kiko ta e orígen di e asina yama lei di karma, wak página 8-12 di e foyeto Kico Ta Sosodé cu Nos ora Nos Muri? publiká pa Testigunan di Yehova.

^ par. 18 Si bo ke sa kiko Beibel ta siña tokante e kondishon di e mortonan i speransa pa hende ku a muri, wak kapítulonan 6 i 7 di e buki Kiko Beibel Ta Siña Realmente?