Di Bèrdat Beibel Ta e Palabra di Dios?

Lo bo ferwagt di e Palabra di Dios ku e ta un buki úniko, i de echo, Beibel ta un buki asina. Por ehèmpel, nan a publiká míles di miónes di Beibel den sientos di idioma. Ademas, e sabiduria ku tin den Beibel tin poder pa kambia bida di hende.—Lesa 1 Tesalonisensenan 2:13; 2 Timoteo 3:16.

Nos sa ku Beibel ta e Palabra di Dios pasobra e ta profetisá futuro ku eksaktitut. Niun hende no por hasi esaki riba su mes. Tuma por ehèmpel e buki di Isaías. Nan a haña un kopia di dje den un kueba banda di Laman Morto ku ta data for di mas ku un siglo promé ku Hesus a nase. E ta trese padilanti ku e stat Babilonia lo a keda desolá. E profesia akí a kumpli hopi aña despues ku Hesus a biba riba tera.—Lesa Isaías 13:19, 20; 2 Pedro 1:20, 21.

Kon nan a skirbi Beibel?

Nan a skirbi Beibel durante un periodo di 1.600 aña. Tabatin mas o ménos 40 hòmber ku a skirbi Beibel, i nan tur a skirbi tokante e mesun tema sin kontradisí otro. Kon esei tabata posibel? Ta bisto ku ta Dios a guia nan.—Lesa 2 Samuel 23:2.

Algun biaha Dios a papia ku e eskritornan di Beibel pa medio di angel, vishon òf soño. Por lo general, Dios tabata transmití su ideanan den mente di e eskritor i laga e mes skohe e palabranan pa skirbi Dios su mensahe.—Lesa Revelashon 1:1; 21:3-5.