Pa bo haña un idea kon Testigunan di Yehova ta kòmbersá ku hende, tuma nota di e siguiente diálogo. Imaginá ku un Testigu ku yama Anthony ta bishitá un hòmber ku yama Tim.

TA IMPORTANTE PA KERE DEN HESUS

Anthony: Hei Tim, kon ta bai! Mi ta kontentu di topa bo atrobe.

Tim: Hòmbu, mi tambe.

Anthony: Mi a trese E Toren di Vigilansia i ¡Despertad! nobo pa bo. Mi tin sigur ku e artíkulonan lo interesá bo. Ata nan aki.

Tim: Danki Anthony. Pero bo sa, mi ta kontentu ku bo a bini awe pasobra mi ke puntra bo un kos.

Anthony: Sí, kiko asina?

Tim: Wèl, un par di dia pasá mi tabata papia ku un kolega di trabou, anto mi tabata bis’é ku mi ta haña e bukinan ku bo a duna mi masha interesante. Pero el a bisa mi ku ta mihó mi no lesa nan mas pasobra Testigunan di Yehova no ta kere den Hesus. Mi a bisa mi kolega ku lo mi puntra bo esei ora bo bini serka mi. Ta bèrdat e kos ei?

Anthony: Wèl Tim, mi ta hopi kontentu ku bo a hasi mi e pregunta ei, ya bo por tende for di boka di un Testigu mes kiko nos ta kere.

Tim: Ta esei mes mi tabata ke.

Anthony: Pa bisa bo e bèrdat, nos komo Testigu di Yehova tá kere den Hesus. Nos ta kere ku pa bo haña salbashon, bo mester tin fe den Hesus.

Tim: Mi no tabata robes anto! Pero e kos ta ku ora mi kolega a bisa ku boso no ta kere den Hesus, el a pone mi duda un tiki. Mi ke sa ku nunka nos no a yega di papia riba e tópiko akí.

Anthony: I bo tin rason, Tim. Bo ke mi mustra bo algun teksto di Beibel ku ta laga bo mira dikon ta importante pa pone fe den Hesus? Nos ta usa e tekstonan akí hopi biaha ora nos ta prediká.

Tim: Oké. Laga nos wak nan anto.

Anthony: Ta bon pa nos wak kiko Hesus mes a bisa un di su apòstelnan den un kòmbersashon ku nan tabatin. E ta pará na Huan 14:6. E teksto ta bisa: “Hesus a kontest’é: ‘Ami ta e kaminda, e bèrdat i e bida. Ningun hende no ta yega serka e Tata si no ta pa medio di mi.’” Segun e teksto akí, kon ta e úniko manera ku nos por aserká e Tata?

Tim: Via di Hesus.

Anthony: Bo tiné. I nos komo Testigu di Yehova ta kere firmemente den esei. Laga mi hasi bo un pregunta: Di loke bo sa tokante Dios, ora un hende hasi orashon, den nòmber di ken e mester hasié?

Tim: Di Hesus.

Anthony: Korekto. Ta p’esei kada biaha ku ami hasi orashon mi ta hasié den nòmber di Hesus. I tur Testigu di Yehova tambe ta hasi mesun kos.

Tim: E ta interesante.

Anthony: Un otro teksto ku nos por lesa ta Huan 3:16. E teksto akí ta asina importante ku bo por bisa ku e ta un resúmen di tur loke tin skirbí tokante e bida di Hesus i su ministerio den e Evangelionan. Bo kier a les’é ?

 Tim: Ta bon. E ta bisa: “Pasobra Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.”

Anthony: Danki. Bo a yega di tende e teksto akí?

Tim: Sí, mi konos’é bon; tur ora mi ta tend’é na mi misa i tambe mi sa mir’é riba steker di outo.

Anthony: Sí, e ta bon konosí. Pero laga nos para ketu na e palabranan un ratu. Hesus a bisa ku Dios a stima hende asina tantu ku El a habri kaminda pa hende por haña bida eterno. Pero kiko nos mester tin?

Tim: Fe.

Anthony: Sí. Nos mester pone fe den Hesukristu, e Yu unigénito. Anto E Toren di Vigilansia ku mi a trese pa bo ta enfatisá e punto akí na página 2. Enkuanto e propósito di e revista nos ta lesa ku ta pa “animá hende pa pone fe den Hesukristu, kende a muri pa nos por haña bida eterno i kende ta reinando awor komo Rei di e Reino di Dios.”

Tim: Wèl, mas kla e no por ta. Boso revistanan mes ta bisa ku boso ta kere den Hesus.

Anthony: Eksakto.

Tim: Pero Anthony, ta dikon anto hende ta bisa ku boso no ta kere den Hesus?

Anthony: Bo sa Tim, por tin vários motibu. Tin hende ta djis ripití loke otro hende ta bisa. Òf nan a tende esei na nan misa.

Tim: Bo no ta kere tambe ku kisas tin hende ta pensa asina pasobra boso nòmber ta Testigunan di Yehova i no Testigunan di Hesus?

Anthony: Umm, esei tambe por ta un motibu.

Tim: Den tur esei, dikon boso ta papia asina tantu tokante Yehova?

“MI A HASI BO NÒMBER KONOSÍ”

Anthony: Un motibu ta ku nos ta kere ku ta importante pa usa Dios su nòmber, Yehova, meskos ku su Yu, Hesus, a hasi. Wak kiko Hesus a bisa su Tata den orashon na Huan 17:26. Bo ke les’é?

Tim: Sigur no! “I mi a hasi bo nòmber konosí na nan i lo mi sigui hasié konosí, pa nan por demostrá e amor ku bo a stima mi kuné i pa mi por ta den union ku nan.”

Anthony: Danki. Ripará ku Hesus a bisa ku el a hasi Dios su nòmber konosí. Dikon bo ta kere ku el a hasi esei?

Tim: Pa bisa bo frankamente, mi no sa.

Pa bo haña salbashon, bo mester tin fe den Hesus

Anthony: Kisas nos por lesa un otro teksto pa yuda nos haña kontesta pa e pregunta ei. Esun ku mi tin na mente ta Echonan 2:21. E ta bisa: “Tur hende ku invoká e nòmber di Yehova lo ser salbá.” Pues pa nos haña salbashon nos tin ku invoká, òf usa, e nòmber Yehova. I mi tin sigur ku bo ta di akuerdo ku Hesus lo mester tabata sa esei.

Tim: Konpolaga.

Anthony: Pues, un motibu dikon Hesus a haña ku ta importante pa su siguidónan konosé i usa Dios su nòmber ta pa nan haña salbashon. I esaki ta un di e motibunan prinsipal dikon nos ta papia asina tantu tokante Yehova. Nos ta pensa ku ta importante pa hasi Dios su nòmber konosí i nos ta yuda otro hende pa nan tambe hasi esei.

Tim: Pero aunke hende no sa e nòmber di Dios òf no ta us’é, tòg nan sa ken e ta.

Anthony: Por ta bo tin rason. Pero Dios a bisa nos kiko ta su nòmber, ya asina ta mas fásil pa nos hala serka dje.

Tim: Mi no a komprondé e pida ei.

Anthony: Wak e den e forma akí: Nos no tin nodi di sa e nòmber di Moises. Nos por djis  identifik’é komo e hòmber ku a parti Laman Kòrá na dos òf e hòmber ku a haña e Dies Mandamentu. Nos por bisa meskos di Noe. Pakiko nos mester sa su nòmber? Nos por djis referí na dje komo e hòmber ku a traha un arka i salba su famia i e animalnan. Asta di Hesukristu mes, nos por djis bisa ku ta e hòmber ku a bini for di shelu i muri pa nos pikánan, no ta bèrdat?

Tim: Mi ta kere ku sí.

Anthony: Pero Dios a laga nos haña sa nan nòmber, anto esei ta duna nan un toke masha spesial. Maske nunka nos no a konosé Moises, Noe ni Hesus personalmente, e solo echo ku nos sa nan nòmber ta hasi nan mas real pa nos.

Tim: Ami nunka no a pensa esei, pero e ta zona lógiko sí!

Anthony: Esei ta un otro motibu dikon Testigunan di Yehova ta usa e nòmber di Dios asina tantu biaha. Nos ke yuda hende pone fe den Yehova Dios komo un Persona real ku nan por hala serka dje. Na mes momento, nos ta rekonosé ku Hesus ta hunga un ròl hopi importante den nos salbashon. Kisas nos por lesa un teksto mas pa komprobá e punto akí.

Tim: Sí, ta bon.

Anthony: Awor ei nos a lesa Huan 14:6. Kòrda ku Hesus a bisa einan ku e ta “e kaminda, e bèrdat i e bida.” Laga nos bai na e mesun kapítulo 14, pero e biaha akí na versíkulo unu. Bo ke lesa loke Hesus a bisa den e último parti di e versíkulo ei?

Tim: Oké. E ta bisa: “Pone fe den Dios; pone fe den mi tambe.”

Anthony: Masha danki. Awor, kiko esaki ta nifiká? Ku bo tin ku pone fe den sea esun òf e otro, esta, sea den Hesus òf Yehova?

Tim: Nò, pasobra Hesus a bisa ku nos mester pone fe den tur dos.

Anthony: Hopi bon, Tim! Mi tin sigur ku bo ta eens ku no ta sufisiente pa djis bisa ku nos tin fe den Dios i den Hesus. Nos tin ku biba di tal manera ku nos ta demostrá ku nos tin fe den nan.

Tim: Klaru ku sí.

Anthony: Pero ta kon un hende por demostrá ku realmente e tin fe den Dios i den Hesus? Kisas nos por papia riba esei e siguiente biaha? *

Tim: E ta zona mi un bon idea.

Tin un tópiko di Beibel en partikular ku bo tin gana di sa mas di dje? Bo ta interesá pa sa mas di e kreensianan i kustumbernan religioso di Testigunan di Yehova? Si esei ta e kaso, no duda pa bisa un Testigu esei. Lo e ta kontentu pa kòmbersá ku bo riba e tópikonan ei.

^ par. 60 Pa mas informashon, wak kapítulo 12 di e buki Kiko Beibel Ta Siña Realmente? publiká pa Testigunan di Yehova. Tambe e ta disponibel na jw.org/pap.