Bai na kontenido

Bai na kontenido

 NOS LEKTORNAN TA PUNTRA . . .

Pakiko Dios Ta Permití Hende Fuerte Abusá di Hende Débil?

Pakiko Dios Ta Permití Hende Fuerte Abusá di Hende Débil?

Beibel ta kontené algun relato di hende fuerte ku a abusá di hende débil. Un ehèmpel di esei ta e kaso di Nabot. * Akab, un rei di Israel di siglo 10 promé ku Kristu, a permití su kasá Yézabèl laga mata Nabot i su yunan pa asina e por a haña Nabot su kunuku di wendrùif. (1 Reinan 21:1-16; 2 Reinan 9:26) Pakiko Dios a permití e mal uso di poder akí?

“Dios . . . no por gaña.”—Tito 1:2

Laga nos para ketu na un motibu importante: Dios no por gaña. (Tito 1:2) Kiko esaki tin di haber ku mal uso di poder? Wèl, na prinsipio, Dios a spièrta sernan humano ku si nan rebeldiá kontra dje, esei lo hiba na morto. Dicho echo, pasobra for di dia ku nan a rebeldiá den e hòfi di Edén, nan no por a skapa for di e kastigu di morto. De echo, e promé morto ku a kai—ora Kain a mata su ruman Abel—tabata resultado di mal uso di poder.—Génesis 2:16, 17; 4:8.

Beibel ta bisa ku for di e tempu ei padilanti “hende a ehersé outoridat riba un otro hende pa su daño.” (Eklesiástes 8:9) E palabranan ei a kumpli? Sigur ku sí. Por ehèmpel, Yehova a spièrta su pueblo, e nashon di Israel, ku nan reinan lo a oprimí nan i pone nan sklama na dje pa yudansa. (1 Samuel 8:11-18) Asta e rei sabí Sálomon a oprimí e pueblo dor di kobra demasiado belasting. (1 Reinan 11:43; 12:3, 4) I reinan malbado, manera Akab, tabata hopi mas kruel ainda. Awor, puntra bo mes: Si Dios a evitá e kosnan akí di sosodé, lo e no a kontradisí su mes palabranan?

“Hende a ehersé outoridat riba un otro hende pa su daño.”—Eklesiástes 8:9

Kòrda tambe ku Satanas ta pretendé ku hende ta sirbi Dios pa motibunan egoista. (Yòb 1:9, 10; 2:4) Si Dios a protehá su sirbidónan kontra tur forma di mal uso di poder, lo e no ta dunando Satanas rason? I si Dios a prevení tur forma di opreshon, lo e no ta responsabel pa un mentira mas grandi ainda, esta, ku hende por goberná nan mes sin Dios? Ma Beibel ta bisa nèt lo kontrario: Hende simplemente no ta kapas pa goberná nan mes. (Yeremías 10:23) Nos mester di e Reino di Dios; e ta e úniko gobièrnu ku por kaba ku inhustisia.

Pero esei ta nifiká ku Dios no ta hasiendo nada pa kaba ku opreshon? Nò. Tin dos kos ku e ta hasiendo kaba: Na promé lugá, e ta saka na kla aktonan di mal uso di poder. Por ehèmpel, su Palabra ta revelá tur detaye di e kòmplòt ku Yézabèl a traha kontra Nabot. Tambe Beibel ta mustra ku tras di e aktonan malbado ei tin un gobernador poderoso ku ta purba di skonde su identidat. (Huan 14:30; 2 Korintionan 11:14) Segun Beibel, esei ta Satanas e Diabel. Dor di saka maldat i opreshon i su berdadero fuente na kla, Dios ta yuda nos keda leu for di maldat. Di e manera ei, e ta protehá nos futuro eterno.

Na di dos lugá, Dios ta garantisá nos ku lo e kaba ku mal uso di poder. E manera ku el a desenmaskará, husga i kastigá Akab ku Yézabèl, i tambe hopi otro hende malbado, ta duna nos e siguransa ku un dia lo e kastigá tur hende ku ta hasi malu. (Salmo 52:1-5) Tambe Dios ta duna nos speransa konfiabel ku pronto lo e eliminá e mal efektonan di maldat i opreshon pa esnan ku ta stim’é. * Pues, lo yega e dia ku e hòmber fiel Nabot i su yunan lo biba pa semper den paradeis riba tera, kaminda lo no tin inhustisia mas.—Salmo 37:34.

^ par. 3 Wak e artíkulo “Imitá Nan Fe” den e revista akí.