KEN Thomas Emlyn tabata? Kiko a motiv’é pa tuma un posishon firme pa e bèrdat? I kiko nos por siña for di dje?

Pa kontestá e preguntanan ei, nos mester bai Inglatera i Irlanda i bai bèk den tempu te na e último parti di siglo 17 i e promé parti di siglo 18. E tempu ei Iglesia Anglikano di Inglatera tabatin hopi poder. Algun individuo i vários grupo protestant tabatin un konflikto ku Iglesia Anglikano.

KEN EMLYN TABATA?

Ta bou di e sirkunstansianan ei Thomas Emlyn a nase dia 27 di mei 1663, na Stamford, Lincolnshire, Inglatera. Tempu e tabatin 19 aña, el a duna su promé predikashi. Mas despues el a sirbi komo kapelan pa un kondesa ku tabata biba na Lònden; anto djei el a muda bai Belfast, Irlanda.

Na e stat ei, el a sirbi komo saserdote di un parokia. I atraves di tempu, el a sirbi na diferente otro lugá, entre otro na Dublin.

DIKON NAN A AKUS’É DI BLASFEMIA?

Durante e tempu ei, Emlyn a hasi un estudio profundo di Beibel. Debí na esei, el a kuminsá duda den e doktrina di Trinidat. Anto ora ku el a analisá e Evangelionan, el a haña prueba konvinsente ku e doktrina ei no ta kuadra ku Beibel.

Emlyn no a revelá mesora loke el a deskubrí. Sinembargo, algun hende di su misa na Dublin a ripará ku e no tabata papia mas di Trinidat den su predikashi. Sabiendo ku otro hende lo no keda kontentu ku loke el a deskubrí, el a skirbi: “Mi sa ku unabes ku mi revelá mi punto di bista, mi no por sigui sirbi den e funshon ku mi tin aktualmente.” Na yüni 1702, dos kompañero di dje a aserk’é pa puntr’é dikon e no tabata referí na Trinidat den su predikashi. Emlyn a atmití ku e no tabata kere den e doktrina ei mas, i el a entregá su renunsia.

Den e publikashon akí, Emlyn a usa e Skritura pa proba bon kla dikon Hesus no por ta e Dios Supremo

Despues di algun dia, el a bai Inglatera. Sinembargo, despues di dies siman el a regresá Dublin pa regla algun asuntu einan komo ku e tabata ke bai biba na Lònden. Miéntras e tabata einan, el a saka e publikashon An Humble Inquiry Into the Scripture-Account of Jesus Christ pa defendé su punto di bista. Den e publikashon ei, el a usa e Skritura pa proba bon kla dikon Hesus no por ta e Dios Supremo. Komo resultado, e miembronan di e misa na Dublin kaminda Emlyn a sirbi anteriormente a bira furioso, i nan a entregá un keho ofisial kontra dje.

Dia 14 di yüni 1703, Emlyn a ser arestá i mester a presentá dilanti tribunal na Dublin. Den e buki True Narrative of the Procedings Emlyn ta bisa: “Nan a akusá mi di a skirbi i publiká un buki den kua, segun algun hende, mi a blasfemá pasobra mi a insinuá ku Hesukristu no ta igual na Dios Tata.” E kaso den korte a resultá di ta un inhustisia di marka mayó. Shete obispu di Iglesia di Irlanda a sinta banda di e huesnan di korte. I Emlyn no tabatin mag di defendé su mes. E famoso abogado  Richard Levins a bisa Emlyn ku nan lo persiguí Emlyn manera un animal, sin lei òf regla. Na final di e huisio, Richard Pyne, e presidente di e tribunal di Irlanda, a rekordá e miembronan di hurado ku e “obispunan tabata einan,” kisas pa laga nan komprondé ku si nan no yega na e veredikto ku ta ser sperá di nan, nan lo risibí e kastigu meresí.

“Mi ta sufri pa loke mi ta pensa ta e bèrdat tokante Dios i su gloria.”—Thomas Emlyn

Ora hues a deklará Emlyn kulpabel, e abogado general a duna Emlyn e oportunidat pa hala su deklarashonnan aden. Pero Emlyn a rechasá e oferta. Nan a dun’é un but i a sentensi’é na un aña di kastigu di prizòn. Komo ku e no por a paga e but, e mester a keda dos aña den prizòn te ora un amigu di dje a konvensé outoridatnan pa redusí su kastigu. El a haña su libertat dia 21 di yüli 1705. E humiashon ku el a pasa aden a pon’é ekspresá e palabranan menshoná anteriormente: “Mi ta sufri pa loke mi ta pensa ta e bèrdat tokante Dios i su gloria.”

Emlyn a bai biba na Lònden; ku tempu el a bira amigu di William Whiston, un otro eksperto riba tereno di Beibel ku a ser despresiá pasobra el a publiká loke el a pensa ta e bèrdat bíbliko. Whiston tabatin hopi rèspèt pa Emlyn i a yam’é “‘e promotor prinsipal’ di ‘kristianismo di antigwedat.’”

DIKON EL A RECHASÁ E DOKTRINA DI TRINIDAT?

Meskos ku William Whiston i un otro eksperto bon konosí, Isaac Newton, Emlyn a deskubrí ku e doktrina di Trinidat ku e Kredo di Atanasio ta menshoná no ta un siñansa bíbliko. Emlyn a splika: “Despues di a studia e Santu Skritura i pensa profundamente riba dje, . . . mi a haña motibu bálido . . . pa kambia e punto di bista ku mi tabatin enkuanto e doktrina di Trinidat.” El a yega na e konklushon ku “e Dios i Tata di Hesukristu ta e úniko Ser Supremo.”

Kon Emlyn a yega na e konklushon ei? El a haña hopi teksto di Beibel ku ta mustra e diferensia ku tin entre Hesus i su Tata. At’akí un par di ehèmpel (Emlyn su komentarionan riba e tekstonan di Beibel ta skirbí ku lèter skùin):

  •  Huan 17:3: “Beibel nunka a bisa ku Kristu ta Dios òf e úniko Dios.” Ta e Tata so Beibel ta yama “e úniko Dios berdadero.”

  •  Huan 5:30: “E Yu no ta hasi su mes boluntat, ma esun di su Tata.”

  •  Huan 5:26: “Ta su Tata a dun’é bida.”

  •  Efesionan 1:3: “Maske hopi biaha Hesukristu ta ser yamá e Yu di Dios, nunka e Tata ta ser yamá e Tata di Dios, pero hopi biaha e ta ser yamá e Tata di nos Señor Hesus.”

Despues ku Emlyn a analisá tur evidensia, el a bisa ku énfasis: “No tin ni sikiera un teksto den e Skritura santu . . . for di kua bo por konkluí ku e Tata, e Yu i e Spiritu Santu ta unu i e mesun persona.”

KIKO NOS POR SIÑA FOR DI EMLYN?

Hopi hende tin miedu di defendé loke e Skritura ta siña nos. Pero Emlyn sí a defendé e bèrdat ku tin den Beibel. El a puntra su mes: “Si un hende no por papia tokante e bèrdatnan di mas importante ku el a deskubrí klaramente den e Skritura santu, ta pakiko e mester les’é i analis’é?” Emlyn no a skonde e bèrdat.

E ehèmpel di Emlyn i otronan mester pone nos pensa si nos ta dispuesto pa defendé e bèrdat ora hende ta despresiá nos pa motibu di nos kreensianan. Nos tambe por puntra nos mes, ‘Kiko ta mas importante: e onor i aprobashon di komunidat òf defendé e bèrdat ku tin den e Palabra di Dios?’